嚐喜大不同特式餐廳小廚 (已結業)

因為煲仔飯癮起，食開嘅煲仔飯飯堂要十月先有得食，唯有搵住間食吓先，就揀咗屋企附近嘅大不同。大不同開嘅時候好多人排隊食佢嘅煲仔飯，由於之前一路都係太多人,所以到今時今日先至去試第一次。買咗個田雞+臘腸，$80+$12，價錢已經係算貴。麗都阿姐幫你加豉油，焗左大約5分鐘，打開後聞唔到香味，顏色亦都偏淡，正常煲仔飯你老遠都會聞到佢陣香味。好啦先講飯，偏濕，基本瓦煲煲仔飯應該要係企身同夠乾，依家就唔夠啦。唔夠乾都算喇，試埋啖豉油，淡而無味，最低限度都去超市買支煲仔飯豉油吖，而家直情連生抽都不如。到田雞喇，老兼且柴，超實，而且我未食過咁多骨嘅田雞飯，最重要入唔到味。係果兩條細臘腸叫做算正常......一路食一路散咁啲水叫做冇咁濕，但啲豉油依然淡而無味，中間已經加過兩三次....😑最後都飯焦喇，都叫做有嘅，但係煲飯都唔香，啲飯焦一樣都係唔香囉。一個字，伏。（以上食評只限煲仔飯）

來到北角呢度其實茶餐廳都幾多，但係呢間嘢我覺得比較特別，因為佢餸菜比較多款式，亦都有煲仔飯。呢樣嘢就唔係咁多餐廳有，佢煲仔飯都幾香，幾脆，比起廟街嗰啲煲仔飯有過而無不及。佢嘅小菜真係非常之多款，例如有荔芋炆鴨，呢一樣喺出面少見啲嘅菜式，整得足料又入味，非常難得係精心之作。

經開北角，見到有人排隊，就行過去睇下有咩食，原來係煲仔飯雖然最近天氣比較熱，但都試下白鱔煲仔飯每粒飯粒粒分明，飯焦好容易整出黎，而且做到好脆，不過要有心理準備，至少要等半個鐘冰鎮咕嚕肉開頭以為係凍食，原來係先整好咕嚕肉，之後即時加冰，做到冰火效果

原來這裡的煲仔飯咁好食！立刻榮登我最喜愛餐廳了～飯粒乾爽不油膩～撈埋d臘味粒真系好食到叫出黎🥰！絲瓜好清甜，加埋蒜蓉粉絲簡直絕配漁香茄子送飯一流，好惹味！真系好似姐姐咁講，未飲過咁好味嘅豬肚包雞湯～飲完心都暖❤️

呢間嘢真係幾多人其實佢之前 個煲仔飯已經好出名我真係唔明白點解佢要改名因為佢係同一個位置裝修冇變到只不過係改咗招牌座無虛席仲要排隊可能係性價比較高佢嘅煲仔飯 足料啲豉油落極都唔夠臘腸滑雞飯 當中嘅油份滲落白飯中真係極之惹味仲有個鹹魚肉餅飯 個鹹魚我覺得 麻麻地攞嚟撈飯係ok嘅反而肉餅幾滑小菜炒得夠火喉黑醋排骨 夠開胃如果個馬拉盞通菜煲可以再乾身啲就完美老實講坐就唔會坐得好舒服不過周圍都係街坊客所以啲服務水平係有水準好似返屋企食飯咁樣同你係朋友

從未食過嘅清湯羊腩煲， 好特別， 聽老闆講湯底 係用甘蔗燉嘅， 啲羊一啲都唔騷， 湯底好甘 甜， 超好味,,千葉豆腐， 冰鎮咕嚕肉 ，生炒臘味糯米飯， 炭燒牛仔骨， 都好好食下次過嚟一定要食炭燒煲仔飯， 因為我見隔離枱傾偈話好好味 下次要搵多啲人嚟試下， 因為有啲預訂菜式好吸引

大不同時時排長龍，見食評又唔錯，終於有d凍，可以試下煲仔飯。一坐低侍應就提醒我要叫左煲仔先，整要30分鐘。等左10分鐘先上個咕嚕肉，幾大盆，有好多冰，下層係d溶左既冰水，防止d咕嚕肉濕dead dead 可惜食落d咕嚕肉都係濕濕地，外層好脆，個粉雖然好厚，但口感唔錯。不過入面舊肉就顯得好細舊，又冇咩味，相比李公x既冰鎮咕嚕肉仲差好遠🙈 d生果都好酸，所以唯一可取既外層真係好脆，其他方面都令人失望。隔左一陣上埋個飯，侍應幫手倒豉油合埋個蓋焗一陣。有臘腸潤腸各三條，臘腸超級咸，肉質怪怪，我食左一條頂唔順。潤腸好少少，但都唔好味。豉油唔香，飯冇飯焦。整體仲失望過食咕嚕肉煲仔飯我都係食返西環坤x算⋯⋯

等一個鐘都未煮好的煲仔飯，由落單到飯到，完全無人理，成班侍應發夢一樣，完全不知所謂，仲有一個冰鎮咕嚕肉，啲咕嚕肉凍到琴晚煮一樣，老闆傻更更，碗碟仲要勁污糟，可以話再食都戇，我老闆會幫你落單，但係唔會交俾廚房，等你坐定先至慢慢寫，真係唔知佢搞笑定低能，七點幾落嚟食飯要九點都未食到煲仔飯，喺呢度呼籲各位唔好俾佢門口咁多人等呃到，呢間鋪呢咁多人喺門口等呢其實佢哋完全做唔到嘢，落單就亂晒籠，總括而言真係試都唔好試

同事話剛剛裝修完, 不如去試下, 所以就一行八人去食lunch了。入到去, 格局無咩點變, 餐牌變咗少少, 都係午餐特餐之類, 多咗少少, 見到新的撈公仔面就試下啦, 點知........同事的午餐先後到齊, 唯獨我的公仔撈面, 可能得我叫, 所以等鬼禁耐.....等咗好耐又好期待的公仔撈麵終於出現了.....第一刻見到.... 中伏!先唔講配料, 講個公仔麵先..... 味粉呢......少到呢.......  我只係食到得出前一丁味的公仔麵味, 如果唔係見到幾粒疑似公仔麵中味粉的蔥花既話, 我真係懷疑無蔥花...... 跟住個魚湯呢...... 我諗咗好耐咩湯, 又淡, 又無咩味, 如果唔係有好少好少既魚味既話, 真係唔知咩湯....跟住個瑞士雞翼....我完全睇唔出佢有邊忽係瑞士....可能佢個肺係瑞士山區來, 所以係瑞士雞翼掛..... 下次都係叫公仔麵算了, 唔好搞乜野撈, 完全係撈唔起... 或者叫午餐算, 起碼唔會中伏先。

焗魚腸現今已經好少餐廳有得食了，難得廚房洗得乾淨d魚腸，食落甘香卻一d也不腥半隻芝麻雞。原本想叫鹽焗雞可惜無，改芝麻雞亦都唔洗失望！半份都夠8人食。雞肉炸完唔怕老唔怕鞋，雞皮薄薄地少少脆，好香，基本上唔洗點孜鹽粉已經好好食。好罕有用欖角來烹煮咕嚕排骨。出奇地幾好味！酸中帶甜，排骨炸過好酥好入味，最重要整得夠乾身，唔怕食完一口係油！俾10個蓮藕餅，甘、香、爽、軟應有盡有！別以為一塊藕餅容易整，整到呢個質素，我覺得可以開私房菜了！淮山切得大大夠，但好爽口！臘味煲仔飯值得一試！臘腸、臘肉肥瘦適中，加上大量蝦米，簡直搭配得天衣無縫！

這次嘗的是一間位於北角的餐廳，主打是港式小菜。在吃飯前的一天便先致電餐廳預留一客竹籠肉蟹蒸糯米飯及一客胡椒豬肚包雞。當天下菜時，更點了冰鎮咕嚕肉及黃金金針菇。餐廳的上菜速度也很快，下單後大約等候十至十五分鐘便有東西可以吃了。首先說說竹籠肉蟹蒸糯米飯，肉蟹肉質鮮甜彈牙，糯米飯配上豉油後，味道一流，果腹感十足。其次胡椒豬肚包雞表現也不錯，湯汁胡椒味不會太重，喝下去也滿暖胃，如天氣稍冷一點，這個湯也不錯的。至於冰鎮咕嚕肉，表現稍遜，雖然冰粒可令咕嚕肉的外皮變得更脆口，可是溶掉冰粒會令咕嚕肉的表面較濕，什至令味道沖淡。而黃金金針菇是把金針菇配上咸蛋黃而炸成，吃下也十分香口，用來佐酒也是一個不錯的選擇。

在北角找有特色的晚市餐廳, 實在有難度, 除阿鴻小食和東寶之外, 其他選擇唔太多。今次來到屋企附近的"大不同", 星期五晚上三個人我地無book位, 七點入坐, 十五分鐘後立即爆滿。點了芝麻雞, 炒山藥, 鹹蛋肉餅煲仔飯, 湯煮菜心苗。餐廳煮法和味道和主流的有些分別, 煲仔飯米飯較乾身; 木瓜配炒山藥帶甜味的水果配山藥和爽身的木耳夠特別; 芝麻雞係家庭式的製法, 乾身入味!晚市生意實在太好, 原本想點的湯也售罄了！員工有禮, 價錢公道, 係附近食晚飯小菜的不二之選!

之前睇過一個十大煲仔飯既飲食推介，所以黎左試佢地既煲仔飯。我見佢都有人等位，應該都靠得住既。環境方面格局係茶餐廳，坐落都無乜特別，基於我得一條友，俾人調左兩次位，感覺就麻麻地。我叫左一個蠟腸滑雞煲仔飯。食煲仔飯，有幾樣野要留意。首先係啲飯，中間會唔會未熟或者好濕。第二，食到尾個底會唔會已經痴到燶左，或都仲係軟綿綿。當然，有無飯焦仲有好多因素，例如你落幾多豉油、個蓋焗幾耐、個煲熱度岩唔岩等等。我今次都成功有飯焦既，不過只係色水上似，食落就唔夠香同硬。

平時呢間餐廳排隊排到出邊，我都冇機會食到。今次星期一出奇地少人，特登走來呢間餐廳度食。呢間出名煲仔飯，聽聞係用炭爐煮，但係今日實在太熱啦，所以都唔係咁想食煲仔飯，我就試吓佢啲小菜啦！三個人叫左三碟小菜，分別係豬什豆腐鍋、豉油雞、蒜蓉粉絲蒸勝瓜菜。豬什豆腐鍋味道符合預期，都不錯。豉油雞肉質比較硬，可能因為雪藏雞嘅問題。蒜蓉粉絲蒸勝瓜菜係三個小菜之中比較好食的。另外叫咗三碗白飯，但白飯口感好硬有啲似生米。下次要來宜間應該都係食返煲仔飯算。

今日中午去打波打算食個滿足既早餐之後skip午餐落到屋企樓下既呢間茶餐廳食呢間茶餐廳成日都好多人就算係夜晚都成日爆棚醒晨早餐入面既配搭其實可以自己揀好似你火腿可以換做炒蛋咁我叫左個榨菜肉絲麵配腸仔炒蛋呢度個麵都算幾大碗榨菜肉絲份量唔少而且好有咬口不過就主要係榨菜 冇咩肉絲麵質係我最愛既偏硬質地 唔會太淋炒蛋夠濕潤同埋滑腸仔都唔會好鹹油包既牛油份量還可以我自己唔鍾意太多牛油既就夾起左少少呢種油包比起普通牛肉方包好食但我最後都食淨一半 因為太飽lu