嚐館 (已結業)

Cityfresh Bistro(黃大仙中心）見到門面裝修好簡約 佢嘅Tiffany blue 吸引左我嘅眼睛，下午茶時間入咗去坐。下午茶餐好抵食,我同朋友叫咗兩個下午茶餐同一個薄餅餐。食得又飽又滿足。公司三文治$48下午茶餐分量一啲都唔細，有四大件公治。面包烘得好脆口但唔乾，每一層餡料都做得唔馬虎。公司治來講佢都做得幾出色！加杯餐飲都係$48蚊。香煎洋蔥蘑菇蟹肉墨西哥卷$68墨西哥卷餅皮好軟身，好香麥味。餡料多到爆曬出嚟。呢個中式餡料配上墨西哥餅好有特色，可以一試。煙三文魚牛油果醬薄餅$88呢個薄餅非常之足料，通常出街食牛油果嘅食物分量多唔多，呢個薄餅有驚喜！估佢唔到有咁多牛油果！煙三文魚係新鮮嘅，喺呢間fusion 餐廳食到咁嘅質素嘅薄餅真係幾唔錯！

請媽媽出街食餐好東西～ 去左黃大仙南館的Cityfresh Bistro ～ 價錢算是親民～ around $100左右一個Set Dinner～無預料到佢覺得咖喱牛腩飯🍛 的牛腩飯好食😋 可能因爲牛腩炆得都幾夠冧身～ 有少少牙肉咁嘅佢，就覺得比較容易入口，肉類嚟講～ 而且咖喱汁幾惹味日本味噌煎白身魚🐟我自己就比較鍾意食味噌煎魚。我承認將日本兩個字放喺前頭，本身已經先入為主覺得好食🤣（改名好重要）雖然因為菜式係main course 所以本身唔跟白飯，但係魚肉分量本身都好足料，食魚都可以食飽😀 味道調得啱啱好，唔會太濃～

☕️Cityfresh Bistro (黃大仙)今次嚟到黃大仙呢一間cafe x 茶餐廳食晚飯。 呢到真係勁多嘢食！西餐、小菜、日本菜、家常菜等等都有！啱晒有選擇困難症嘅朋友🤣！今次我哋試咗二人餐，份量好多，最後仲要打包！🍱精選二人套餐（$228）🥜前菜 招牌小食拼盤（+$38）小食拼盤有酥炸軟殼蟹、青檸黑胡椒雞翼、洋蔥圈同埋脆炸魚柳。上枱嘅時候熱辣辣，炸得亦夠香脆👍🏻～🦐扒大蝦配龍蝦汁意大利飯（+$38）面頭有兩隻大蝦，都幾多肉，唔錯🥰～意大利飯並唔係平時咬落硬身嗰啲，啱返香港人口味～每粒飯粒都吸晒龍蝦汁😌，但唔會太鹹～份量都好多！🍖主菜 燒焗澳洲帶骨豬鞍扒配法國白桃燒汁（+$38）呢個豬鞍扒份量勁多！差唔多有十舊！！而且每舊都好厚肉🤣。肉質中等，唔算好淋，亦唔會韌到咬唔到～燒汁調配得幾好，不過就食唔到有白桃味🤔。🥛蜂蜜牛奶加咗蜂蜜嘅牛奶，甜甜地，原來幾好飲😂😂！🍵抹茶鮮奶抹茶味幾濃，但間中會飲到粉粒😮📍黃大仙竹園道136號黃大仙中心南館地下高層UG41號舖

最近去左黃大仙返工，呢邊街坊商場多，餐廳都好多，不過質素高既就唔多啦今日放Lunch一支公走左去南館搵食，突然間好想食西餐，見到呢間餐廳有扒据就入左去睇返佢有好多選擇，每日都會有精選午市套餐，價錢都唔算好貴，重有啲行政套餐有扒有意粉，包左餐湯、麵包、沙律同埋熱飲，我就簡左牛扒，可以簡薯菜、飯或者意粉，我不嬲都唔係好中意食飯同意粉既，所以就簡左薯菜。塊牛扒都幾靚仔，雖然無得簡幾多成熟，但睇返入面都唔係熟晒，都重係juicy唔係硬晒既，抵讚!啲薯仔先係最抵讚，超級重薯味，重要好甜，同埋唔合餐廳用左d咩整法，整到好香脆，我會為左呢個薯仔返黎講返個餐湯，有黑松露味好香，岩晒我呢啲湯王個麵包都幾特別，鹹鹹地既，同埋好脆，不過都幾大份，飲完個湯食埋個包都飽左兩成我都係飲開熱檸水，正常發揮啲檸檬都靚仔

星期一係最唔想煮飯嘅日子，今晚又做無飯主婦，放工約埋阿仔近近地去屋企附近嘅黃大仙中心南館搵野食，阿仔想食西餐，所以就去左UG樓層嘅Cityfresh Bistro，餐廳地方幾闊落，坐位舒適。打開餐牌好多選擇，中式同西式都有；如果叫餐就有埋餐湯同餐飲。餐湯 - 南瓜湯，上枱夠熱，而且好杰身，味道好濃郁，好香滑南瓜同忌廉味；側邊嘅餐包、外脆內軟，唔錯😋。🍴意式蕃茄汁焗咸牛脷飯，厚厚牛脷有5大塊，鍾意食牛脷嘅就真係睇倒都開心😃，上面鋪上拉絲芝士；牛脷厚切好有口感，帶上咸咸香香嘅底味，焗飯又熱又掛汁，連餐湯餐飲$88，價錢非常貼地。🍴香煎雞腿扒佐芥末籽汁配薯蓉，成個碟底都鋪上薯蓉，好驚喜，薯蓉綿滑帶香濃忌廉奶味，雞扒好大件，雞皮淋上芥末籽汁，所以冇咁香脆，但雞肉非常嫩滑，沾埋薯蓉一齊食，兩種唔同層次口感，愛吃薯蓉嘅朋友必選👍🏻，連餐湯餐飲$108呢個價錢真係冇得輸。

💕 Cityfresh Bistro黃大仙中心入面一間裝修有格調，環境舒適嘅餐廳，食物款式多樣化，menu集中、西、日、韓於一身，名符其實係多國菜🧡一次過滿足晒唔同口味.餐廳平日主要做街坊生意，店員同客人都會閒話家常，好有人情味🥰.🌈All day breakfast $98材料豐富，有三文魚、Parma Ham、法國腸、松露炒蛋、焗豆、沙律菜同牛角包🥐.炒蛋加入黑松露，香氣十足🍳三文魚大大片配上沙律菜食味道唔錯🥗驚喜嘅係有Parma Ham，軟滑細膩，食到呢幾款食材，CP值爆燈.值得一提牛角包口感酥脆，有豐富牛油香，配返杯咖啡就係一個完美嘅下午茶☕️.🌈蕃茄醬燴德國豬肉腸意大利粉 $98套餐裡面有餐湯、芝麻醬雜菜沙律及工匠麵包，麵包係酸種包，頗有心思蕃茄意粉煮得好入味，而且夠多汁，配料方面，豬肉腸同雜菌份量亦好多，整體酸酸甜甜幾開胃🍝

因為返工，又可以經常係黃大仙穿梭，黃大仙中心南館，北館确實變化很大，有的舖頭closed咗，又有啲嘢新開咗，包括食肆，海味，日用品店等等.....今日同同事嚟到一間好新淨疑似新開嘅舖頭食嘢，呢度真係好多嘢食中西式都有，仲有all day breakfast，我嘅選擇困難症發作了。最後"雜菌黑松露忌廉汁帶子意大利飯"係我的選擇，118蚊有埋沙律，麵包，餐湯同埋飲品，帶子有六粒咁多都比較少見。黑松露忌廉好濃郁，够cream，啲飯粒粒分明同埋份量都唔少。我同事就揀咗中式飯餐，咕嚕魚柳餐，包埋中式湯及一碗白飯，最後餸就食晒，飯就有剩，啲飯确實有啲多或者我哋細食囉。

俾錢買難受。落錯單，俾錯野食都可以咁無禮貌未試過咁差既餐廳，唔會有下一次 食物同環境都好一般，千祈唔好同伴侶/朋友去，自己一個食都由佢………………………………….

好少寫負評，但對住呢碗羅宋湯通心粉食物好有失望嘅感覺。本身係分湯，估唔到嗰湯可以咁少。而嗰羅宋湯通粉食落有燶味。如果$52感覺唔係好值得。食到一個唔好食既早餐真係令人覺得好失望。仲有，叫咗個奶茶，而奶茶係正正常常。應該短期內唔會再食呢間餐廳。

好耐冇幫襯👩‍💼大家都想食韓國燒牛肉👨‍🍳，所以選擇呢一間。環境唔同咗，門口位置改變左，細細間的超級市場，有凍肉、有雪糕等等，好多唔同種類嘅嘢買。入到去裏邊坐低，慢慢睇Menu，員工主動介紹，服務態度好好所以選擇食咗個最貴嘅套餐再叫多幾樣嘢，芝士粟米🌽雞蛋泡菜不斷添加，仲有前菜添，套餐嚟到，見啲雞肉🐔海鮮🦞牛肉🐂豬肉🐖拼盤都好新鮮、炒年糕，無骨甜雞、豬腸、再嚟個人蔘雞湯配白飯，唔錯唔錯，總括都唔錯，只係貴咗啲啫。

因為一段時間無去黃大仙，特登去睇下有咩小店值得支持。見到呢間餐廳comments唔錯，就決定試下!第一次食，有驚喜!2人餐portion夠大，我地2大2小，老闆娘recommend我地唔夠食先再加單 餐廳佈置簡單舒服，乾淨企理，適合家庭朋友聚餐 食物質素唔錯，性價比高老闆，老闆娘，伙記都好有禮貌老闆娘仲好好咁送租品俾小朋友食，另一枱客人慶祝anniversary, 老闆娘送左2件cake. 好有心仲有兒童餐具提供 一定會再黎

父親節前夕， 找一間新餐廳試下。呢間環境好靚，不太多人，主食都多款揀，有pizza,意粉，意大利飯，据扒，仲有日式飯。我們選了牛扒帶子意大利飯日本叉燒滑蛋飯炸魚薯條第一樣上的就是沙律和湯，沙律是沙律菜，看得出是用心切碎，並用醬把每一條菜都沾到醬。個蘑菇湯好濃味，好正款，配他自己制的軟包，好味牛扒點了7成熟，都有點硬個炸魚份量好多，是一般的龍利魚帶子意大利飯都不錯，好香黑松露味，帶子份量都多。個叉燒飯我仔很喜歡，但我覺得一般。可配低糖綠茶或咖啡奶茶我點了綠茶。整體都不錯，下次再幫趁牛

黃大仙中心有唔少高質食店進駐，西餐廳就有Cityfresh Bistro，餐廳裝修光猛時尚，座位以卡位為主，坐得舒服。好朋友今日生日，我請佢去食飯慶祝。精選二人套餐好豐富又抵食。是日餐湯兩客：忌廉湯滑溜creamy。招牌小食拼盤有酥炸軟殼蟹、青檸黑胡椒雞翼、洋蔥圈、脆炸魚柳，全部都係即炸，香脆可口，唔會好膩。主菜原隻香草蜜糖燒春：春雞外皮燒至金黃色，又香又脆，肉質細嫩鮮美有肉汁，蔬菜和薯仔吸盡雞肉的精華，份外美味！意大利風乾火腿薄餅：餅底厚薄適中，意大利火腿肉質柔軟，脂肪分佈均勻，含濃郁的栗樹林香。配芝士和蕃茄，味道層次豐富，十分惹味！芒果蘆薈青檸特飲，香甜清爽，雖然加咗冰，飲到最後一啖都唔會淡到冇味！朱古力曲奇沙冰：朱古力味道香濃，配上透心涼的沙冰，令人有豐富的味覺享受！

📍 Cityfresh Bistro🌍 黃大仙竹園道136號黃大仙中心南館地下高層UG41號舖Shop UG41, UG/F, Temple Mall South, 136 Chuk Yuen Road, Wong Tai Sin📝 整體評分：8／10🥢豬頸肉喇沙🥢$88喇沙湯底個色澤好吸引，睇既同食既一樣咁濃郁，超正！！！一定要試佢個喇沙，除左有厚身豬頸肉外，仲有魚蛋魚片頭，都幾豐富。🥢乳酪咖喱吉烈豬扒飯🥢 $83外賣返去既吉烈豬扒依然香脆，乳酪咖喱口感creamy d 稠密d，個咖喱都幾香惹，撈飯正~🥢水牛城雞翼🥢 $38/3隻香辣帶點醋意既雞翼，相當開胃。

呢日去咗黃大仙朋友屋企housewarming，晚飯時間就帶咗我哋去呢間Cityfresh Bistro。朋友話搬咗嚟呢度食過幾次，外賣有九折，堂食都唔使加一服務費，所以好抵食。朋友仲特別推介呢度嘅原隻燒春雞香草蜜糖。朋友果然冇介紹錯，燒春雞皮脆肉滑，雞皮燒得好甘香，肉質都好Juicy。最正嘅係佢會主動俾咗一支韓國糖漿，如果嫌唔夠蜜糖可以自己再添加。伴碟嘅薯仔粒都好好食，每粒都經過煎炸嘅效果，加埋甜甜地嘅蜜糖就更加惹味。另外我哋仲叫咗一客野生雜菌黑松露忌廉汁燴北海道帶子意大利飯，用忌廉汁煮嘅意大利粉夠晒入味，帶子份量都唔少，而且煎得兩邊金黃，而入面仍然保持鮮嫩。黑松露份量相當多，所以每啖都有黑松露嘅香味，再配合其他菇菌令口感更加豐富。凍奶茶都好香好滑，甜度適中，又夠冰凍。另外佢哋嘅甜品同麵包都好吸引，所以我都買咗件藍莓芝士餅返屋企慢慢品嚐。