悅火 (已結業)

靚裝爐端燒。有吧枱同埋好幾間榻榻米房。有啲似京都祇園啲居酒屋。尤其鐘意佢啲食物放曬出嚟可以睇住佢喺面前燒。可惜當日吧枱滿左。間舖有Sapporo生啤，個清酒Menu都幾多選擇。見佢有大路野又有幾粒米幾多代嗰啲。同我老婆兩個人叫左一客極上壽司拼盤。好抵食400幾蚊晚市有十二件仲要有拖羅海膽炙壽司! 除左極上壽司拼盤我哋同時嗌左雞肉串、燒日本番薯、同埋幾串唔同既串燒同埋燒物。尤其鐘意爐端燒食物上菜時有淡淡炭燒香氣。食落啲雞肉唔單止唔老仲好多汁！其實之前未聽過呢間野。朋友講開幾好落嚟試下感覺佢都算係九龍同價位數一數二爐端燒。另外想贊下佢啲壽司其實都堅好食好似係因為有個壽司發板吧枱。大家唔好錯過。

俾間舖門口啲廣告吸引左入去。店內啲裝修都幾靚。有兩個巨型貝殼形簷蓬。爐端燒吧枱放滿左海鮮串燒等食材，可以即刻選食材俾師父燒，都幾過癮。間舖大概七點左右已經坐滿左個吧檯。感覺頗熱鬧。食爐端燒都係想要呢種感覺。經理介紹間舖有Omakase吧。所以前菜自己a la carte order左啲刺身壽司。都幾surprise絕對係Omakase質素。串燒叫左燒雞肉，雞軟骨，雞皮，牛仔排等肉類，真心同啤酒好搭配。之後聽爐端燒師父介紹叫左條馬友。第一次爐端燒點烤魚，望住佢由好raw燒到金黃再過過炭爐都係唔錯既視覺嗅覺享受。個師父仲要幾nice攞住碟馬友俾我影相。條魚望落好脆本身驚會有啲亁，不過食落原來都好滑。總體經驗非常好，令我聯想起前幾個月去京都先斗町同大阪梅田啲爐端燒既質素。有熱鬧既氛圍裝修同埋野食都水準之上。