榮記粉麵

營業中

休息中

中學時代已經好喜歡食榮記車仔麵。今日難得經過一定要去打一打咭。香港有好多車仔麵店，不過好吃的真的不多。個人而言，車仔麵看似沒有性格、好似好簡單。但其實會個餸有着不同味道、煮法。榮記的車仔麵有自己的個性，湯底令原本沒有味道的麵很好味。餸的選擇很多，蘿蔔同豬紅係我每次一定要點的餸。蘿蔔每次都是吃上沒有渣同甜。豬紅好滑沒有臭味。上次意外地發現魚腐都幾值得點，皮香吸左湯汁好似一個小湯包.每個麵入面已有少量通菜（用上幼的）令這個車仔麵更加精菜。

夜晚行完 sogo，雖然在 sogo地庫食咗幾款小食，價錢貴但食唔飽，所以行去糖街食吓車仔麵，起碼一定飽比較實際啲，而且可以一次過食幾款餸，感覺豐富滿足。叫咗一碗蘿蔔豬皮$26。一碗冬菇、墨魚頭、墨魚鬚米粉$39。兩碗味道ok, 豬皮夠淋，而墨魚頭夠件頭，有咬口，冬菇夠入味，整體兩碗味道ok。

見到呢家粉麵人氣幾高，把心一橫去試一試。見唔少人推介食蘿蔔同冬菇，所以嗌左蘿蔔冬菇河。餸嘅份量係足夠嘅，但唔明點解咁多人話好食，冬菇蘿蔔都係勁甜，甜得好唔自然。成碗野得個甜字，搞到兩樣餸都好似同一種味咁，好唔開胃湯底都唔識欣賞，試唔出係咩味，但總之唔好味。 男朋友嗌牛腩河，就話還可以。下次唔會再食。餐廳得罐裝汽水飲，選擇好少，好口渴。唯一好係，嗌一至兩個餸嘅粉麵，個碗細啲，份量唔會太多，我都就食得完。

好多年前已經食過榮記，極愛車仔麵的我當時簡直一試愛上，但好多年無食過了。直至今日咁啱經過，見到門口排隊者不到十人，於是就入去重拾久違的味道。果然無令我失望，湯底好香好濃，蘿蔔都係咁淋咁入味，豬紅滑到一個點，叫人欲罷不能，仲有魚蛋好彈牙無鯹味。因為趕時間費事諗就叫咗個大雜幼麵，有魚蛋、牛丸、豬紅、蘿蔔、牛肚、豬皮，而且仲加咗啲通菜（記得冬天好似係西洋菜，仲正！），好大碗好抵食，所有餸都好好味， 唯獨是個麵淋咗少少，但都影響唔到我食晒成碗麵既滿足感，我俾九十九分，嗰一分扣喺個麵底可以再硬身少少。

寶寶同朋友外遊，留守兒童當然要搵d comfort food 食下。做完運動就落左銅鑼灣糖街榮記，細細個時佢仲係後巷大排檔已經食開，多年來水準依舊。港式粉麵我個人會分佢係濁湯/清湯，濁湯來講，我覺得榮記係香港最好食，無之一。晚市去得榮記就預左要排陣隊，但佢勝在返枱快，唔會等好耐，如果未齊人，勸你講清楚，無謂俾人話。入到去，唔好預坐得好舒服，但你要協助，搵張櫈擺下野，店員幫到都會幫。但你叫佢地前唔該諗清楚自己要咩，lee 到節奏好快，慢d 你都可能要受少少氣，怕你唔慣。餸菜粉麵基本自由配搭，佢好食基本上係因為佢果個化一切為神奇嘅湯底，牛腩汁來的，所以唔食牛嘅你不如唔好來。我個人最推薦冬天先有嘅西洋菜，原因係吸湯，仲有所有吸湯嘅餸，河粉都係好正，牛丸彈牙。雞翼尖雖然我好少叫，但確係鎮店之寶。整亂左先記得影...如果話某米線店d 呀姐廣東話唔正係特式，咁旅遊區名店來講，榮記店員講歪d 嘅廣東話就當係普通話都係一絕。銅鑼灣仲有另一間榮記，我唔知佢地有咩關係，但味道係兩回事，切記！

湯底濃而不死咸，最後可以(係忍唔住之岩)飲哂成個湯！必點料有。。。墨魚頭，墨魚頭既入味又霖，但又會彈牙！唔似得其他既墨魚又彈牙又爽口，直頭有種膠感！豬勁肉，小彈牙唔干身，仲痴住小小肥肉添😁正！最貼心既係嗌麵會送一堆西洋菜，好入味嫁！實不相瞞，我不嬲唔愛車仔麵，但榮記個湯底好正，d料又係有心之作，令我對車仔麵改哂觀！總之，榮記真係好正！經開銅鑼灣都一定要食！可唔可以開多d分店，同埋lunch hour 唔好等咁耐。。。

Lunch time速食之選銅鑼灣有兩間榮記粉麵，不過係糖街呢間嘅腩汁湯底先到好味，記住唔好去錯。因為今日落雨，所以少左人出黎食，去到唔洗等位。我一個人叫左碗豬紅、豬大腸米同淨雞翼尖。豬紅夠滑，又唔會一夾就散，大腸都乾淨，不過最出色就一定係雞翼尖，整得好入味，夠林，啱啲鍾意"論"骨嘅人，仲要一定夾埋啲滷水汁，所以最好就係叫一碟淨餸，唔好跟粉麵。叫得速食，就預左坐得唔係咁舒服，有時要調吓位就其他人，不過呢過嘅員工都算有禮貌嘅。

九龍人很少到港島, 每次去到都唔知有什麼又平又好食自從朋友半年前帶我食過呢間車仔麵, 之後三次來銅鑼灣我每次都會食呢間因為真是好少機食到好味的車仔麵星期六下午3點大概排了10分鐘隊雖然人多但流轉好快入去前要想好食什麼腩汁菜, 大大碗, 2個人share 一碗食, 甚為滿足一人一碗3餸麵, 心急得滯同朋友交換完餸, 食咗先至記得影相😅我叫咗豬紅, 墨魚頭, 魷魚鬚油麵豬紅粉量十足, 食極都有, 好滑, 冇怪味墨魚頭好少地方有, 好有咬口魷魚鬚普通, 夠爽口, 有腩汁味朋友點的大腸整個麵最好味就係個湯底, 好香成個麵底好入味現在想起都想食

同兩個朋友一早約咗今晚銅鑼灣食車仔麵咁銅鑼灣車仔麵就一定非榮記莫屬啦今晚差唔多八點去到都仲係排晒長龍我哋前面差唔多有10幾個人等緊不過為咗食好嘢當然唔介意等 等左差唔多15分鐘就有位啦 樓面啲人例牌黑面 應該係呢度嘅特色嚟嘅😂今次我嗌左魚皮餃墨魚丸蘿蔔油麵 我哋另外仲加左一碟雞翼尖 講返個麵先 魚皮餃個皮好薄好味 墨魚丸冇乜特別 蘿蔔好入味好鮮甜冇渣 碗麵入面仲有幾條通菜啲菜淥得啱啱好唔會話林batbat 啲油麵今次就整得林左少少 不過真係要讚下個腩汁 第二間車仔麵檔真係唔會俾咁多腩汁而且仲要好好味 不過坦白講碗麵嘅份量又真係少咗啲嘅 最後仲有個雞翼尖 好入味真係會食上癮停唔到口

the best thing to have someone share same preferences 🤤 ordered 10 choices plus #musthave #wingstip 😚 #friedfishskin from #saikung 😋😋 crunchy #squid and #octopushead 😋 juicy #whitecarrot 😶 #beefstew #beeftendon taste good but a bit too soft 😋tender #fishpuff #porkskin #friedgluten😋 #porkblood dun hv any weird odor and chewy texture 😶bouncy #beefball😋10/10 delicious and sweet soup 💰$53 for 5 choices and #noodle $33 for #swisschicken #wingtip....#vanrivlaonue#vaneatery#vaneathongkong#vaneatchinese

聽人講係銅鑼灣食車仔麵，哩間必食，所以黎左哩間，見幾多人排所以入黎試下。價錢黎講，$34 兩餸還可以，餸種類唔算多，唔係太多得揀。嗌左3餸， 魚皮餃，魚肉春卷，墨丸加幼麵，個麵本身有跟2條菜芯。其實個份量就算女仔食，都唔夠食，如果男仔食，應該要嗌2碗。魚皮餃同墨丸各2粒，哩款魚皮餃皮好厚，餡少，個人唔係咁中意，墨丸本身比較細粒，口感欠奉。魚肉春卷有3舊，但都係平時食開嘅一大條切開3舊煮得偏淋，好普通。湯底味道還好，但係有點油。總括而言，價錢，地方，賣相，用料，都唔係太值個價錢同人氣。

如果住開港島區嘅朋友相信都應該會有聽過呢間餐廳嘅名，佢喺銅鑼灣以車仔麵聞名，唔少附近做嘢嘅人放lunch都會嚟食，而我就係其中一個！我就嗌左個墨魚頭蘿蔔美味齋油麵！佢呢到大部分嘅餸其實都出名好食 但我就食開佢嘅呢三種餸 佢嘅墨魚頭又大又爽口 而蘿蔔就好鮮甜多汁 size啱啱好一啖食得曬！ 最正嘅都係個美味齋 索曬啲湯汁 咬落又唔會太冧 啱啱好！ 最後不得不提嘅就係佢嘅湯底 一般係跟埋腩汁 好甜好鮮味🙈 但如果唔鐘意嘅朋友記得落單前嗌走腩汁阿 因為佢會自動加埋的👍🏻

每次去銅鑼灣都會想食, 又平又好味又算乾淨, 全CWB都無得幾可有, 附近都陸續有開新既燒味, 粉面, 但我成日形住係俾遊客食的, 驚食左$80碗叉燒飯所以唔敢入去.呢間學生時期就食開, 味道態度都係咁上下無變, 哈哈鐘意食佢牛肺, 好入味! 大腸乾淨又肥美, 仲有豬紅又係招牌, 不過成日賣哂, 有得叫一定叫!今次同老公黎食, 就可以叫份魷魚, 真係好正, 又爽又入味仲好惹味!!個味調得好過癮!次次黎食都會飲清佢個湯架~~仲有D 菜底又係精粹, 又夠多又嫩!唔係是但俾你

早午晚都會有要排隊既機會。每碗基本上都會跟左菜，唔少份量個隻。 一年間大部分時間都係西洋菜，除左真係好唔當造個時。 伙記老細全部都係澳牛級（老細有時惡過哂澳牛），坐得仲逼過三哥，但我就係好鐘意食囉，一個人專登黎食都會。豬紅無出面個啲咁實, 真係幾似jelly, 牛既部分因為我唔食牛，所以好抱歉comment 唔到、但眼見佢有好多唔同既部位可以食，連牛肺都有，應該係出面少見既。 蘿蔔好好味，好甜，應該有用冰糖煮過先有呢種甜度。 魷魚鬚可以獨立嗌，岩哂我呢啲淨係鐘意食鬚既人，不過偏韌，我都唔會話次次都叫呢味送。 美味齋索湯食好正，不過本身係炸過既，怕油既要注意。 湯底本身已有腩汁，如果唔要記得出聲。因為太經常食，老是唔記得影相。 抱歉。

很懷念的古早味，想起石排灣四座的麵，十分好味，但年幾大，悄悄覺咸了半格，但可接受的，蘿蔔清甜不起根，雞翼尖算是必點之選。以前小販檔經常去食，非常底食，入了舖，租金問題，貴了不少，但都算合理。二人前，叫了細雜河，冬菇蘿蔔河，雞翼尖，埋單 98元，人均消費48元，牛腩牛肚夠入味夠淋，蘿蔔清甜，雞翼尖夠野味，如有枝啤酒就一流。繁忙時段要排吓隊，地方都會迫迫地，諗得太耐點餐，會催吓你，這個悄悄要扣吓分，希望只是個別例子。