肆年八月米線專門店 (已搬遷) 新店位置

住左係大圍咁耐都係第一次試呢間好似好多人推介嘅米線🤔佢位置都算偏僻，餐廳入面都好細，我地星期六晏就12:15去排隊，去到果陣前面得2個人等，點知我地都足足等左1個中☹️唔知果日係咪多外賣，入到去我地叫左野食之後又等成1個中先有得食，已經等到由期望變失望🥢香辣蕃茄湯米線 （豆腐，豬扒） 湯底唔錯，d 蕃茄咪好濃郁，豬扒同豆腐都唔算特別，米線份量一般🥢豬扒撈米線豬扒同米線都係一般，米線煮得有d "淋",再加上撈面無湯食落個口感麻麻地🥢酸辣雞絲酸辣汁唔夠，雞絲好乾又多夠味，不過入面有酸菜，啲酸菜唔錯不過今次食完之後唔會再嚟🤣等食嘅過程太耐，但食物質素又一般

1:00等到3:30，排隊嘅人唔多食，入面好多食客都等緊嘢食，出單嚟錯。等左兩個半鐘，終於有得入，餐牌吾多飯類，有豬頸肉飯好似幾好食，點知賣晒，之後問其餘幾樣都話賣晒！認真好心，賣晒一早講啦，坐喺左先話呢樣無個樣無，諗起麥兜情節，呢樣賣晒，個樣賣晒！個重點係我等左咁耐諗到食咩，黎餐成半個鐘，個米粉好似發過水咁！仲送錯餐兩次！所以我真係講，唔鍾意排隊既吾好去，無食早餐既都吾好，愛米線之人就千祈吾好去！

諗住襯放假去今好西，又想食米線見到大家極力推介呢間，就諗住黎試下黎到都預左要排，點知排左差吾多兩個鐘一直等一直聽到大家出黎都話好食令我對佢既期望又更加大⋯⋯點知⋯⋯我同朋友，一個叫左豬腸雞絲蕃茄辣，一個叫左豬頸肉豆腐麻大辣，我地食左第一啖就覺得陣味有D熟，食多兩啖就覺得出事，自問本身都重口味，個湯咸到完全食吾到，直頭覺得自己食完會腎虧，結果我地食左一半都無最後評語得一句，不可一不可再P.S. 如果大家覺得自己腎功能好過普通人，就去試下啦

第一次試這類型既米線湯底，並唔似譚仔既米線，非常特別！店外内既裝修都好特別，似是cafe一樣他們有得自選配搭或者可以選擇店內既推介組合。 麥芽滷雞翼 $28滷水汁味濃，而且雞翼肉都很嫩滑，但是麥芽味不是很重。麻香手撕雞麻辣湯米線 $48手撕雞的肉質比較軟，對於怕食雞胸既人是不錯既選擇。至於米線既質感是屬於偏林，未必個個都會喜歡，但這是小編喜歡的軟硬度。湯底很香的麻香味，會一邊食嘴唇都會有滲出黎既麻痹既感覺🌶秘製豬頸肉+凍巢凍豆腐 蛋花蕃茄湯米線 $59 店主推介既秘製豬頸肉果然出色，原來係即叫即炒，味道都好濃厚！蛋花蕃茄湯要另外加$4，但非常值得！小編簡直係想成碗湯飲落去，味道真係好特別，如果唔想食太濃太重口味既湯底，這個湯底最適合不過，非常推薦！！本人覺得有少少改善地方是抽風系統，因為是村屋食店關係，他們採用開放式廚房，所以坐在內面食後，衣服同頭髮都沾有油煙味。當然大家可以選擇坐在外面的位置。由於位於大圍既隱世小店，店內都比較細，大家要耐心等候！

🍜聽聞係全港十大米線 x 世界級隔涉 x 值得一訪❓𝐎𝐯𝐞𝐫𝐚𝐥𝐥整體來講 係一間高質素有心思嘅米線店😬沙嗲湯底的確出色 其餘食物唔錯 如果行山黎醫醫肚 呢度係一個非常之好嘅選擇但就未至於一定要專程嚟食⁣—————————————————⁣🐣麻辣手撕雞沙嗲湯底米線 $48沙嗲湯底超級濃厚 飲得出係熬咗好耐嗰隻差啲飲晒成碗湯🤣手撕雞麻香十足 辣度適中 十分惹味米線口感滑溜彈牙 的確係同出面食緊米線有唔同 🐷豬頸肉沙嗲湯底米線 $48豬頸肉就比較普通 不過不失~🫔越南米紙春卷 $28外酥內軟 餡料豐富唔會太油膩 但亦未至於好驚喜🧋手拉奶茶$18奶香超重 口感超順滑 一定要嗌😻—————————————————⁣📍 肆年八月米線專門店⭐️食物：8/10⁣⭐️CP值：8/10⁣⁣⁣⁣

今餐最推薦係：魚餅好出色👍🏻👍🏻👍🏻奶茶超正米線唔知由幾時開始變咗香港人頭等美食，諗唔到食嘜嘅時候提議食線，幾乎冇人會拒絕😅連鎖米線開到成行成市，獨立舖都幾難差到隻腳入呢個Market，除咗食物質素，最緊要就係用特色去突圍而出。講真丫，連鎖嗰啲係味道穩定又惹味嘅，但係始終都係食到好重味精😆所以一得閒都會想試吓啲獨立米線舖🍜🍜大圍呢間村屋米線屋真係好隱蔽，雖然對面就係屋邨，唔算偏僻，但唔突登搵係唔會見到。去到馬路望咗陣唔覺有，行入少少轉個角先就望到，裝飾得好有日本街邊拉麵屋嘅feel，好悠閒☺️米線湯底同食材都幾多選擇，不過全部嘢售完即止，夜咗就未必齊。米線麵質偏硬身咬口ok。清湯可以再淆耐啲啲肉味會再出啲，偏淡但冇味精感嘅。小食有十零款，叫咗個鯪魚餅同炸雲吞。

之前食都keep到水準，但今日lunch時間食1.米線好明顯轉左即食麵嗰隻 2.湯底唔夠熱3.冇豆腐 又冇豬頸肉 又冇冰飲唔到凍飲之前食都係後生男女煮，今日個班底唔同左，唔知係唔係關事

住咗沙田咁耐，都未試過食呢間喺大圍嘅小店，由於佢位置好偏僻，大圍站仲要再轉車先去到時間喺村入面嘅小店。平日12點一個人去到，都要等幾個字先有得食。今次第一次食，試咗間沙嗲湯底再配上受歡迎嘅豬頸肉。米線非常煙韌彈牙，豬頸肉亦醃得非常入味。唯湯底太甜太傑，同埋如果豬頸肉係燒過既會更好。

Follow 開 DE ODD 見佢有幫呢間餐廳嘅老闆影相，走入去佢 OR 睇下見啲米線又幾似樣喎，之前 bookmark 咗一直想試，今日過開嚟大圍做嘢，機會嚟喇飛雲。餐廳喺大圍田心嘅一條小街，唔係陀地嘅話相信都要做定啲功課，到達時為星期六1252，門口已經有兩個人喺度等緊位，小店坐位唔多，為數十零個，不過咁早個 flow 都尚算ok，等咗大約十分鐘就有位。今日氣溫大約十八度，但係一入到去餐廳就好似帶咗你去咗八月咁，我好鐘意食辣，我食辣係會出好多汗嘅，就算得幾度都會出汗，曾經一度掙扎好唔好嗌外賣即蓆喺門口長櫈度食，以享受番個十八度嘅清涼天氣，不過因為唔捨得張枱同付出咗嘅等位時間而打消咗呢個念頭，初時以為係冬天有人怕凍而熄咗個冷氣，及後睇番其它食友嘅食評，見佢八月去都話間舖又係熱辣辣嘅，作為一個西伯利亞人，實在極為難受，希望佢去到第伍年唔會都係長年 keep 住喺八月呢個溫度啦。揀咗佢哋嘅招牌滷鴨片，湯底揀咗酸辣中辣，個辣度同譚仔相若，面頭層油極厚，自然比譚仔更香，不過亦都更見邪惡，葱嘅份量好多，啱 feel；湯底好味，夠酸夠辣，心裏不期然將佢同四陂坊及香車街街市比較；肉碎比坊間一般大

諗住外賣自取，由我2:15開始落order, 店員就話等25分鐘後就有，點解等左成粒鐘先有。難道控制時間都咁難？ 我都係叫左2個麵加個小食！！！都明白得3個人做，但都唔係要個客等個幾鐘先食呀？咁合乎成本效益？ 等成粒鐘都未拎到都唔知咩事？又唔係多人食！！等到燥唔會有下次！

我嘅願望係試晒全港嘅米線！而大圍本身唔係好多米線鋪，有朋友就話呢間村屋附近嘅米線食過返尋味，所以專登揸車黎試試佢。餐廳連埋outdoor位都唔夠20個位，好在我地12點左右到，唔洗點等，見12點3開始已經好多人排隊。見佢menu好多野選擇，係啲平時連鎖米線鋪少見啲嘅湯底，例如金銀蛋芫茜湯（不過我唔鐘意芫茜味，朋友試咗就話好正）我就食酸辣米線配麥芽雞翼同金菇，好食呀！到第二日lunch咗啱煲附近做完野，叫多次一樣湯底，不過就叫咗手撕雞做餸，覺得呢個仲抵食，份量再多啲！

其實間店真係幾遠,真係特登搭車入去食,佢地舖頭地方唔算好大,都要等左幾個字先有位。由於個人好中意食豬頸肉,所以一揀就揀左豬頸肉撈米線,佢既豬頸肉好入味,而且份量都幾多,撈米線食落幾煙韌,唔係一食就散開哂果啲。另外叫左手撕雞酸辣湯米線,湯底飲落係酸味重少少既,但都有辣味,食落好惹味,手撕雞食落都幾嫩滑。椒鹽燒賣正常水準,炸到卜卜脆,椒鹽味都幾出。🔸手撕雞酸辣湯米線($48)🔸秘製豬頸肉撈米線($48)🔸椒鹽燒賣($16)

又係一間bookmark 咗好耐，要的起心肝，用啲時間travel先黎到嘅小店。•『蜂巢凍豆腐+香噴噴酸辣湯（小辣）』$48🍜豆腐有先調味再放入米綿，但要等一等先吸到酸辣湯；湯底偏酸同多油，平時酸辣係無咁油嘅；第一次食，只係叫咗小辣，覺得可以辣啲，問店員加辣醬；跟米線嘅肉碎都有煎香過，仲有少少燶邊；米線軟硬適中•『麥芽滷水大腸拼雞腎』$32🧆個汁甜甜哋，粒粒都已經滷得好入味；大腸瘦同彈牙；雞腎厚肉，有咬勁；幾鍾意哩款滷味，因為唔係煮到淋晒，仲可以咬下• 【後記】➡️一個普通星期四，1400，咁偏僻嘅地方，都Full House，so crazy！天氣唔錯，十分適合坐户外，因為入面人口都幾密集（大概5張2人枱，side by side）➡️下口徑村，如果坐MTR要上行人天橋，經幾條小村，過消防局，行大概20分鐘先到；建議揾下巴士或自己開車黎➡️最好睇下佢IG公布嘅開放時間先黎，因為個個星期都唔一樣

小店坐位不多，門口仲有一張三人bar枱。如果唔係喺門口一路等位一路俾蚊咬，其實坐門bar枱都幾有風味手絲雞酸辣湯米線（$48）沙嗲肥牛撈米線（$4x) 手絲雞蕃茄湯米線（$48）酸辣湯底酸味同辣味幾平均，唔會太酸，酸菜仲甜甜地幾好味。蕃茄味濃偏酸，兩個湯底各有風味。撈米線偏濃味，可能唔撈哂所有醬會好啲招牌手拉奶茶（加$12）奶茶只提供凍飲同固定甜度，奶茶香滑，甜度適中，由於本身奶茶已雪凍，奶茶冇加冰，唔怕一路飲一路融咗啲冰沖淡奶茶

本身是大圍居民，都試過呢間幾次了，今次食物質素真係非常一般。鋪頭座位不多，大約三點去到都要等，好彩無人排隊，等左一陣就有位。樓面只得一位店員，忙碌下仍然能禮貌地安排入座，態度算唔錯。嗌左豬頸肉米線 (番茄麻辣湯) + 檸檬薏米水。過了大約5-10分鐘米線黎左，第一淡的豬頸肉是凍的！！！我明白小店不會即燒豬頸肉，但係食物溫度是最基本吧。既然豬頸肉係預先準備好，圖中燒到黑曬嘅豬頸肉更加不能接受！！湯底還可以，但是小辣真的沒有味道，而且放兩舊番茄落去就話係番茄湯底了😅。米線也不差，夠粗有口感，不是連鎖店的劣質米線。另外筷子和匙羹送上時係濕既，不太衛生。48蚊的米線來說，分量充足，性價比還可以，食材處理真的有待改善呢。至於12蚊的檸檬薏米水，完全不值，仲要我就黎食完碗米線先送上！玻璃瓶內得一塊超薄檸檬，完全沒有檸檬味，薏米水亦超淡，也沒有提供冰羹撈薏米上黎食。總括來說，豬頸肉非常差，米線還可以，特色飲品就不了 (之前飲過手拉奶茶也是質素平平)。就算係黃店都要保持食物質素啊！