華都海鮮酒家

營業中

休息中

諗住行完街搵間有d特色o既地方食晚飯, 呢間對住果海, 應該有d風味, 不過一坐低, 風味就冇乜, 臭味就一陣陣! 我朋友仲見到隻大老鼠行過, 一d都唔驚人, 可能係間飯店隻寵物啦....不過一場黎到, 如果d食物有番d質數就算, 出去睇d海鮮, 選擇唔多, 只係有賴尿蝦, 鮮魷, 扇貝,蟶子, 中蝦, 有幾條魚, 花螺, 蜆, 但係價錢就一d都唔平, 想簡簡單單食個晚飯, 所以只係點o左6個菜, 鼓椒炒蟶子, 鼓椒炒蜆, 黑椒牛排, 東江豆腐煲, 冬菇菜膽, 西芹雞柳點完菜連水都冇, 蟶子同炒蜆好快上, 不過係凍o既, 叫o左幾次至拎d水俾我地, 其餘d餸就等好耐都唔到, 隔離檯d食物一個接一個上, 可能因為大部份都係海鮮啦!我地就睇住人地食飯, 自己碗飯就攤到凍晒d餸都未上.....結果餐飯食足兩個鐘!頭先講過, 碟蟶子同炒蜆係凍o既不特止, 只係有鹹味冇海鮮味, d牛排好靱, 雞柳淡而無味, 係個東江豆腐煲正常d!埋單果時仲拎o左第二檯d單俾我地, 唔check單就真係雙倍價錢, 咁普通o既餸菜, 埋單都要成四舊水!係好後悔帶班朋友去受罪, 以後一定唔會再幫襯!

大排檔一個，但又對住個海。(雖然個海幾污jo，不過夜晚唔覺既) 其實風味勝於一切~對得字個海，都係食海鮮嫁啦~點左椒鹽賴尿蝦同清蒸花蟹。賴尿蝦幾夠肉，幾新鮮。花蟹原隻蒸好鮮味。哎多左個菜，一碗賴粉，一支可樂，2個人咁就3百幾蚊了。以佢D海鮮既新鮮程度黎講，呢個價錢可以接受，會再幫襯~

記憶中,咁大個女好似第一次對住個海食飯,望住個天,紫紫紅紅好靚呀,正不過衛生就麻麻,因下午在酒家門外見到隻大老鼠,好嚇人,因為佢都唔驚人既.今餐晚餐,我地係將網到既黃魚,叫酒家幫我地加工,下午係好姐在家中煎咗一部分黎俾我地食,好味呀,咁新鮮既魚,緊係好味啦,鮮甜.而酒家幫我地將d魚拎去清蒸,味道當然係好食啦.另叫了 ....豉椒炒蜆 - 蜆肉唔會炒到唔見晒,隻隻係番到,但唔夠惹味,味道一般啦 鮮茄咕嚕肉 - 味道又係一般,但Mandy猛叫我試d蕃茄,佢話好新鮮喎,仲話今餐d咕嚕肉比下午個餐既咕嚕肉甜d,好味d.....椒鹽豬扒 - 大紅同Mandy話,醃得太醎,醎到有小小苦,到我食,第一啖都ok,但食到去喉嚨,真係有d苦呀.茄子煲同啫啫雞煲,好食....送飯最好整體黎講,可以一試,但係咪真係咁好食,我只覺一般啦.湯同油菜係好姐自己係街市另外買,唔駛酒家幫我地整,唔該晒好姐

假日去完大澳 , 跟住搭番快艇出東涌舊碼頭 ,又到晚飯時候 , 見檔野都幾有Feel , 緊係沖入去試下先 ,大熱天時 , 一坐低即刻 '' 兩嘉士佰 , 順手整個冰桶用下 , 野食睇下先叫 '' 隊番兩大杯降一降温之後 , 先來一個辣酒螺送下啤酒先 ,先款唔知叫咩螺 , 比較細隻 , 味道OK , 我通常了番3粒5粒出呢先 , 跟住先一次過放入口 , 再用匙更畢更汁飲下 , 正就正但係鹹左少少 ,跟住就再寫多個 '' 生燒牛仔骨 '' , 一上枱文倒好香 ,食落口好重 '' 美極 '' 味 , 又係鹹左 D , 兩個人最後成晚隊左7枝大啤 , 食左兩碟嘢 , 埋單約 $280 .

五月十四‧炎熱 約了朋友吃飯，原本已選好了去吃意大利菜，但臨門一腳，朋友駕了車出來，想去遠一點的地方。也好，最近心情很納悶，走遠一點散散心也好。想起東涌有這間海鮮店，景致一流，就來這裡。 也不要以為由市區來很遠，六時在中環開車，七時左右已經到達東涌市。再轉這裡的專車，不用個半鐘已經安坐在這裡。這裡有室內及室外的位置，是日早上雖然還是三十多度，但入夜晚風徐至，一點也不熱，那就當然坐室外了。座位任選，揀了碼頭較後的位置，人較少，也較舒適。 去看海鮮之前，先來啤酒。大獅威只賣10蚊一支，當然不作他選。臨海而坐，喝著冰凍大啤，雖然談的都是惱人事情，感覺卻甚寫意。去魚池看看，只幾條魚，蜆及螺陣容一般，蝦蟹也沒有什麼看頭。還好是二人來，不吃海鮮，其實也可以吃其他東西，就要了漁村小炒、豉油王吊桶、生炒骨及豆腐魚湯，最後來一碟豉油王炒麵，應該很不錯了。 菜色一道一道的由廚房拿來，路途是遙遠的，不過上檯的菜色，熱度還是足夠的。漁村小炒吃起來鹹香，是下酒良品。豉油王吊桶也炒得夠味，不錯的；生炒骨吃起來脆口，豆腐魚湯不算是十分的鮮甜味，最後的豉油王炒麵也十分入味，值得一試。 喝了四支啤酒，埋單三百，是寫意的

好少走到入東涌食飯，有朋友介紹入去食海鮮，仲講到又平又正，而且仲唔止海鮮好食，小菜一樣掂，咁又怎能唔去試呢~~趁住有朋友生日，一行五人走入去食，搭地鐵去到東涌地鐵站外，在紅色的士站隔離等專車接送到東涌碼頭，就有一間叫新華都海鮮酒家。門口只有個小小嘅地方擺咗大約十款海鮮，我哋去到就已經急不及待揀啦~~陳皮蒸鮑魚 ~ 大約有汽水罐面大，都只係$26一隻，落咗小小陳皮，有小小辟味之餘唔會搶鮑魚嘅鮮同甜味，鮑魚好新鮮好好蒜蓉粉絲蒸扇貝 ~ size 細鮑魚小小，$22一隻，落咗好多蒜頭同粉絲，望落去唔太夠色，但食落去好夠味，而且個汁茨份量剛剛好，食完唔會有好多汁椒鹽瀨尿蝦 ~ 肉都幾甜同新鮮，但無乜肉同略嫌貴清蒸肉蟹 ~ 比較普通，都算鮮味，好後悔無聽侍應介紹用羗蔥炒，應該會仲正豉椒炒蜆 ~ 份量足，好有鑊氣，豉椒味香濃，唔會殼多過肉，又係個茨汁埋得啱啱好東風螺 ~ 酒煮，酒味適中，肉爽味鮮，但貴羗蔥蠔 ~ 超水準之作！味道調教得好好，最最最正係個汁，可以炒完後汁包著蠔，食完隻碟無汁……我覺得真係好好好好好得，我會為佢而再幫襯至於小菜叫咗幾款，生炒骨係必選，味道有別於出面，但個汁同茨又係好正

今日係慶祝我老公同我老公家姐既生日，我地去左位於東涌舊碼頭，有無敵大海景、昂坪360再加埋日落，勁靚~~~~~~~~。衛生和服務都OK環境有啲似大排檔，不過，出菜超快有得食......正!!!（呢個地方係我老公喺Open Rice 呢度睇人地既食評發現既，講真丫唔係咁點會發現到呢個咁忍閉既地方呢)食左啲乜 ： 豉召聖子皇8隻差不多2斤幾(乾身左啲不過好鮮甜)、蒜蓉粉絲象拔蚌8隻(都幾大隻鮮甜)約斤幾好以$80/斤、薑蔥桶蠔(我至愛超正)無問價錢、豉召炒蜆(無沙)味道唔錯再來一個例牌$48/碟、豉油皇蝦碌1斤$200，乳鴿x2$40隻、椒鹽鮮魷很新鮮、菜遠炒牛肉、蒜茸油麥菜、枇杷豆腐。我地一共十人食左$1100。起抵...............

叫左一個羊腩煲, 一碟豉椒炒聖子, 一隻燒乳鴿, 京都骨同埋涼瓜魚羊腩煲連埋個爐一齊, 等佢熱左我地就食, 但開頭食味道很淡到後來先夠味, 原來係因為要等佢煮耐啲, 咁啲肉先會淋啲同入味~加埋腐乳, 其實都唔錯, 仲有菜跟埋~至於燒乳鴿同京都骨都只係普通, 肉仲有啲"鞋"~涼瓜魚算ok~但我唔食涼瓜, 剩係個魚都幾好味既~豉椒炒聖子也不錯...但好似唔夠熱...服務唔錯, 食完之後有車直接送到我屋企樓下(我住東涌)佢仲話下次再黎打個電話比佢就得, 佢會揸車黎樓下接人~

原來在東涌舊碼頭有一間海鮮飯店，位置隱閉，在東涌馬灣涌村的盡頭，期實離市中心又不太遠，有露天位置，也有室內位置，建議在戶外進餐，對住東涌舊碼頭和無敵大海景加昂坪360吊車，環境已是一流了。衛生和服務都是舊式大排檔式，少了機械式禮貌多了人情味，今餐食了555，有一條牙衣魚，加少許海鮮，價錢平過鯉魚門和流浮山的海鮮飯館！白灼花螺、蒜蓉粉絲帶子很新鮮，椒鹽鮮魷很新鮮，炸醬很薄，美味，牙衣魚肉質很滑，烝得剛剛熟，加一個梅菜扣肉和菜心，小菜味雖然味度一般，但很大碟，不算太貴一個菜，大約四十多元一個菜，大件祗食，來這裏食野，最重要的還是日落碼頭靚景，香港很少地方有這樣的美景了，吹住海風吃海鮮，天氣好的話真的是償心樂事。http://icuteee.mysinablog.com/index.php?op=ViewArticle&articleId=1437061

係海邊小村的海鮮酒家, 原來只係離東涌市中心幾分鐘車程, 的確幾有風味.一行6人叫咗酒煮花螺, 炒蟹, 蟶子, 扇貝, 同埋幾個小菜.嘢食中規中矩, 好快上枱! 令人懷疑唔知係咪自己揀嗰d海鮮. 不過海鮮幾新鮮, 鑊氣就可以啦!花螺叫咗小辣, 但都有d辣味, 啱啱好wo.炒蟹炒得幾乾身.蟶子&扇貝, 普普通通.小菜都有幾多款, 份量都幾多呀!有專車接送, 地點仲係自己揀, 又唔收加一, 幾抵wo!

與一班朋友到這酒家吃晚飯, 一來到已經聞到濃烈的豬屎味, 可能是因這酒家近舊碼頭. 點了餸, 但其中二碟認真貨不對版. 明明叫了京都骨, 卻來了一碟洋蔥茄汁豬扒, 叫了鹽焗雞,卻來了一碟似炸子雞的"焗雞"並伴淮鹽,分明就是炸子雞,話是半隻雞,但實際size一定不足半隻, 仲要買成$90. 梗係要求退貨, 但侍應的態度非常惡劣, 說他們的鹽焗雞與別不同, 又話以為我們知(唔係呀, 你唔講邊個知,一般都以為鹽焗雞是那種類貎似白切雞,但是用鹽焗煮,點沙羗粉個種) 本來個老闆話可以cancel, 誰不知另一個侍應(想是老闆娘)又走出來話係咁, 一定要我們要並放了碟雞係張枱, 不肯拿走, 有冇攪錯, 咁嘅服務態度惦得. 到最後只要有硬食.可能這酒家主要做海鮮,其次做小菜,所以小菜的質素欠佳. 但海鮮的價錢也不抵食, 大部份都是冰鮮,而且價錢仲貴過一般的海鮮酒家. 實在食不過.

去朋友映灣園屋企打牌, 打到7點幾, 朋友就call華都免費車到華都食晚飯, 我0地叫左椒鹽賴尿蝦, 豉椒聖子, 辣酒煮花螺, 同蒜蓉蒸扇貝, 味道一般, 不是太羞, 也不是太好, 不過可能是聖誕關係, 太熱鬧, 感染一些小動物湊熱鬧, 老鼠仔都養得肥, 各位姊妹小心花容失色.

我平日上學係在東涌的, 學校的飯盒十分難食。所以我校有得多人都會訂飯盒(我都係)最多人訂的是新華都。因為它一個外賣飯盒好平又大盒!!(18元一個飯盒連一個飲品)我通想都不能食完成盒飯。飯盒的種類有好多, 機本可以說出都有。所以在者東涌來講, 新華都以經很平了!!!

今年重陽節同一班朋友去行山，由大澳行入東涌。聽一位住東涌既朋友講東涌碼頭有間類似大排檔的酒家食海鮮幾好味，於是一行16人夜晚去試。先黎每人一隻蒜蓉蒸扇貝，o的扇貝都幾大隻，好鮮甜。面頭的粉絲及蒜蓉份量岩岩好，味道唔會過咸，正！跟住有椒鹽鮮魷，嘩，魷魚o的肉又脆又鮮，而且炸得剛剛好，唔會過油，如果你會飲酒的話，呢個餸用黎送啤酒一流。然後有辣酒煮花螺，十個正！我個人都幾食得辣，覺得好惹味，有o的唔食得辣的朋友都食到讚不絕口，食完一隻又一隻。o的汁辣中帶鮮，我地個個都用黎撈飯，呢個係誠意推介。我地嗌左o的海蝦，可能只得1斤，結果上碟時發現開左邊用蒜蓉蒸，我個人覺得徙左o的蝦，如果嗌得足夠份量做白灼蝦應該會幾好。海鮮類的最後一碟餸係豉椒炒蜆，只係不過不失，無乜驚喜。除左海鮮，我地仲嗌左一個豆豉鯪魚炒油麥菜，ok住家，不過多左o的油；原本叫左個沙爹金菇肥牛煲，但因為肥牛賣晒而轉為鮮牛肉。雖然牛肉唔靭，但味道真係唔及肥牛；尾聲encore 左一碟西芹雞肉，認真麻麻，大家都認為阿媽炒的仲好味。整體黎講海鮮幾得，但小菜就一般喇。題外話，阿姐係唔知咩係zero可樂，你要同佢講你想要黑色可樂！我地嗌左汽水

本人居於東涌，自2004年開始，一向也有幫襯此食肆。開初的食物質素實不錯；然而在2006年開始，可能亦隨此食肆生意上軌道，本人發現食物質素卻是開始下降，無論味道、鮮味等遜色於前，碟頭更是縮細再縮水﹗不過，居於東涌的朋友便知道，實在沒有什麼較平的地方可以考慮，再者，只要服務和食物不是太離譜，本人也會樂於支持。只可惜，本人相信一定一定不會再幫襯此食肆﹗原因是五一假期那天，本人與家人在此食肆食晚飯，對於以下事情實在不能接受：1. 每道食物分隔起碼10分鐘才上，並竟然是凍上- 本人叫了鼓椒聖子、蜆、吊桶三樣海鮮，全部均是凍上；相信是在廚房火氣不夠，或是攤了太久才給客人；2. 食物味道面目全非，毫不鮮、毫不美味3. 侍應姐姐態度惡劣- 本人一到此食肆，見到人頭湧湧已心知不妙，各侍應做到踢哂腳、面紅耳熱，故黑口黑面工作，本人亦甚為諒解；然而，當本人對聖子熟及熱私程度有所質疑時(因上第四碟也是凍的)，侍應竟然叫本人「唔熱就倒左佢啦﹗」，如此服務質素，真是聞所未聞；至於小菜的單落錯，亦是不在話下，本人已認為是小問題了全程只有5個很簡單的小菜，前4度菜結果要等1.5小時才全上，最後1味因單錯了而取消，服