萬發海鮮火鍋菜館

營業中

休息中

唔睇返Openrice都唔知呢個係新開既，可能都係剛剛轉左手啦。尋日公眾假期出開來旺角買野，行行下見落雨又有D餓就諗住入來食個下午茶。估唔到會多人多成咁，好彩有阿姐店員幫我地搵到兩個搭枱位。見到好多人食燒味粉麵，都應該唔差得去邊既。不過周圍見到都係大圓枱，如果想坐得舒服D就都係要去返大X樂個D。點左餐之後仲要畀阿姐又叫掉位，因為有一班人6個一齊黎想一齊坐。剛好個燒鴨燒肉瀨就黎啦。有D可惜叫左瀨粉但黎左米粉，不過女友話咪要求換啦，拿拿臨食完就算。但個燒味又真係唔錯，燒肉皮好香脆，又大舊、膏又夠甘香! 個燒鴨剛好佢畀左隻肶我地，有肉而且食落佢有陣煙燻味好香，應該唔係一段燒咁簡單! 唔怪得咁多人都叫燒味。我地除左叫左個燒味粉之外，仲叫左個雪山西多餐。連餐飲都係20蚊，相當經濟。而且佢上枱時炸得剛好，其實係一舊大多士切成4粒再炸，變左好似4塊迷你西多咁，容易切同食好多! 中間個花生餡都好食，而且D麵包炸起來都仲好鬆軟，好食!兩個餐加埋轉凍飲都係69蚊，抵就真係幾抵，係坐得迫少少，但味道係唔錯既! 下次有機會可以再試下燒味飯!

同事 gathering，專人揀咗呢間大角咀嘅萬發。16個人叫咗個12人餐，唔駛加嘢，就知道呢度啲份量大得驚人。一開飯時有個小插曲，就係菜單上明明叫咗乳豬全體，但嚟到係咁嘅樣。經過交涉後就變番一隻乳豬全體。乳豬話係即燒，有啲位係幾鬆脆，但有啲位就奀到咬唔到。薯仔牛肉粒同埋豉油皇中蝦都係呢度名菜，但我覺得啲美極味太重，搶晒食物啲鮮味。豉油雞都係，雞皮比一般嘅燒雞黑好多。 不過隻雞都夠嫩滑。西蘭花斑塊，夠曬鑊氣。豆腐火腩煲，啲菜喺最快食晒，留返晒啲骨腩喺度。炒蟹石頭飯我覺得最好食，因為夠熱，料都夠。另外餐牌上係鮑汁伊麵，由於賣晒， 就變咗豉油王炒麵。阿姐就送多6舊桂花糕當係補償。

一行16人在菜館享用晚膳，叫左個12人餐，叫果陣仲驚唔夠食，最後反而份量大到食唔晒。乳豬全體脆卜卜，海中蝦炸到可以連殼都食埋，龍𧄌兩味好有魚味，薯仔牛肉粒薯仔味道淡淡地牛肉偏鹹，一齊食就剛好。胡椒豬肚雞湯，湯夠辣之餘又好有雞味。薑沖炒蟹有3隻，啖啖肉，食完一件再食一件。石頭飯炒到d飯一粒粒，可惜我本人唔鐘意食飯焦，d同事就話好好味。鼓油王炒面炒到個面鬆晒，食果陣都feel到大廚煮時好用心炒。豉油全雞不過不失。桂花糕食時有啖啖清香。

我是住附近的街坊，萬發餸菜質素有保證，價錢偏貴。午市小菜炒粉麵飯大概$50左右的優惠時段，是一個好的選擇。但是午餐時段的收銀阿姐態度十分之差。成日黑口黑面。同佢打招呼都唔理人… 我都有問過佢係唔係唔舒服。想關心下佢。之後仲俾佢話！真係冇乜禮貌。同佢嗰啲同事反映過之後好似連經理同事都驚左佢。成日經過都好想入去食但係一諗到又要受氣就打消念頭，所以我近期兩三個月都越來越少去了⋯⋯唔知佢嘅老細點睇呢？係咪得我有呢個經驗呢？

今晚同fd子們 打完cooking mama 就去附近新開既萬發食晚飯 🥣 3男4女既組合 叫左4道菜 1. 薯仔牛柳粒 ～ 個薯仔甜甜香香 牛柳粒好入味又唔乾👍🏻👍🏻👍🏻2. 韮菜炒腰果 ～ 送飯一流 腰果仲好脆口3. 甜酸咕嚕肉 ～ 每舊豬肉都好外脆內軟 又係送飯之選👍🏻👍🏻👍🏻4. 蒜頭炒菜心 ～ 一般 對我黎講 菜炒得有點硬 但挻身 7個大人 叫四碟「食送」都夠晒飽 抵食😝👍🏻

有同學自北京回來約食飯， 數數最近幾次都係打邊爐，今次攪攪新意思去食小炒。呢位同學真係出心出力，自己攪聚會之餘仲自己搵埋地方添，佢係網度搵到呢間萬發，同我嘅飯堂火鍋店來發館係同系嘅，所以我就知靠得住。菜館嘅環境真係好街坊，所以如果你諗住搵個靚靚地方食飯相聚的話，你度就真係唔啱你喇。但我地一向都係以食為先，最緊要好食，地方罨耷啲都冇所謂！😉嚟之前我都有上網睇下佢有咩必點菜式嘅，再禮貌地詢問一下同學(話哂過門都係客，點都要俾佢點菜嘅🤭) 。其他同學話癈事諗，等我地兩個發板，於是我地就點左七餸一湯：先嚟個胡椒豬肚雞湯， 成隻豬肚包住隻雞煲，上枱店員先幫你剪細再滾熱🤩個湯胡椒味夠哂濃，湯料足，再加埋紅棗，好暖胃喎，人地話三伏天要進補，唔知呢個湯算唔算呢😝。睇開我啲文都知我超鍾意食有咸蛋嘅菜式，咁啱我呢位同學都係，所以諗都唔諗就點左黃金炒大蝦，咸蛋味夠濃，而且包得好足，冇散哂，好味。另外呢度聽講最出名有味薯仔牛柳粒，我覺得個牛柳雖然軟熟但就冇乜牛味，反而個薯仔粒索哂啲醬汁，好好味呀嚟到呢間海鮮菜館唔點海鮮好似唔係幾好意思，但今晚我地真係諗住食小炒嘛😝，不過少少地都點左一份旬殼魚三寶，有一條炸旬殼

夜晚去咗大角咀食中餐，因為好耐冇食燒味，所以突然間想食燒鵝！萬發係大角咀食海鮮同燒味比較出名少少，所以就揀咗呢間~萬發外面有得擺車，所以都幾方便泊車，不過就要成日睇住，本身餐廳都係落地式玻璃，所以就比較方便睇車我哋兩個人，所以揀咗張細枱，佢啱啱有推廣set!!! 叫咗蟹同埋半隻燒鵝都係大概三百幾，所以都幾抵係等餸期間，有花生食，但係我就覺得好難食！下次可以直情叫佢拎走！因為唔知係咩黎嘅~ 可能係比想飲酒嘅人送酒食等咗大概5分鐘左右，就有得食燒鵝 我哋叫咗一碗飯，share食其實都係諗住送下飯！ 而燒鵝本身有啲肥， 皮下面全部都係肥膏，搞到我全部都唔食皮 （我最鍾意係食皮，因為最好食）我朋友就話超級好味佢話燒鵝本身就係咁，話好唔錯我就比較鍾意食蟹仲要係肥蟹，蟹肉超級多，我估隻蟹算係幾大隻，特別係蟹鉗，最好味，啖啖肉，啲蟹殼煮到一早裂開，唔使自己用鉗整，好細心同方便環境方面，都算幾闊落，上菜速度都好快！價錢都唔貴，係小菜價錢比較貴我哋兩個人就食咗四百幾

一入座幾個職員輪流黎sell你食海鮮，不過今日係為左薯仔牛柳粒而黎，所以無叫海鮮，一行4人只係叫左5個家常小菜，但之後就黎料啦，出菜速度極慢，呆坐半個鐘先上得2碟菜，等左45分鐘催佢地出菜，叫左2個經理幫手追單，但可以完全唔彩你，結果等左超過1粒鐘啲小菜都未黎齊要cut單！最嬲係見到隔離幾枱遲過我地入座既啲海鮮呀小菜呀上得勁快！呢度係咪唔歡迎唔叫海鮮既食客？係你就入座前講明呀嘛，最後埋單$490食左咁多次萬發菜館，第一次食到成肚火好耐無寫食評，今次嬲到要login寫！已永久blacklist

今日呀爸生日, 本來我提議去酒家食半席宴, 但呀爸話反而想去大角咀嗰間萬發海鮮火鍋酒家食飯, 話D小菜好正!!嘩, 入到酒家, 估吾到好多食客, 就咁睇酒家D餸菜應該都幾好食！！我哋叫左一碟例牌乳豬, 但係都已經大大碟, 大大件, 我估最少有成十幾件, 份量十足, 入口皮脆肉厚, 啖啖肉！！跟住叫左個出名嘅薯仔牛柳粒, 真係好有驚喜, 牛柳粒香口鬆軟, 好有牛味, 薯仔香甜, 爽口！！再嚟雪裡紅芥蘭, 芥蘭爽脆, 如果單食雪菜會有D鹹, 但加埋芥蘭食卻剛剛好！！仲叫左金沙海中蝦！！每隻中蝦都滿舖蛋黃, 所以入口有濃郁嘅蛋黃香味, 中蝦爽口！！啫啫雞煲就ok啦！！最後叫嘅萬發石頭飯都好好味, 好足料, 仲係粒粒飯, 炒得好香！！精彩嘅生日宴！！

一個晚上，又是個兩口子撐檯腳吃晚飯的日子，來到這間地方偌大，多是中年男人幫襯，一邊大啖啤酒，一邊高談闊論的中菜小館，點來一碟「海蜇熏蹄」、一碟例牌「乳豬」，再加多個「萬發小炒皇」做晚餐。這頓中菜晚餐整體來說只是普通而已，「海蜇熏蹄」份量雖多，但那白醋汁太甜，我雖還能接受，老婆仔卻不太習慣。 「萬發小炒皇」用料與其他中菜小館的無大分別，都是韮菜花、腰果、蝦乾、魷魚等等，鑊氣甚足，一上桌，香氣便撲鼻而來，可惜這小炒皇的調味偏鹹，吃得多了便難免口渴。「例牌乳豬」本來還不錯，乳豬皮薄而脆，肥膏也不多，可惜那些瘦肉不夠嫩滑，也難免讓我有在吃中豬，不是乳豬的感覺。 其實，「萬發」在中菜小館中也算是薄有名氣的一間，可是這晚所吃，卻只是強差人意，談不上出色呢！

不只一次，經常都會去，因為啲厨房係幾好，但每次都因為呢個人啲態度令你唔想再去，今次有朋友從外地來，諗著同佢去食餐飯，去到門口那時6:40，同呢位大媽講2位，佢淨係回我一句“2位無！”仲要好似我係佢殺父仇人！我再問幾點會有？佢話“無，最快8.點後”其間只可以講見到佢就唔想食，我朋友仲問“乜咁架，仲有人會嚟嘅？”你間酒家有幾好食都好，咁樣不斷趕客，始終都會趕晒！

呢間小菜館在大角咀一帶非常出名，網上亦有很多好評，今日終於有機會，緊要試下佢。胡椒豬肚雞湯，其實幾好味，個豬肚洗得好乾淨，一d內臟味都冇，咬起上㴝亦好爽口，不過湯面太多油。脆皮乳豬，果皮燒得好脆，味道亦ok,但食既時侯冇炭香味。薯仔牛柳粒，薯仔應該係炸完先炒，所以好香，味道有D似炸薯角，牛柳粒亦好滑。雪裡紅，其實係芥蘭煲，要趁熱食，凍左D芥蘭有D苦。金莎鮮魷，個外層好香脆，但D魷魚冇味既，所以都係一般。炸鯪魚球，唔脆，仲有D淋，所以好一般。萬發石頭飯，個飯係甜既，有少少怪。其他餸，都做到standard水準，冇特別。整體感覺係佢太出名，expectation太高，所以食完有D失望。

日一行8人黎咗大角咀萬發食晚飯，中午就食得多，貪佢夠平好食又免加一，晚市就真係第一次。8人一共叫咗8道菜，印象最深既係魚翅雞煲，職員先俾咗碟魚翅我地睇，跟住就在旁掉咗入窩度即場煮，感覺都幾新鮮。煮好後，職員分咗8碗俾我地，大家都覺得魚翅好有魚翅味，雞肉都好鮮甜，湯都好夠濃厚。覺得魚翅雞湯係必食。另外仲有條魚，魚好大條，好滑，連我本身唔食魚既都忍唔住夾完又夾，覺得條魚好鮮甜，無我最怕既腥味。我個人好鐘意粟子雞煲，雞煲好香口，唔肥，粟子都好甜，配上瑤柱蛋白飯一齊食岩岩好，忍唔住食咗兩三碗飯。椒鹽鮮魷都覺得好好食，好夠獲氣。下次經過大角咀都會再黎呢間食野，平靚正黎形容。

早早已經聽聞過呢度好出名，朋友即使住到老遠都會特登搭車過嚟食。呢次就係朋友介紹我地一眾好友過嚟食啦。我哋五個人最後埋單七百幾蚊，其實都唔算太貴，最緊要係食到好味嘅嘢， 食物質素比起屋企附近嘅酒樓好，真係不得之了！初時朋友推介我哋食嘅係薯仔牛柳粒，本身我都唔明點解薯仔牛柳會係名菜，但食落就完全覺得好食到爆登！薯仔外脆內軟，估唔到都可以有呢種口感，仲落咗小小黑椒又甜又辣，好正！薯仔仲好食過牛柳粒，曾經有諗住為咗呢一個薯仔牛柳粒，特登搭一個鐘頭車入嚟買外賣返屋企食，後尾都係放棄左，因為啱啱炒起應該先係最好味嘅一刻！堂食先係王道！另外仲試咗胡椒豬肚湯，呢煲湯好大煲，我哋每個人起碼飲咗兩至三碗先飲得晒， 都好真材實料，啲料都落得好足下，不過我就嫌佢咸得滯落少咗啲鹽會好好多因為太好味，所以掛住食都冇影相，另外叫咗啲咩餸都唔係好記得左，回憶返起黎， 淨係記得個薯仔牛柳粒！

晚餐五個人食 平日嘅夜晚都唔使排隊嘅 星期六日呢就通常都要訂位架啦 附近乜都有地方泊車有表位嘅 好咁講下今晚食咗乜先1. 薯仔牛柳粒 呢個真係無得輸 牛柳夠林煮得啱啱好又唔會過老 薯仔粒又炸得夠脆 外脆內軟 味道又啱啱好飲酒嘅朋友送酒一流 唔飲酒嘅朋友送飯都好好食2. 芝士龍蝦伊麵 佢嘅一份龍蝦伊面其實有成隻龍蝦喺度 芝士伊麵底芝士夠濃郁 龍蝦肉又多好甜 3. 燒鵝例牌 其實你行過門口都會見到一隻隻肥嘟嘟嘅燒鵝喺度架啦 不過呢排真係唔Hea 既 皮脆肉嫩 唔好嘅地方呢就係皮下脂肪比較多內籠比較鹹 4. 海鮮雜菜煲 每次叫呢個餸都keep到一上菜果下真係好靚海鮮夠新鮮湯夠濃郁 如果要食菜嘅朋友呢個真係推介