阿太車仔麵 (已結業)

疫情期間八折出糧，衣食行都要就住就住，好彩俾我搵到豐儉由人既你......阿太車仔麵。外賣自取有9折，河粉唔會煮得好淋，湯同麵可以分開帶走，拎到返公司冇斷開一段段，好食！飽肚又唔貴，陪我渡難關😅每次都會揀飽肚既鮮牛肉，好滑好有牛味。滷水雞中翼既雞翼好入味，滷水係秘製，每次都會飲哂d湯。蘿蔔煮得好淋好甜，中和肉帶給我既飽滯感覺。有時換下口味會食佢地既豬大腸，帶小小肥膏，簡直人間美食。魷魚雞翼尖肉燥都係唔錯既選擇。用料講究，煮有心機，滿滿一大碗，給我滿滿能量再OT。

前幾日去咗呢間位於牛頭角嘅阿太車仔麵，因為之前都冇食過所以都係諗住去試下，但又估唔到又真係有驚喜😋👍首先第一樣有驚喜嘅嘢係佢嗰到食物嘅份量都好大份應該比普遍嘅茶餐廳大份，用呢個價錢食到咁大份嘅飯係真係物超所值！而味道又唔差，另一樣要讚嘅係佢店內嘅衛生做得唔錯，相信而家疫情個個都好怕外出食飯，所以要食得安心店內衛生都要做得好，而呢個就冇令我要擔心衛生嘅問題，食得相當放心😊👍之後都會再幫襯多啲！

服務非常差， 以前都唔係咁樣 ，入單自己入錯又入溜，我好禮貌問吓係唔係落漏單， 我有寫但漏咗，飲品都錯咗，店員好似驚死我鬧佢，咁而家幫你解決問題未得囉! 講到好似係我錯 ，我應該同佢講返對唔住! 仲有寫明要多蔥， 一粒都冇 ，唔緊要 ，店員聽到我講嘢即時同我講今日冇蔥到喎， 咁你上菜嘅時候係唔係應該要同我講一聲， 你根本就冇尊重過人哋落乜嘢order， 當時成間店裏面人數根本唔超過七個人， 仲要店裏寫香港人加油 ，唔知你係咩店， 服務咁差 ，就算黄店都唔會再幫襯，我懷疑你哋係偽黄!

平時有來食開車仔麵，依家呢個時勢，見佢哋都要座位減半，做少咗好多生意，小店子就更加艱難呀！為咗支持小店，返工前特登行過嚟買早餐！果然冇令我失望，反而仲有啲驚喜添啊！呢個阿太肉碎炒米粉真係好好味呀！不過打開盒嘅時候，外貌唔太理想..... 原來係要將炒蛋同肉碎撈勻，就真係好好味！會繼續支持㗎！下次再試吓其他～ 平時早餐來來去去都係嗰幾款，覺得佢哋呢度都算多少少選擇。仲有呢度嘅店員姐姐都好有禮貌，值得讚賞！

今日係觀塘同牛頭角附近搵野食，經過門口見到呢間餐廳唔止有文宣、仲有球迷減價優惠，雖然我冇著波衫去拎唔到優惠，但見價錢都好平所以都入左去食。朝早11點幾，仲有早餐賣，我哋就叫左2份早餐。A餐 沙爹牛肉湯麵（$29）可以揀牛油方包或厚牛油多士跟炒蛋、火腿、餐肉、腸仔，任選2款。湯麵都可以免費轉米粉、河粉、通粉、銀針粉。好多配搭呀，我地揀左厚多士、炒蛋、腸仔同轉米線。G餐 極上黑松露蘑菇炒蛋餐（$29）呢個餐嘅主食可以揀沙爹牛肉、五香肉丁、雪菜肉碎、漢堡扒。餐包一樣有方包同厚多士揀。配料就係黑松露蘑菇炒蛋。我地都係揀返沙爹牛肉同厚多士呢間啲份量又大又好味，keep返單下次再食仲可以當9折添！

我發現左一間車仔面既魷魚超級超級好食😎。呢間阿太車仔面既醬汁魷魚有D辣，佢攞D魷魚去炆，炆到入晒味，而個少少辣將個魷魚既味道再進一步昇華，就好似漏左一片既puzzle咁，個辣就將個洞補番上去，成件事就變我好完美，真係好鬼正🤤🤤。除左個完美魷魚之外，我order左米線生菜同豬頸肉，佢個豬頸肉又係好鬼好食，個調味調得好好，攞去襯個面咸度啱啱好，又唔會肥膩，又爽，可以話係好高質，而且面既份量都幾大份，可以話食到飽飽，$36食到咁飽就好抵食，我推薦呢間阿太車仔面比各位弟兄姐妹。

最近黎開牛頭角做野，朋友就推介左呢間專食車仔麵嘅鋪頭話啲款式都幾多， 而且份量非常十足所以今日晏晝就同左朋友試吓，環境都幾舒服_呢度除咗車仔麵都有幾款懷舊小食我哋就叫咗長洲大魚旦同滷水雞髀🍗，味道都非常入味，滷水雞髀夠大隻_朋友就叫咗個套餐，雞扒肉燥蛋飯配嘢飲$51，雞扒份量都幾充足，食落去頗為有口感，朋友就話呢個肉燥蛋飯都幾好味，特製醬汁配上飯非常入味，這裏也有其他款式的肉燥飯可供選擇，大家下次嚟到牛頭角嘅時候不妨黎試吓

4點鐘原來諗住食個下午茶，但叫叫下飽到連夜晚都食唔落，真係兩餐變一餐，慳埋晚飯錢😂有三樣餸係我平時食車仔麵必點嘅🤪 魚蛋、蘿蔔、豬紅。今次我見點餐紙有個👍🏻喺醬汁魷魚🦑（辣）隔離，就想試埋佢，總共4餸一麵 $55 加炸花枝丸（4粒）$20 埋單$75😉蘿蔔煮得好腍，好入味🤤 魷魚平時好難入味，都係食佢個口感，但呢個辣汁真係辣得過癮，令到成個湯底都陣陣辣面，好正🤣 豬紅唔會一夾就散，但又唔會好似磚頭🧱咁硬，滑滑地，唔錯叫炸花枝丸嗰陣都有一刻驚會好油膩，但擔心都多餘，一啲都唔油，而且有啲墨魚粒，口感彈牙🥰

今日去左轉牛頭角，見到有間車仔面好多人食，咁啱我未食晏，我就行左入去坐左陣。我見到佢都有幾多野係個Menu到，四送面又唔貴，就叫左幼面,豬紅、蘿白、午餐肉同魚肉春卷。我好鐘意個魚肉春卷😆，好彈牙、好香魚既味道又唔腥，可以話係我食過既魚肉春卷入面最好食既。而個豬紅好滑口好嫩，一啲都唔臭唔腥，係超乎我想像既豬紅。就單單係呢兩樣野就已經令我愛上左呢間阿太車仔面😍。如果下次有機會再去牛頭角既話我會再黎食多次，我想試下叫薯餅配車仔面既感覺。😎

最近去咗牛頭角搵朋友，無意中發現左一間超級好食既車仔面！大大碗配料足又多款揀，最緊要就係個價錢唔貴，44蚊四餸車仔面而家真係唔知要係邊到搵😑。我就嗌左油面配牛柏葉、蘿蔔、豬頸肉同埋我最鍾意既瑞士汁雞翼，我係到要讚佢既油麵，啲麵有咬口有韌勁，面最緊要就係要有咬口而唔會太硬✊🏻瑞士雞翼既汁調到好好，唔會好鹹，成日係街食嗰啲都會整得太重口味，呢間唔會就啱啱好。最令我驚喜既係佢個豬頸肉，肥而不膩，又爽又脆，超好食。呢間平平無奇既舖頭係估唔到既好食，推薦比大家!👍🏻

今日我係牛頭角發現左一間超級好食既車仔面叫阿太車仔面。大大碗配料足又多款揀，最緊要就係個價錢唔貴，44蚊四送車仔面而家真係唔知要係邊到搵😑。我就嗌左油面配牛柏葉、蘿蔔、豬頸肉同埋我最鍾意既瑞士汁雞翼，我係到要讚佢既油面，啲面有咬口有韌勁，面最緊要就係要有咬口而唔會太硬，咁樣食落先會有「癮」✊🏻。瑞士雞翼既汁搞到好好，唔會好咸，成日係街丁食都會整得好咸，呢間唔會。另外最令我驚喜既係佢個豬頸肉，肥而不膩，又爽又脆，超好食。呢間平平無奇既舖頭係估唔到既好食，推比大家!👍🏻

一向都鍾意食車仔麵, 今次去開牛頭角見到有車仔麵店, 係門口望下覺得唔錯就入去, 三餸麵（$38）, 麵仲可以轉辛辣麵, 唔駛另加錢, 但車仔麵我一向都配油麵黎食,叫左個咖喱魷魚, 瑞士雞中翼, 甜酸齋, 咖喱魷魚好入味但唔會太辣, 瑞士雞中翼都一樣係好味, 但偏咸少少,個甜酸齋就麻麻, 湯底幾濃, 面都比得幾多, 整體黎講, 抵食又好味, 另外呢間鋪頭仲有一個特頭就係可以叫台式小食, 我叫左個台式鹽酥雞, 好香,好脆, 如果下幾去番都會再食

呢排因為人事調動關係，要去一個我十年都無踏足嘅地方 — 牛頭角，太耐無去嘅關係都唔知附近有咩好食😣 諗住搵間餐廳求其填包個肚就得，匆忙到連相都無諗住影🙈原本都無期望，快手食完快手走，點知誤打誤撞俾我食到個值得推介嘅五寶麵，加野飲都係$43 超抵五寶麵由滷水蛋、生菜🥬、滷水雞翼、 豬皮同蘿蔔組成🥢豬皮爽口彈牙，有咬口👍🏻 滷水雞翼夠入味，但又唔會滷得太耐甩皮甩骨，正滷水蛋一開二，滷得入味又足料😋蘿蔔有少少硬，可能係新加入去關係，未完全腍曬，但都可接受🙂總結 $43嚟講性價比高，令我平凡嘅一日有小驚喜😛

經過牛頭角嗰邊搵野食，因為食飯budget唔係好多，所以見到呢間啲野算係幾平幾抵，就入咗去試下。間餐廳雖然係賣車仔麵，不過佢啲裝修一啲都唔舊，仲要帶少少日式風😍環境真係十分之討喜，港女擺pose影相打卡一流❤️當時一個人食，所以去咗對住牆嘅位置坐。我叫咗碗腩肉肥牛蘿蔔米粉，湯底個腩汁好夠味，腩肉都好好食，唯獨係肥牛肥咗少少(可能係我唔好彩😂)。不過最關鍵嘅都係加佢嗰隻辣醬。個辣醬真心好食，一定要加落去！如果有下次的話一定會嚟encore!

呢排天氣又凍返啲，係觀塘行街經過就決定食返碗車仔麵。我就叫左個三送麵，價錢都係$38，幾抵而且份量都好大碗！特別嘅位係呢間車仔麵有平時好少見嘅辛辣麵同埋XO辣醬肉燥撈麵，平時食開嘅車仔麵檔都好少見有呢啲可以叫，不過我都係叫返我最鍾意嘅油麵，下次有機會都可以再試下其他！另外我叫左三個送包括醬汁辣魷魚，佢啲醬汁勁入味！而且魷魚又彈牙！另外就再叫多個豬紅同埋蘿蔔，佢嘅豬紅一樣都係好入味！蘿蔔就好清甜，唔會話煮到好老好淋咁！呢個價錢嘅車仔麵黎講可以話係水準之上，而且佢嘅裝修都好特別，好似日本啲居酒屋咁，有幾張高凳同埋每張枱之間都唔會話好近，好逼。如果經過觀塘呢邊，有機會嘅話都可以試下！係一間較特別嘅車仔麵檔！