靠得住粥麵小館 (克街)

營業中

休息中

少尐膽量都唔敢叫呢個名冷雨夜黎到靠得住短短一個鐘入面好似所有入黎既食客都係熟客幾乎個個同老闆好多偈咁喎即管睇下有幾靠得住招牌拆肉泥魚孟粥號稱每日只售一鍋雖然阿姐叫住小心有細骨但真係拆得好仔細全程只係食到一條幼骨魚肉拆得比較散但保持到魚味見住魚肉滲出淡淡黃色既油真係好正食到尾好似有尐魚湯沉底即係真係有魚湯做粥底架咸肉糭方面老闆見人就推薦唔算好出色不過唔係糊埋一舊咁已經算唔錯肥豬肉同鹹蛋比例都好ok艇仔粥好多料好似menu入面有既野樣樣都有尐仲幾match最後加左白灼薑蔥牛肉併黑柏葉成六十蚊都幾貴牛肉落得太多梳化粉喇黑葉就好爽夾埋甜豉油幾好總體黎講都無辜負到佢既大名keep住食粥就比較好不過唔知係咪因為佢堅持無味精(真的)就認為多數人食粥都唔駛飲水呢?問阿姐要杯水佢都仲要行返轉頭問「一杯定兩杯呀?」返屋企既時候做個小實驗睇唔清前面既路見步行步反而好有踏實既感覺好靠得住咁要咁多遠景做乜?

之前行過'靠得住靚粥',見到佢地標榜魚湯做o既粥底,一路都想試下.. 上星期終於試o左鹹肉糉 - 足料,口感唔錯,但係無乜特別豬潤白鱔粥- 上檯個時真係見到有魚湯浮面! 豬潤好滑,唔係過熟. 白鱔好彈牙,唔腥. 粥底夠火夠綿會返去的

話時話我出左名"路盲",但好在一有好野食0既地方,我就點都識去,下午去完再興,行到咁上0下,又到晚飯時間,就去左話用魚湯離餚粥底0既靠得住;黃沙潤泥鯭粥(去骨)(好似$30)----黃沙潤切得厚薄剛好,又夠大塊很有口感但就無嘜味,亦唔係幾夠黃沙,不過講真,自己買都要撞手神,魚就熟左D,而粥底就幾HOME-MADE,因為無味精所以會淡少少,魚湯味亦唔算好突出! 鮮鯇魚皮($35)-----凍凍的,非常爽脆,與椒絲蔥絲夾住一起吃,我鍾意!

利東街重建，呢度就舊舖搬新舖。這裡是杏花樓的舊址，第一日開張就來幫襯，門口有很多花籃也未移走。餐牌都是以粥為主，不過而家仲加埋魚湯，直頭將個粥底搬上面來賣，當然如果做得好，是長賣長有的一條產品線。當然叫碗招牌黃沙潤粥，加碟白灼魚皮。雖然無咩人客，不過碗黃沙潤粥都要等左一輪至有得食，可見烹煮須時。碗粥賣相不錯，幾片豬潤大大塊的浸在粥面。吃一片豬潤，雖然不算厚，但口感非常好，內裡有點溶化的感覺，味道鮮甜又濃郁，內裡雖然有一點點的筋膜，但肯定是新鮮貨色，而豬潤的厚薄及烹調時間拿握得非常好，相當之有水準。一碗粥有五大片豬潤，吃過夠本；粥底仍然是以魚湯做膽，所以不會很綿，是偏稀的。味道鮮甜，亦非常之好。比較起附近的李景，這裡無論是粥底及粥料都猶有過之。這個黃沙潤粥，是絕對「靠得住」；鯇魚皮爽脆，加入大量蔥絲及薑絲同吃，伴以醬油，是美味非常，收35蚊一碟雖然有點貴，但都一樣食得過。阿姐服務不錯，有求必應，要多蔥真的比了幾多蔥，這一項亦比李景強，一讚。埋單60蚊，不算平，但食得過，起碼在灣仔及銅鑼灣區要找一碗有水準的粥來吃，這裡是不二選。也對這裡的魚湯有所期望，睇下幾時又來試埋。

食物還可以, 不過啲嘴面卻受不了.

魚鮫豬粥,45元....來了克街後這裡好像多了湯+米線及啜啜面但豬是爽爽的？

(8/10/05)今次帶男友家人來試,我當然毫不考慮,揀泥鯭粥。果然係好鮮甜,不過泥鯭肉份量唔係好多。粥身稀了點,平常人應該覺得o岩o岩好。而豬潤牛肉粥,是杰身點,濃味點。世伯好欣賞那碟,得兩"住"的炒麵,所以叫左兩碟。聽熟客同店員傾計,日頭D粥稀D,夜點的粥會杰D,又係噃!可能由於舊區重建,牆上貼左紙,話11月3號會搬去克街喎,大家留意喇。

(14/9/05)好耐之前睇雜誌, 同好朋友來食過, 都覺得唔錯。咪帶男友來吃。原本想食泥鯭粥$20(睇之前食評寫$25啊), 但怕好多骨, 才揀鯪魚球粥, 粥底雖唔算綿, 但真係好香, 食完無"確"喉。鯪魚球都好味, 軟熟, 亦有陳皮味。男友吃豬潤粥, 我唔食豬潤, 望落去都幾滑, 唔會煮得太耐而"鞋"口。粥底亦俾豬潤染得濃味。叫左碟冬菇椰菜炒麵, 嘩...以為加DD冬菇椰菜炒, 變得有D卓頭, 同一般豉油皇炒麵唔同, $10得o個兩"住", 又唔係特別好食, 千祈唔好上當。食食下睇下d牆上嘅紙, 原來泥鯭粥是"拆肉"泥鯭粥啊!仲有如果來食野, 係唔可以吸煙、唔可以見客洽談、唔可以浄食糉...一隻糭都$15啦, 炒麵$10。點解唔話「唔可以淨食炒麵」呢?

冇乜胃口,黎左呢度食lunch,原以為要等位,點知一黎到就有得坐,可能天氣熱冇人想食粥?叫左拆肉泥粥($25),炒麵($10).粥鮮甜,冇味精,好正,有阿媽煲既feel.價錢略貴但物有所值.炒麵算少油,可惜完全唔熱,份量亦少,要成十蚊就唔抵.全場女仕,得我一個麻甩佬,感覺有d怪.

15-7-2005 1310今日中午時份特別熱，又要行快兩步，行遠少少去搵野食，之後拿拿聲返公司搏老命。來到差唔多已經係1點鐘，人一點也不少，一條友都要等一陣，一坐底諗緊食乜野之餘，睇下老版點樣控制店內的秩序，包括唔俾人大大聲講公事兼不雅說話，該位女仕好想用對眼打佢一鑊金。最終只係點了白鱔粥勁多，粥用魚湯煲，少少綿，冇乜味精，白鱔好爽，口感相當不對，唯獨係欠缺魚的獨特味道：腥味。其他食客好多都有點新鮮魚皮，可惜一個的力量始終差的。

吃了泥鯭粥和油菜。個粥好好味，而且好多魚肉。但食完之後整晚都好口渴，懷疑是落了味精。服務一般，但沒有茶水供應。

老闆彬彬有禮, D 豬潤火喉恰到好處特別正, 粥低簡直無得彈, 還有個款爽滑魚皮, 真係唔知點形容好, 總之我地每星期都去一次補一補

以下是我引述另一食評之食客評語,覺得十分貼切"入面班人個個都寸過碼頭咕喱，咁既料子就想學人"店大欺客"" "今時今日仲咁寸,等執笠" --- 唯一可取的地方是就腳方便shopping又不用走到上環或Sogo後的"利苑",粥底真是用魚湯煲有鮮味但稍嫌稀,吃過魚腩,豬潤,泥蜢和鯪魚球粥,都不錯。要不是穿得比較好,他們只敢眼定定的看著我(因我老公先來留了一個坐位給我,但我遲到.但入門口時以sa lump),但我之前來的數次都覺得他們對客人的態度十分差. 都會繼續幫襯,因為週圍很難找到稍有水準的"生滾粥".

平時趕返學通常咬個包就算, 但尋日心情麻, 想食啖粥, 唸起呢度的食評好似幾好, 所以來試一試. 可能時間尚早(五點九左右), 我到的時候店內只有四五個客, 係咁意都望望個餐牌, 當然最後都係叫左泥粥. 於等緊的時候四圍望望, 牆上有幾張老細釣魚的戰績, 亦有好多手畫的魚魚+簽名(但睇唔清個名係咩). 碗粥上檯, 滿滿的, 份量都唔細, 粥底綿綿但唔會太杰, 印象分加分. "畢"一"畢", 魚肉的份量唔係好多, 但都唔可以話好少, 始終呢個價錢兼起埋骨, 份量在我來講都可以接受, 而且當中都有唔少大塊的魚肉有得咬下^^ 見到牆上寫了粥底無加"師傅", 但出街食野, "師傅"走不了, 差在多定少, 個人覺得個粥底點都有加左少少"吊"味, 唔係嚴重的話都唔係問題. 本來仲想試佢地的鹹肉同魚皮, 但為免浪費都係留番下次搵多D人一齊分享. 期間見唔少人來拎""(已預訂), 個個都十幾廿隻咁拎走, 搞到我都想試, 而且見佢地有出一種"水晶白蓮蓉水", 唸住外賣一隻, 點知亞姐"今日賣晒喇, 你聽日再來啦" 真係咁好味?? 搞到我心思思添....

因為工作關係, 所以很多時都會出沒灣仔, 亦間中幫襯這間小舖.平日都會食個黎鯭粥同手撕雞粥, 今日食個較冷門的魚片碎牛粥, 同具水準.食粥最怕水汪汪, 一係怕"淡茂茂". 此店無論在粥底或選料都係水準之上. 早上係海皇同樣食左碗粥, 晨早流流D 花生已經唔脆, 反而一間小店呢D 細微野都照顧到.個糉我個人就覺得無乜特別, 15 蚊一隻都算合理, 但無用盲目聽"飲食男女"個份吹捧.值得一提是老闆Peter 哥, 本身鐘意釣魚, 最後興趣變為事業, 傾開計見佢非常投入介紹自已舖頭食品, 開舖頭賺錢固然緊要, 廿蚊碗粥都好有耐性介紹比你, 可見其投入及誠意.利東街因為重建關係, 附近好多舖頭都已關門大吉. 聽老闆講佢地可能會去到年尾. 若果街過利東街, 廿蚊碗粥都值得一試.