麥當勞

營業中

休息中

今(6-7-2014 Sun)朝同男友起身後,因新雪櫃快送o黎,所以我o地都唔落荃灣食o野,留返o係o度,咁去麥當勞食,我要$26.80o既板燒雞腿早晨套餐,加$1.00要黑芝麻豆漿,男友要$28.80o既珍寶套餐,加$1.00要8oz即磨咖啡.買齊返o黎,開餐,件雞腿唔大件,有少少辣,肉質唔嫩但唔太o鞋口,黑芝麻豆漿似普通豆漿,飲唔出芝麻味,只有死甜,分別只係飲到尾段,見到佢係灰灰地色咁囉.而其他o野都正常味道.男友o既即磨咖啡就只有苦味. 衛生:唔知係人手問題定咩o野,冇人執枱同掃地.

21-6-2014 (Sat)晏晝等男友放工後,一齊o黎買個餐share食,順便用佢o既優惠咭,買杯o野飲俾爸爸消消夏至o既節氣.會合o左佢後,我o地商量買咩食,決定要新出$28.80o既森巴脆雞堡餐,加$5.00要芝士薯波,用咭以$12.80買雪碧新地樂+兩個蘋果批,買齊返屋企去.返到去,即刻將杯雪碧新地樂俾爸爸食,所以唔記得影相.好,我同男友都開餐喇:1. 森巴脆雞堡個包做到似足球紋咁,而件脆雞好細件,食落,脆雞本身唔辣,只有熱氣,但慶幸內裡都juicy,而個汁就有少少辣,我食到片鮮青瓜,但好似同個包唔係幾夾.2. 芝士薯波一客五個,一啖咬落去,外面係脆,內裡係有芝士味,但唔係o個種半熔軟芝士,口感差一皮,裡面o既薯仔粒亦起唔到咩作用.3 - 4. 中薯條同汽水都正常啦.5. 蘋果批蘋果批外層同樣係脆,內裡充滿o左蘋果粒同蘋果蓉,又好彩,玉桂味道唔太濃,蘋果粒同蘋果蓉又唔太甜,食得舒服啲.味道計雪碧新地樂,分數係3.17分服務:我o地o黎到時,兩條人龍都長,執食物o既忙合個不停,可唔可以加人手?其他:呢間只有蘋果批供應冇紅豆批,唔係幾好囉.

尋日(19-4-2014 Sat)耶誕受難節翌日,同男友瞓到好晏至起身,落去食o野都已經12:00pm,問男友係咪食車仔麵?佢答麥當勞,因為佢買o左張優惠咭,可以買印o係咭上A組o既食品送B組o既食品,我o地決定買兩組o野,一個係新地樂+蘋果批兩件,要$12.80.另一組係蜂蜜梨茶+麥旋風,要$14.80.買完開餐,新地樂上o既雲呢拿新地會被汽水o既汽攪到好快溶,所以要快食快飲,雲呢拿新地依然好香滑好食,可樂冇o野講啦.然後食蘋果批,蘋果批唔熱只係暖暖地,好彩玉桂味唔多,所以唔係好難食,而外面仍然係脆.之後到麥旋風,男友要OREO,麥旋風夠凍唔快熔,OREO碎夠脆.仍好味.而蜂蜜梨茶呢,味道淡淡的,一般.但由於我唔夠飽而且返到屋企我要開工,所以都買多個$28.80o既豬柳蛋漢堡餐食,豬柳蛋漢堡同薯條都同樣係一貫水準,完全冇問題.環境:呢幾日都熱,但冷氣開得凍到我想快啲食完走人.

前日(9-3-2014 Sun)晏晝,男友買新出$16.30o既泰火辣雞腿包.當然辣o野就由佢食先,佢話對我o黎講係辣,但好惹味,又脆又夠熱.咁我細啖啲試,係,係辣,但又冇我想像中咁大辣,仍接受到,最難得o既係佢內裡仍嫩同juicy,且件雞腿都幾大件,冇欺場.不過生菜絲依然唔太理想.

今(13-11-2013 Wed)朝同男友起身後同佢一齊食早餐,我o地又決定快食,就食麥當勞新出o既吉列豬扒套餐,呢個$24.50.男友就要$29.50o既豬骨湯板燒雞芝士扭扭粉套餐.男友o既扭扭粉要等一陣再攞,睇睇我o既吉列豬扒套餐,有指定o既汽水同薯餅外,吉列豬扒亦一定有啦,此外就有炒蛋同鬆餅.男友o既扭扭粉都有喇,我o地開餐.我先食吉列豬扒,個沙律醬唔止沙律醬咁簡單,味道豐富啲,吉列豬扒o既炸粉同麥樂雞o個啲差唔多,只加o左少少麵包糠,件豬扒就唔算好薄,口感都算鬆軟.薯餅同炒蛋都一貫o既冇問題,但鬆餅竟然有啲韌,男友一早知道,所以唔食,係咪擺o左好耐?而男友o既早餐呢?我就一啲都冇試.味道係2.67分

尋日(2-11-2013 Sat)晏晝,男友放工後過o黎執啲o野,咁求祈食個晏先啦,食咩呢?麥當勞啦.我想食豬柳漢堡同近期o既蝦漢堡,男友就買$26.60o既豬柳漢堡餐,加$2.50要蜜糖BBQ調味粉.$34.00o既玉子滋味蝦漢堡餐,要大粟米.買完後食得,我先食豬柳漢堡,呢個都係正常冇問題,而加o左蜜糖BBQ調味粉o既薯條,呢個已經好惹味,因為有蔥粒.而玉子滋味蝦漢堡呢,千島醬得好少,少得孤寒,蝦餅脆口,蝦肉仍保持嫩紅色,幾靚.但生菜絲貫徹乾爭爭o既作風.最後係大粟米,粟米腍,但落兩盒牛油都唔夠味,唔該可唔可以加鹽o黎烚?呢餐共$63.10,麥當勞真係越o黎越唔抵食.服務:唔會自動畀牛油.味道分係3.5分

前日(27-7-2013 Sat)朝同男友起身後,食少少o野後向灣之仔出發,咁去麥當勞買一個餐share食啦.男友講笑話買有四隻醬o既18件麥樂雞餐,咁好啦,呢個餐要$41.50,加多一杯中可樂,要$9.80.齊晒就開餐,四種醬係星州咖哩醬,蜜糖芥末醬,味噌芝麻醬同韓風辛辣醬,打開食得.先講啲醬,味噌芝麻醬味道濃但都幾鹹;蜜糖芥末醬香而不辣,係我至愛;星州咖哩醬正常o既咖哩辣啦;韓風辛辣醬,男友話似豆瓣醬,不過偏辣.而麥樂雞呢,今次出奇地唔太乾,男友重話食到啲雞味,今次好似稍為爭返啲氣.至於薯條,睇相都睇到得好少,有冇攪錯?3.5分o既味道分只係計麥樂雞同四種醬.

尋(29-6-2013 Sat)日晏晝同男友返到屋企後好攰,唔出街食飯喇,男友抖夠後就落麥當勞買o野食,佢買o左$68.00自選包餐,揀o左雙層芝士漢堡同板燒雞腿包,有兩杯可樂,6件麥樂雞,大粟米同大薯條.佢好耐至返到o黎,我問佢做咩咁耐?佢話好多人,做唔切,所以等好耐.我拎出o黎,除o左汽水外,所有o野都好熱,其實咁樣係好事定壞事?我o地先食包,雙層芝士漢堡,板燒雞腿包同薯條都正常冇問題,而麥樂雞呢,其實佢好乾同冇味,我o地食o既只係醬o既味道.大粟米份量唔多,牛油亦唔太多不過都食到牛油香味,粟米好腍好甜.而汽水呢,食晒咁多o野係唔夠飲o既.

19-5-2013(日）和家人在鯉魚門吃過午飯後，一個人便坐港鐵返回荃灣，來到從沒到過的石圍角邨影下街道相。由荃灣港鐵站步行約十多分鐘來到石圍角，今天天氣頗熱，十多分鐘的路程已令我汗流狹背，隨意在 麥當勞 吃杯雪糕，嘆下冷氣。叫了一杯 黑白珍珠焦糖新地。賣相頗嚇人，珍珠加上半溶的焦糖，感覺像滑潺潺的海產類；雪糕上桌時已半溶，顯然是雪糕機的溫度不夠冷吧；吃下一囗，焦糖味弱，接近完全感受不到，珍珠大粒但較硬身，要咀嚼需時才能吞下。由於雪糕是半溶狀態，感覺像吃奶昔。整杯感覺也頗差！

10-5-2013 (Fri),爸爸返鄉下,我就o係o度買o野食,順便試佢o既飯,.試麥飯卷好定麥趣飯好呢?睇宣傳品,飯應該唔夠汁撈,亦唔夠濕潤,都係唔食麥趣飯喇,食麥飯卷.我就用$28.00買脆雞麥飯卷餐,o係等o既時候,我見到買超值套餐,可以優惠價$8.00買甜品,睇到有黑森林麥旋風脆脆,就問收銀可唔可以以呢個價買?佢答可以,咁就畀多$8.00買.有齊後返到屋企,先將麥旋風放入雪櫃先,然後影脆雞麥飯卷,再跟佢指示打開o黎食,食落,所有o野都係腍,餅皮,脆雞同飯都係,味道方面,只食得出餅皮o既麵粉味,其餘兩樣係食唔出,之後食到微酸辣o既調味料味道,唯一爽脆o既係青瓜,o係咁o既情況下,我再食真啲啲飯,飯餅好夠濕潤亦好黐,不過真係冇乜飯味,脆雞真係差啲.食到一半,發現下半截有脆雞同飯餅各一,即係成件麥飯卷有脆雞同飯餅各兩件.而薯條竟然都係腍,同只係暖暖.食完呢兩樣o野後就拎黑森林麥旋風脆脆出o黎食,面上有一件蛋糕仔,我先逐啲逐啲食,面上o既脆脆唔係咩o野粟米片,竟然係威化,被佢呃o左添.而件蛋糕仔原來有層忌廉夾心,雪凍o左滋味啲.而原來重有一件被插o係入面,雲呢拿新地依然咁滑咁好食,不

23-2-2013 (Sat)晨早同男友起身執拾行李搭飛機去廈門,原本諗住咁早可以同爸爸一齊飲茶後出發,點知爸爸話呢間明星要到6:30am至有o野食.我o地最遲6:45am要走,趕唔切啦.我o地唯有o黎呢o度食,男友叫我幫佢揀食咩o野,o野飲就要咖啡.OK,我就買o左豬骨湯豬柳蛋扭粉餐同普通清湯豬柳蛋扭粉餐.買齊返埋位食,我嗅到豬骨湯豬柳漢堡扭扭粉o既豬骨湯味,男友話佢食過,唔夠味,所以呢個畀我食,佢食清湯.我先試吓飲豬骨湯,都飲到啲味,係好過飲清湯o既,而扭扭粉呢?都幾彈牙但好似食到有少少生味.其他o野都正常冇乜問題.價錢:明明豬骨湯豬柳蛋扭粉餐比普通清湯豬柳蛋扭粉餐貴$2.00,但o衣o家睇返張單,兩樣o野一樣價錢o既?

尋日(12-2-2013 Wed) 大年初三朝早,同男友起身後,原來想煎年糕做早餐,點知男友話怕怕,因為前日o係外婆家食o左好多,而且呢晚去佢爸爸屋食飯,應該又有糕食.咁…..食咩o野呢?佢自己發板買上o黎食,OK.佢落o左去好耐,差唔多半個鐘,買o左咩o野返o黎?一樣係麥當勞$28.80o既牛肉招財福堡餐,一樣係唔知邊間o既早餐,我揀呢個食.打開睇個牛肉招財福堡,充滿黑椒汁,而且都係朽朽’較較’,揭開睇有啲洋蔥粒,食落,咪就係只有辣囉,牛肉味一定欠奉,由於呢個辣,所以我食兩啖就唔食畀男友食.而扭扭薯條呢,份量比正常薯條少好多,而呢個都調o左味,唔係只洒o左鹽,而係加o左辣,所以呢個又只係有辣味,成個餐就只有可樂唔係辣.呢個咁o既牛肉招財福堡餐真係超唔抵食.

前日(17-10-2012 Wed)放工搭車返屋企時,爸爸打畀我話佢唔煮飯,叫我自己煮.OK,買麥當勞吧,o黎到,見有芝麻醬蝦漢堡餐賣$28.00,就o黎個啦.由於o係買o既時候,有個女仔拎個包去counter話要加醬,counter話頭先幫佢加o左重唔夠?於是我買到返屋企,即刻打開o黎睇,芝麻醬真係唔太多,生茶有啲乾,唔多新鮮,影完相就食喇.芝麻醬甜甜地,係幾好食,而蝦堡一樣係啖啖蝦肉,蝦肉冇煮過老,係僅僅熟.不過食完3個鐘,個肚就開始覺得消化o左好多o野,有空洞洞o既感覺.

今(22-7-2012 Sun)朝同男友起身陪佢食早餐,我唔落荃灣喇,佢話o黎麥當勞吧.,好.o黎到,佢話要個早晏全餐就,夠咁我幫佢買啦,買個$22.50o既精選早餐,我要$25.00o既至尊烤雞套餐,兩個都係要可樂.齊晒o野開餐,我先試我o既烤雞,又係辣o既,不過帶啲甜味,係加o左少少糖漿,雞皮冇煎脆,食完件雞剩返好多油o係個盒.其實男友之前食過,佢話就係唔鍾意甜甜辣辣但黐立立o既效果.其他o野都正常冇問題.

今日(5-11-2011 Sat)到晏晝1點幾開始肚餓,食個麥當勞o既烤豬漢堡嗎?但今晚o既餸菜應該幾飽肚,o衣o家食個lunch唔可以食太多,點算呢?呀,可以食少少o野,食個開心樂園餐咪得囉,好,落去買先.o黎到,見有啲平平o地單買o既包,記起男友教我可以買呢啲食,唔使食成個餐同又飲汽水,嗯!就買個$8.00o既雙芝牛堡同$6.00o既蕃薯批啦.買好返拎屋企,先食雙芝牛堡,呢個食得返細個時食o既味道,不過唔知係咪塊芝士作怪,越食越鹹,鹹到個冇味漢堡包都幾乎中和唔到.然後食蕃薯批,呢個唔係太熱,批皮仍脆口,內裡o既蕃薯餡同樣唔太熱喇,味道亦唔甜,不過餡都算幾多,冇9成滿都有8成,算唔錯.