星味天下 (已結業)

友人從加拿大回港渡假，臨番加國之前，同我呢個識咗差唔多二十年嘅老朋友晚餐聚舊，順便更新一吓彼此嘅近況。友人食西式嘢太耐，想試吓東南亞美食，為咗方便泊車，我就決定再去MEGABOX，品嚐一吓呢間餐廳嘅星加坡食品。好多新開張嘅食肆為咗增加聲勢，都會誠邀城中名食家去試食。呢間餐廳就請咗「蔡瀾」，仲响餐廳裡面刊登咗佢嘅食評。我冇走去睇佢嘅詳細內容，憑直覺點咗如附圖嘅小菜，包括「原味肉骨茶」、半隻「海南雞」、「甜酸雞腳」及「紅米炒牛肉」。肉骨茶味道對辦，有濃烈嘅藥材味同埋排骨嘅鮮甜味，選用嘅排骨唔係肉排，所以飲落湯水唔係想像中咁滑。至於「海南雞」，我會以薰嚇嚟形容，雞肉冇雞味之餘，就算點任何一款醬料都唔能夠突出些毫雞肉味，是十分失敗之作。「紅米炒牛肉」嘅紅米除咗顏色係紅色之外，同一般白飯冇分別，按正路應該有點兒蕃茄味才對，真令人莫名其妙；牛肉炒得太韌，亦唔能夠鎖住肉汁，亦係令人失望之作。只有「甜酸雞腳」叫做正常些少。我地兩個人共花費二百八十蚊，收費同食物質素唔成正比，我只好將此店列為「無回頭」之列。