譚仔雲南米線 (翠屏(北)商場)

Open Now

Now Closed

依家食碗米線一啲都唔平，一碗米線加碟小食，唔包飲品都可能貴過一個包飲品嘅午飯套餐，我呢一餐就係證明。呢一日我就嚟到譚仔，叫咗碗魚蛋米線（$35），麻辣湯底，由於我唔係好食得辣，所以要2小辣（加$1），加脆肉鯇（加$12），烤豬大腸（$23），一共$71。豬大腸望落顏色好吸引，我亦都畀佢呃咗，以為好好食，但一咬落口就知領嘢，完全中伏。其實細心啲去睇都知同食開嘅炸豬大腸，又叫九轉炸豬大腸有分別，炸豬大腸係外腸包內腸，而且腸身薄薄，但佢呢個腸身好厚，所以食落唔係好似炸豬大腸咁樣脆身，而係韌口，完全唔好食，雖然加咗附上嘅淮鹽，味道會好少少，但咁少淮鹽，點夠蘸？乜淮鹽好貴咩？抑或為咗食客健康著想，所以畀少啲？再講碗米線，3粒魚蛋有魚味，而且彈牙，好食；但加咗$12呢脆肉鯇魚片就係伏！魚片居然係呈啫喱獎，而唔係白色，咬落口有啲彈牙，但唔係新鮮鯇魚應有嘅爽口質感，明顯唔係新鮮貨，咁嘅質素要$12，完全唔值。下次叫魚蛋竹笙米線或魚蛋豬膶米線好過，至少比呢個鯇魚片好食得多。至於個麻辣湯係唔錯，係食到麻、辣嘅感覺，但兩小辣對我嚟講都係太辣，飲咗兩啖湯就放棄咗。

早餐食譚仔餐蛋治熱檸茶烘底$28+$1=$29（$1係加烘底）兩張相之間嘅分別係一個睇到餐蛋治厚道同埋見到我用匙羹篤爛啲檸檬，而唔係佢支攪棍。所以支攪棍變成廢物，亦唔環保，下次叫佢收走至得。相比同區嘅百分百，佢塊麵包同雞蛋都薄啲，亦唔會係超薄，份量算足夠，而味道相差無幾，而百分百係$33，烘底要加$2，即$35，食太興嘅話仲貴啲添，相比之下，咁嘅價錢，而畀到嘅質素亦唔差，甚至好過傳統茶餐廳，絕對收貨啦！

呢兩日暖返啲，但早幾日相信大家都仲起得寒風刺骨嘅感覺吧！咁嘅天氣，又正值假期，好多人包括我都寧願匿起個被竇唔相郁，但當個肚行緊雷嘅時候，又不得不起身去食啲熱嘢暖下身，而當時我第一時間就諗起樓下間譚仔，於是立馬行動落去暖暖身。間舖頭得兩個人做樓面，連執檯、收銀、傳菜都係佢哋兩個，加上正值午飯時間，所以我都等咗好幾分鐘先至等到佢哋拎個餐牌嚟。一打開餐牌，見到一個餸都要卅幾，我不如加多三分一價錢，叫碗過橋米線，有好多樣餸，豬牛雞魚菜，樣樣齊，加多$5，改配芫荽皮蛋湯底，咁樣暖胃啲，再加碟優惠價嘅涼拌魚皮，一共$84。啲餸一般般，無咩特別，皮蛋亦唔係溏心，更唔係松花皮蛋（想創你個心啦！），而碗湯真係好鹹，正常嚟計，起天寒地凍嘅日子，碗湯應該飲哂佢，但結果我放棄，雖然浪費，但真係無辦法。然而呢碗米線真係好夠大碗，雖則各種丸類只得一粒，但加埋其他食材，份量非常充足，絕對足夠能量去應付嚴冬嘅一整個下午。魚皮算係夠味，但無比較就無傷害，相比算係同區嘅醉標無骨海南雞所賣嘅涼拌魚皮，後者明顯優勝得多。

早餐上次叫咗雙併蕃茄湯米通粉配熱檸檬茶今次試下個通粉，叫咗雙併蕃茄湯通粉配熱奶茶佢個雙併嘅選擇有牛肉、豬肉、腩肉、豬膶、雞肉及魚片頭可供選擇。今次揀咗牛肉同豬肉其實叫之前都有個疑惑：究竟豬肉腩肉嘅分別起邊？嚟到就清楚明白，原來豬肉係瘦肉片，腩肉就連皮及皮下脂肪及瘦肉嘅豬肉片（因為上次食過），既然係咁，點解唔索性叫肉片呢？呢個係茶記慣常嘅叫法。或者我陰謀論去諗：會唔會係方便走位，靈活調配甚或更改食材呢？萬一無全瘦肉，可以用半肥瘦，甚至肥豬肉代替，一樣都係豬肉噃，仲有，唔一定要切片，可以切厚啲，甚至切肉絲都得，一樣無違法，一樣無呃人噃，好嘢！👍講返碗通粉，個湯一如之前食過嘅一樣，係偏鹹嘅蕃茄湯，有蕃茄粒，唔似老麥咁畀個實情係罐頭湯嘅所謂蕃茄濃湯。通粉軟硬適中，亦無食到成口粉，質素唔錯，但同米通粉比較嘅話，我會揀米通粉，始終米通粉起香港比較少食到。牛肉同豬肉嘅比例大概係1:2，都啱嘅，牛肉貴過豬肉嘛！下次叫個雞肉嚟試下，睇佢畀嘅係雞嘅邊部份肉先？千祈唔好係嚡口嘅雞胸肉就好啦！奶茶慣例要啡糖，亦都慣例唔用支搞棍，用筷子搞，食力啲，勻循啲，下次叫姐姐收返支攪棍，唔使浪費。今次杯奶茶濃咗啲，唔夠滑

今早嚟呢間食早餐，叫咗碗腩肉豬膶蕃茄湯米通粉，配熱檸茶。唔知我係唔係大鄉里，蕃茄湯居然係鹹，而唔係甜甜酸酸嘅？而佢嘅鹹係過鹹而唔係啲啲鹹，亦飲唔到酸味，只有啲啲蕃茄味。檸茶，當然要用匙羹篤啦！佢畀嗰枝真係用嚟做攪攪棍咋！除咗個湯，整體無投訴～腩片夠肉香；豬膶軟硬適中，唔會過生，亦唔會過老；蕃茄一般，無咩特別；仲有腐皮、芽菜、韮菜；米通粉都做得唔錯，夠滑得嚟唔會過腍；檸茶嘅檸檬一如以往唔苦，連飲品共$37，收貨啦！

早前去呢間譚仔食早餐，呢次唔係鮮牛同豬膶一丁，而係普通到唔普通嘅餐蛋一丁，上次試咗個奶茶，今次叫杯熱檸水試下。先嚟杯熱檸水，檸檬唔苦，而且有檸檬三片，已經係德政，依家好多茶記，尤其是兩大一美，啲檸檬係苦嘅，真係好難飲，佢嘅杯唔苦之餘，仲有檸檬嘅鮮味，證明唔係用啲平價貨。我試過去佳寶買$10有5個，同去惠康買$2.5一個，兩者味道完全係兩回事，所以一分錢一分貨，完全唔係錯。之後嚟碗麵，餐肉係火腿餐肉，煎得夠香，而且夠厚，好食，至於隻煎蛋，根據餐牌係太陽蛋，而唔係出到嚟嘅反蛋，不過咁對我嚟講仲好，因為我鍾意反蛋多過太陽蛋，若然可以脆邊就更完美啦！至於個丁麵，今次腍少少，下次叫佢煮腍的，我諗會更加適合我，但下次應該會叫米通粉配熱檸茶，因為米通粉在香港嘅茶記真係好少見。總括而言，$36一個咁嘅質素嘅早餐，起今時今日嘅香港真係相當抵食。

星期六朝早，落到樓下，見到美心門口出面貼咗通告，話於月中結業，見到咁嘅情況，諗住食埋個告別早餐啦，入到去，睇個餐牌，無樣想食，再望下張張檯都有人不特只，水吧仲有好幾個人等緊，見到咁嘅情況，當然即縮，行過隔離譚仔，睇吓有無咩啱食。譚仔由佢起尖沙咀第一間舖頭開始，一直都唔係我杯茶，所以甚少幫襯，早餐更加未試過。是日由出面望入去，得小貓兩三隻，入座率約莫兩成，同午市情況大相逕庭，所以無咩期望，但從門口睇睇吓個餐牌，咦！佢個湯粉麵早餐，唔單只有餐肉、火腿、雞蛋呢啲例牌嘢，仲有豬膶同鮮牛肉可以揀噃，而且價錢又唔貴，雙併湯麵加熱飲都只係$36，咁就一於入去叫呢個茶記甚少有供應嘅組合啦！入到去坐低，唔單只客少，就連店員都唔見有，就連收銀個位都唔見有人，不過半分鐘唔夠，就有店員從廚房出嚟，咁我快快落單，叫咗個鮮牛豬膶丁麵外，仲叫咗杯奶茶。可能由於無咩客嘅關係，上餐速度算快，唔使5分鐘，碗麵同飲品都已經送到，同午市要平均等15分鐘相距甚遠。奶茶個糖包係砂糖包，但我喜歡用啡糖配奶茶，於是問店員妹妹有無啡糖，佢話有，而且好有禮貌換畀我。先講杯奶茶，質地算係滑，但茶嘅味道，我就唔係好接受到，佢未至於好似大家樂

收銀個員工態度惡劣，坐底半餐半個鍾叫既野飲都就黎飲完，都冇餐到，問佢又發客人皮氣，問佢有冇漏單，等左半個鍾都唔黎，佢頭都唔望客人話冇漏單，之後再過多10分鍾黎餐，成碗野拍落張枱到，完全離譜。大家如果黎呢間分店食野，記得留意帶眼鏡長頭髮既收銀，其他員工都好有禮貌，唯獨佢一個係到趕客。

自吃了三哥的蟲草花湯底之後，一直念念不忘。今天路過譚仔，決定外帶一碗素米線回家吃。怎料這碗譚仔的素米線成為了我一生中吃米線的噩夢。淺嚐一口湯底，沒有嚐到味道，就如喝蒸餾水一般。我以為是自己在外頭太熱，味覺失靈，呷了一口茶確認味覺尚在，便繼續再試。哇！是真的沒有味的呢！沒有鹹味，也沒有鮮味，此時口中隱隱約約傳來一股淡淡的烚菜味。天啊！我為這碗米線付了44蚊，卻得到一碗烚菜湯底！飢餓的我為時勢所迫，也為不想浪費食物，只好繼續吃。碗中的竹笙、豆卜依然是淡然無味！天啊！幸好我家裡有鹽、豉油，可以倒在米線裡，要是堂食該怎麼辦呢？絕對不推薦這碗素米線，大家移玉步去三哥吃吧。

翠屏邨的這間譚仔，不是三哥，都好旺！門口玻璃常常會見到近來有甚麼鮮款式今日，我想食芽菜，心血來潮，叫了一碗『雞肉、韭菜、芫茜、清湯、米線轉芽菜』HK$47.00（一條米線都無的譚仔）等了將近10分鐘就有得，回家時仍熱烘烘他們把上面的菜，和下面的湯，分開~用多一個膠兜不太環保，唯有走餐具不客氣啦！低糖，低脂，低澱粉質，低碳水化合物，高蛋白質，高纖，高維他命...營養健康好食美味食物溫度非常適合素食 / 喜歡健康 / 減肥的低碳一族！

一直都想試下譚仔早餐，但畢竟唔係間間有，出左成兩年都未食過。今日路經觀塘翠屏北商場，見到間譚仔有早餐賣，而且天氣又好凍，終於決定入去食下。今次叫左碗豬潤牛肉番茄湯米線跟熱鴛鴦（$37），並且係姐姐極力推薦下推薦下追加左塊雞排（$8）。本身以為早餐湯粉份量會少些，但出乎意料地D料都幾多，同午餐食果陣差不多。豬潤同牛肉都好嫩，冇臭腥味，鴛鴦好滑。最驚喜係塊雞排，本身上台過時又冇醬又冇汁，以為一定好油又中曬伏咁，點知咬落好脆，又唔乾，好正。最後食到暖笠笠，埋單都係45蚊，唔錯。

話說今晚要等老友OT, 所以求其自私食，諗住穩陣啲唔會中伏梗係食米線啦😎呢間又唔使等位，渣渣淋食完去做柴可夫🚙香港人特別歡喜吃米線既人其中一個原因係因為湯底夠熱嘛，點知碗湯唔夠熱既，唔知點解有一碗泡菜，我自問都算係泡菜愛好者，但泡菜勁難食超級酸。食食吓件腩肉有條類似魚絲既物體，最後重搵到2條，結果要浪費食物，食剩3分1。咁多間譚仔呢間質素勁差👎🏾以後都係食三哥算吧。

如果時間多，就來這間米線啦⋯⋯店內大概有20名食客，有啲已經食緊，不過出一個麵都要好耐……包你好像食法國餐咁，一碗米線可以食3個鐘。落單嘅時候嗌左服務員5分鐘都冇人應，已經知道心知不妙⋯⋯ 不過洗濕咗個頭，就繼續食埋佢，結果，自己行到出去收銀落單⋯⋯跟住就到苦苦等待嘅時候……等咗25分鐘，已經問咗兩次，但係都係無米線出嚟廚房可能無人…… 出唔到米線以為連鎖店一定規定，有既有程序？？點樣都會有漏網之魚⋯⋯

同老公一齊在家工作，又想食個快靚正兼抵食既午餐，老公就提議食譚仔。如果兩個人叫兩碗米線，單餸都每人$30以上，結果我地選擇咗過橋米線加底兩人分享，$72(連$2外賣盒)仲有得減$10(用BOCPay)。過橋米線有魚蛋、牛丸、墨丸、豬膶、牛肉、雞肉、腩肉、火腿、炸醬、酸菜、竹笙、芽菜、韭菜、腐皮、生菜、豆卜，一碗就係滿足曬每樣餸都想食少少既心理。份量好足，要兩個外賣碗先裝得曬。特別要讚係豆卜吸曬湯，好味又juicy。我仲叫咗最愛既酸辣湯，越食越開胃，結果好邪惡咁連湯都飲埋

咁見到話譚仔出咗個新米線，魚片米線，咁就想去試吓。於是中午就走左去譚仔，試新嘢。於是叫了魚片米線，額外叫了麻辣湯底，加一蚊。另外叫了凍檸檬茶少甜少冰。咁鋪面本身唔係勁大，又某d位好大風，風口位，所以舒服程度好一般。搞左一輪才找到無風口的位。評論返個魚片，d魚片夠爽，夠新鮮，幾甜⋯⋯不過，魚片好散，偏向一粒粒細片。比我幻想中打邊爐d跪肉鯇差一大段距離。不過湯底幾好，可能因為有木瓜。湯里面的木瓜好甜好好味。