上海美食之家

营业中

休息中

6月8日揾食肥華，陪完靚媽，晨運就到土瓜灣呢間，上海小店食，肥華至愛，回鍋肉客飯，一別經年，此店呢個菜式，仍能保持上隹水準，濃油赤醬，美味依然，而個上海粗炒及酸辣雲吞，更食到靚媽胃口大開，除對此兩款食品，味道嘅評語，直豎姆指外，更主動要求，要食埋此店，另一款，上海名物食品，粢飯，咁有食量，對靚媽唻講，真喺近年罕見，今餐在此店所食到嘅食物，味道真喺冇乜得彈，但個杯跟客飯嘅，荳䊢，味道就強差人意，話佢屬於難飲系列，亦不為過！

由於港鐵屯馬線開通，所以專程乘港鐵到土瓜灣一帶逛街。路過江西街見到一上海食館-上海美食之家，我和太太到門前看一看餐牌，見到有很多款式的食品，便入內用餐。店內座位不多，我們叫了擔擔排骨麵和酸辣湯麵。兩碗麵都是我們兒時的味道，感覺非常懷念，由於我倆都差不多六十，所以可以食回這種味道真是開心，因為現時的上海食館大部分都是新派味道，好難得會食回兒時的味道。擔擔排骨麵-排骨炸得很鬆脆，薄薄炸粉，上海麵都是彈牙同滑身。總體唔錯。酸辣麵-湯頭酸辣味調配得都幾好，材料亦豐富，坊間少有的木耳，這裏都有。

成日經過都無機會試，今日終於試到，為大家報告。小籠包：一籠六粒，即叫即蒸。皮夠薄夠滑。餡就一大舊肉，湯唔多，唔係唔好食，不過似食肉包多過似小籠包。上海粗炒麵：油份算少，麵質彈牙，椰菜同肉絲的份量比較少，個汁就似乎甜咗少少。菜肉雲吞：最欣賞佢跟好多白菜仔，湯底淡，感覺唔錯。菜肉雲吞嘅真身就一般啦。酸辣湯：佢屬於舊式深色的酸辣湯，唔係好辣，材料都足，不過唔係全部都切絲，所以食落有啲有趣的感覺。另外飲咗豆漿，呢個比較差，好淡兼無豆味，麻麻地。總結，整體水準好一般，不過勝在家庭式風味，無好似其他食評講到咁高評價。

今次幫襯, 變差了....(X_X:首先想點嘅鍋貼, 終於點到了, 再加獅子頭菜飯, 小籠包, 豆漿.1, 聽到隔離枱客有微言, 話D醬油器皿唔多乾淨, 睇睇自己果枱D器皿, 又真係唔多乾淨喎.....2, 俾我地用嘅碗, 未用都居然有飯粒! 洗唔乾淨?3, 鍋貼要求底部煎得夠脆, 外表皮軟, 餡料足無偷工減料, 呎吋份量夠.幫襯坊間嘅鍋貼,好多時都呎吋縮細, 上海美食之家呎吋正常用料足, 但我最重視嘅係底部夠唔夠脆, 眼見姐姐係個蒸爐夾D鍋貼出嚟, 心知不妙！放係蒸爐內嘅鍋貼，底部又點會脆？果然... 一D都唔脆, 冧哂, 扣分!4, 小籠包無咩爆汁效果, 哩點一早已知, 但點咗嘅小籠包, 遲嚟先上岸, 後我地兩圍枱嘅先上枱, 服務扣分!5, 今次幫襯缺點表露無遺, 店舖細細但爆場, D客出出入入極不便!無辦法唔俾負評....

呢幾日忽然有鋪食上海菜引，用OpenRice search 一下，發覺附近有呢間餐廳，一於行去望望先。門口睇下餐牌，價錢合理，即入😛並不是豪華裝修，但可算乾淨企理。一個人叫碗排骨擔擔麵，味道不錯，湯夠濃，豬扒系不算太乾。唯一批評，麵太淋，或者改用幼身麵可能會仲好。仍會再來，下次試吓客飯先。

三十多年前在北角返工，試過食當地一品香上海菜館的回煱肉客飯，便深深愛上這個飯餐，以一個相宜的價錢，有一碗湯兩碗白飯再加一碟七成肥膏三成廋肉濃油赤醬，正宗上海手法的烹調主食，真係令人食完後有滿足難忘感覺，可見斗轉星移近廿年到仍然號稱上海菜館的食店，柯打我這個至愛客飯，已吃回濃油赤醬的上海菜特色風味，而回煱肉亦變成七成廋肉三成肥肉來奉客，再加上白飯更由兩碗減為一碗，最近我在土瓜湾上海美食館柯打這個客飯餐時，更連個跟飯的湯都冇埋，由一杯豆將取替，令我完全没有食上海客飯套餐的感覺，雖然此店在此菜色上烹調手法，並不正宗，但仍算可口加上有足夠的調味醬料，我仍然可以接受此餐的味道，但我吾覺得我是食梗客飯囉。

我們一家光顧了多年的上海食店，一直懶惰，所以沒寫食評。在疫情期間，也有在此買外賣。老板娘當時說很難撐，所以我們也盡量支持。光顧過很多大大小小、名貴、中價的上海菜館，始終也覺得這裏的酸辣湯，油炆荀，粢飯，雪菜肉絲麵最好吃。他們的客飯，小菜也有很多選擇。我最喜歡吃的是銀芽炒鱔糊，回窩肉，麻婆豆腐菜飯。很足料，份量夠，價錢也十分合理。最重要，老板及老板娘待人以誠。同街坊打成一片。我的女兒每次到土瓜灣也要來吃。希望他們繼續加油，帶給我們美食

疫情之下, 出街食飯次數大減, 多咗叫外賣同下廚!上海美食之家係近日第一次幫襯嘅餐廳.佢地價錢平民化嘛, 啱哂我哩d窮鬼!問佢地擔擔麵有無唔辣嘅選擇, "有!" 於是叫咗客雲吞擔擔麵走辣, 排骨菜飯同小籠包.試一啖擔擔麵湯底, 濃郁! 飲落有好重嘅花生味係口腔, 麵條彈牙, 雲吞亦足料.排骨外層香脆豬肉鬆軟, 可能好味關係所以感覺份量不足, 要點多一份淨排骨,  結果一份唔夠喉, 兩份又多咗d!食佢地嘅小籠包要小心! 次次辣咀! 今次醒水嘞放涼少少先食, 習慣食小籠包唔點醋原味入口, 爆汁感覺唔強, 皮薄, 味道唔會過重. 滿意.豆漿係扣份一環,  有豆香但唔夠甜.下次會試試鍋貼.

好鐘意食辣野，朋友介紹左我來試呢間平價上海餐廳。黎到二話不說揀左酸辣湯雲吞麵，岩晒熱辣辣既天氣。酸辣湯好多料，有好多豆腐乾、雲耳、豬紅、筍等等。仲有雲吞同麵！份量好足，食完好飽！好適合夏天！酸酸辣辣食完好開胃！

成日去七喜開餐, 總係忽略咗哩間上海菜飯店.大大話話都成年無幫襯.優點:1, 地點方便, 鄰近搵間上海菜館都無, 最近要行到街尾美華.2, 雖然店舖細細, 易搵位.3, 點咗獅子頭客飯, 排骨粗炒, 小籠包同豆漿, 豆漿濃味過八方雲集.4, 獅子頭豬肉口感超鬆軟, 入口即溶.5, 小籠包熱到辣咀, 有爆汁效果, 味道適中唔會好似D冷藏小籠包噤咸.缺點:1, 我最愛蔥油餅無得賣.2, 獅子頭好味但份量偏小.3, 上海菜濃油赤醬, 顏色就夠, 但客飯同粗炒味道比較淡, 可能依家D客中意食淡D健康D將就D客掛.....4, 個人喜好, 唔中意食芽菜, 排骨粗炒就勁多芽菜! 早知就叫走芽菜轉落蔥啦!問十個人九個中意食芽菜, 但係問十個人九個話唔中意食蔥要走青!睇嚟我都唔係地星人, 早D返去卡列夫星.

回鍋肉送白飯加凍豆漿晚餐套餐，只係43蚊，如果改菜飯加幾蚊。真係非常抵食。 小店廚師，清潔，侍應加埋可能得三四個人，有時好忙都唔會點招呼你，但係冇乜問題，因為佢哋好快手，你一落單10分鐘唔使就上菜。 佢都好多餸菜一般上海菜包點都有。 回鍋肉好夠鑊氣，雖然平但係份量唔細亦有好多椰菜，個人比較鍾意食肥嘅回鍋肉👍🏻好好味，不過食到尾就會覺得好多油，隔離枱個男人見到就叫少油，都好多客人食，本來想試吓糖醋魚塊，好彩冇揀錯。重有杯凍豆漿好好飲，好有豆味唔係好甜，唔會覺得佢溝好多水👍🏻，如果唔係用紙杯就更好。之前中午都係去食酸辣雲吞，都好好味㗎。

今日路經此地。遇到這一家上海麵店。雖然裝修一般，不過行左幾條街，其他鋪頭冇人排隊，竟然呢一間鋪頭有好多人在門外等！相信應該是好嘢，所以我就試一試！入到去見到一張，相信是老闆在1992年投身上海希爾頓酒店做廚房的團隊合照。相信佢肯定覺得好光榮。不過，我反而正在幻想好似改革40年所講，港人北上做開荒牛的情況。😂叫咗最基本嘅菜肉雲吞，韭菜水餃，四川擔擔麵。可能我係文盲，以為在大陸叫韭菜餃會係蒸餃！佢叫得做水餃一定係連湯啦！😱自己睇漏眼。😂講返食物質素，事實上不錯👍🏻以家庭廚房內說，餃子味道很好。味濃！雖然已經有10隻，不過食完仲想encore！擔擔面質素反而普通。可能因為食客很多，啲面冇煮熟便上枱，所以偏硬。亦可能由於遷就港人口味，成件事變成偏甜，花生味濃左。不過overall，仍然是值得一試的小店！👍🏻👍🏻👍🏻

因工作關係每個星期都會到九龍城，次次經開呢間幾地道的上海餐廳見到勁多人幫襯都想試，果日終於機會黎啦飛雲，等我試下先😋佢店面走樸實路線，可以話有點up dup, 位置也不當旺，在江西街，但仍吸引好多街坊光顧，見佢嘅價錢都幾抵下，麵餐同埋飯餐都係$3x-4x，仲有好多選擇，我就想食碗擔擔麵，於是就點咗擔擔排骨麵（$38），另加杯豆漿$7。弱弱的一問，其實上海餐廳的排骨即係我們的有骨豬扒，呢樣野係我由細到大都唔明既，明顯我哋廣東人的排骨同佢地的有不同，還是上海是沒有排骨的呢？呢個問題我要等上海朋友解答我😅擔擔麵上枱了，都份量幾大碗😍，聞到好香嘅花生醬味，湯頭有濃郁的花生醬上面仲有啲榨菜和少少辣椒醬，微辣好惹味，麵身係我鍾意食嘅幼麵，個湯夠稠身，掛湯一流👍👍😋擔擔麵夠地道不錯👍不過塊豬扒就有d失色，外表炸得唔算靚，都叫酥脆，但是入面炸得太乾，冇乜肉汁，內外都咁唔吸引，我都係專心食我碗擔擔麵仲好😅不過呢個價錢算係咁，下次都有興趣試佢其他上海食品, 而且價錢又唔貴，唔洗下下去果間上海餐廳連鎖店，貴又不好食😟店名:上海美食之家 (土瓜灣)環境：6/10服務：7/10 價錢：8/10食物質素： 7

間中會幫襯，貪其Park n Dine. 價錢合理，質素及分量都有保證，每次都坐冇虛席。深得街坊歡迎。近日再臨，出了些新菜。叫了酸辣菲菜餃面及蝦仁炒蛋客飯。蝦仁炒蛋可保持水準，有穫氣，但酸辣湯質素有輕微下跌，湯稀了，味不夠酸，要自行加酸，另分量都小了。

上海美食之家—地點位於紅磡、土瓜灣之間的江西街。坦白説，第一眼看到不太吸引，再加上舖面餐牌上的一輛「直通車」漫畫，直的十分「大陸」口味，讓人有一點倒胃口...但懷著冒險精神，希望探索新的瑰寶～在土瓜灣區內，已經有一間享負盛名的上海美華菜館，想不到這間「上海美食之家」的水準也不錯，而且在百物騰貴的香港，價錢非常吸引，所以是晚的晚市座無虛席。晚餐叫了以下幾款：銀芽炒鱔糊—芽菜的數量頗多，鱔片厚肉且爽口，而且不會有太多細骨，味道濃郁吸引，只可惜略嫌不夠鹹。黑醋排骨—如果喜歡吃酸甜排骨類就一定會愛吃這一味，排骨調味做得出色，酸甜味配撘非常吸引胃口。油炆筍—這一味頗為油膩，但幸好筍竹算為爽口，再另外加點豆瓣醬，便會不自覺的多吃幾條。小籠包—皮不算太薄，但內裡的豬肉餡料多汁，但不知為何好像帶點兒酸味⋯⋯⋯如果只是吃晚飯套餐，性價比會非常之高，因為除了客飯或者麵食以外，還附送了一杯豆漿，都只是四十餘元。題外話，店舖入邊有一幅多位廚師的合照，而照片的旁邊寫着：攝於上海希爾頓酒店的烹飪課程，不知道是否與店內的廚師是否有關係呢？