喜運點心專門店 (已結業)

連侍應大媽都靜雞雞同個熟客講換左師傅d野唔好食（俾我聽到），食物不是即蒸，炸物亦是翻炸的，仲標榜蝦餃是👍的，皮是硬的，肉只是微暖。叉燒腸是削的，夾不起。鳳爪亦是硬的，醬汁亦不多。我從不寫食評，今次真係忍唔住。

今日阿媽話中午想去飲茶，點知幾間茶樓都冇位，佢突然間諗起，車站出口對住有間舖頭食點心，於是就去試試。3個人食咗：蝦餃、燒賣、金錢肚、牛肉球、牛肉腸、糯米飯、叉燒包，買單$200有找。整體食物味道幾好，尤其是金錢肚，平日食開沙嗲黑椒咁，有時辣到食唔到。今次係用沙茶醬整，食落有少少沙嗲味又甜甜哋，好好食！間舖頭話係自製點心，咁啱位置又近廚房門口， 員工出入時真係見到有師傅包緊點心。唔係自設工場，係現場即整。 所以餐牌上面嘅點心唔一定即刻有 。如果賣完，就要等下一輪蒸好先有。

住馬鞍山呢個眾所周知美食沙漠既我，今晚繼續帶屋企人去探索下石門既餐廳-一出馬鐵站就見到呢間點心店平日晚上7點半到，大約等左10分鐘就有位店鋪細細，都坐得幾逼下但唔緊要，食物質素最緊要-見網上個個都推介是日燉湯，點都要叫番盅湯，好夠味，好足料，飲得出唔係味精湯--媽媽想食蝦餃，同鳳爪排骨飯味道係不過不失，普通酒樓水準-全晚最令人印象深刻既係呢個響玲響玲脆卜卜，腸粉皮薄，入面有蝦，點少少豉油，好味啊-黃金糕都蒸到熱辣辣，夠軟身，唔錯唔錯-百花鱈魚肚夠哂滑，值得一試斑蘭馬拉糕都係必點！淡淡清香既斑蘭味，馬拉糕夠哂鬆軟-晚上想食下傳統點心既話，呢間點心店的確係唔錯既選擇3個人埋單唔洗$200，食到飽飽，抵食飽出門口先見到11月優惠係$13.8有一籠燒賣，今次miss左添，下次再黎先-唯一美中不足既係我同屋企人都好鐘意食奶皇包，但餐廳無⋯

係公司附近開左冇耐，已經第二次黎食。午餐時間黎到，因為鋪位細得幾張枱，所以好易full左，所以特登早左黎攞位，好好彩冇full到一野入得。鋪頭都係中式設計，可能因為岩岩新開既關係，俾人感覺好新好整齊乾淨。同朋友一人叫左一個飯同啲點心share。朋友食鳳爪排骨飯，我就叫左北菇滑雞飯，點左燒賣同七味虎皮釀尖椒share。果鳳爪排骨飯我上一次食過，同出邊差唔多，水準正常，29蚊黎講算好唔錯。至於燒賣同外面差唔多，佢都足料既，不過不失。而我今次點左北菇滑雞飯，雞件都幾多，算幾滑，29蚊黎講好抵食。如果中意食香口野，一定要點呢個七味虎皮釀尖椒，已經第二次食，蝦膠釀得好足，係釀到漲卜卜既程度，啖啖蝦膠，炸得岩岩好，有少少微辣好惹味，當然我食得辣既，對我黎講係微辣，對其他人黎講可能唔係。整體黎講，性價比都幾高，價錢唔算好貴，買單兩個人係百二蚊，除開每人都係60蚊，正常食lunch價錢，而且食物質素唔錯，服務都好ok，上菜係好快，基本上一點完幾分鐘就有野食，唔會浪費左自己食飯時間，收盤都好快，但唔會趕你走。

足不出戶也能食好味點心！ 謝謝網上外賣平台！！第一次用這app，實在太方便快捷，而且熱辣辣！準時送到無甩拖！是次點了：斑蘭馬拉糕：特別！美味！燒賣：夠大粒鳳爪：份量少了些叉燒包：好味牛肉球：入味叉燒腸粉：比較厚但足料一定會再用網上外賣平台 app,亦會再選這間好店！！

鐘意飲茶嘅我，石門雖然有好多酒樓可惜全部都係大集團，好似無乜新意🤦🏻‍♀️咁啱見到石門站旁邊，開咗間點心店，一於入去試吓雪梨海底椰燉湯 每盅湯料超多，燉完所有精華都係個湯到，入秋飲e個夠晒清潤，重點係....無味精，啱晒我哋e d 湯怪👍👍👍讚金鈎咸水角有待改善，炸得太乾有d硬上湯鮮竹卷鮮竹卷餡料豐富，味道唔會太濃，好味春卷唔油膩好脆口，仲有淡淡嘅蒜香，正叉燒腸粉皮滑嘟嘟，叉燒分量都唔少麻容飽麻容餡好香滑，但飽身唔夠鬆軟雖然店舖不大，但食物質素，好過集團式酒樓👍好味👍撐小店

星期六下午四點同老公去石門按摩，本來諗住按完去新城市搵埋阿囡一齊食，但按完之後好攰，又似好快會落雨，於是就喺石門食晚飯，去左一間好近馬鐵出口嘅點心專門店。入到去裡面雖然座位不算多，因為時間早（六點），所以即刻有位。按摩完好肚餓，於是我地三個人點了八款食物：一個是日精選燉湯 - 海底椰雪梨瘦肉燉湯，呢個湯冇味精，好足料好夠味道👍👍👍👍👍啱曬鐘意飲湯嘅我。一盅豉椒鳯爪排骨飯，呢個飯同樣好多料，仲有菜，飯唔爛一粒粒咁，好味👍👍👍👍👍一碟油菜，菜唔油膩OK👍👍👍糯米雞好大隻，糯米都算軟綿，如果有冬菇就更加好👍👍👍鮮蝦炸雲吞好好味，啲皮好脆蝦好新鮮👍👍👍👍上肉響鈴腸，腸粉捲住入面有脆脆嘅響鈴、瘦肉同𧎚，三種配料份量適中，好味道👍👍👍👍竹笙素翅湯餃，皮夠薄，湯底味道很濃又夠熱，加埋薑絲淅醋，超正👍👍👍👍👍還有金錢肚，比較稔，味道ok👍👍👍仲有菊花茶，好香菊花又唔太甜👍👍👍👍總括而言，價錢合理，好味道。

一間很貼心的點心專門店。先講食物，唔花巧，唔造作，點心賣樣鮮明精緻，唔會無啦啦整個樣落個奶皇包度就賣$60一籠。味道分明，很新鮮，點心一出來蒸氣熱騰騰，還有點燙口。招牌鳳爪排骨飯，說真的，很久沒吃過這樣好吃的一盅。飯是很分明一粒一粒的，鳳爪爽腍適中，唔會腍到好似溶咗咁，排骨有肉多汁，在我們用膳的45分鐘，已從廚房出了兩大蒸籠，一籠應該有十多二十盅，小小的店子，銷量卻驚人。糯米雞是另一推介，足料好味，一隻已經可當一餐晏。蝦腸都是精緻香滑，比添X運還要高水準，其他蒸點都很有質素，唯一扣少許分的是蝦餃皮唔夠煙靭，可以蒸少一點時間就更好了。再說店子本身，裝飾當代中式簡約。跟食物一樣，唔造作。優雅舒適。重點是，店子小小，卻一點也不覺得迫，鬆動舒適，全因職員安排得宜，絕對不像附近某些餐廳，硬將六個人塞在四人卡位，或八個人迫在六人圓枱。最後要讚一吓店內上下員工，親切貼心，安排週到。從等位的一刻就以和善的笑容招呼客人，席間還會親切的問一下對他們食物的意見，不像附近一些劣質集團餐廳，價錢不便宜更要對客人狗一樣看待。令人食完晏，心情也好起來。

各方面點心味道不錯，我們四個人，叫了1只糯米雞、三個灌湯餃、二碟斑蘭馬拉糕、鳳爪排骨飯、一碟牛肉、一碟蝦餃、還有一個大包。灌湯餃真係好味，值得一試，糯米雞也很好味！馬拉糕很有特色，也值得一試。