華記潮州滷水車仔麵 (民興大廈)

营业中

休息中

以前經過舖頭，見到門外餐牌有好多牛、豬內臟，覺得幾特別；加上身邊有d朋友係粉絲，今次有時間經過就試下食。星期日下午三點幾，唔洗等位。nice叫個三餸：粉腸，大腸（瘦），春卷。為免過飽，唔食麵，轉左通菜底。盛惠49蚊。粉腸爽，大腸軟，無異物及異味。讚雖則大腸要瘦，但上枱嘅，其實唔算瘦。車仔面三餸黎講，有呢d功夫心機料食，其實值回票價。

啲湯唔熱，啲餸又少又唔新鮮，加芫荽仲要加錢，唔值得幫襯(ps以前成日食既熟客)，深水埗咁多好野食，下次真係唔會想再幫襯，超級失望，咁既野就收$66，我去周圍食兩份都得🤷🏻‍♀️🤷🏻‍♀️🤷🏻‍♀️🤷🏻‍♀️

今次帶外國朋友去試下香港車仔麵，見呢間好出名就帶佢地黎試下。星期日6:45開始排隊，因為一行7人，等左一個鐘，分兩枱卡位前後坐。蘿白瘦豬腩肉魚肉春卷重口味小辣蘿白十分入味，好甜好鬆化，入口即溶，勁推介👍👍👍豬腩揀左偏瘦既，怕肥人士之選，入口鬆軟，唔會嚡👍魚肉春卷索左啲湯底好正👍湯底香濃而唔會太鹹，小辣個人黎講岩岩好👍魚肉春卷牛腩牛肉餅油麵腩汁+滷水牛腩炆得好鬆而入味，呢度既滷水好岀色👍牛肉餅似牛丸既味道，加埋魚肉春卷好飽肚，湯底好香，好滿足👍感覺同一般車仔麵好唔同，滷水做得好出色，下次會想再試吓其他配搭👍

作為地道香港人的我，最喜歡的食物第一位一定係車仔麵，一聽到話邊間好食都必定慕名去探個真實，今次就去咗深水埗與太子交界之間的華記。離遠望到個門口已經見到排緊隊，但尙算人少，所以都跟隊，最後等左大約20分鐘左右。湯底都幾多選擇，大路口味當然就唔會揀啦，我地都揀左重口味推薦（全部汁），當中有分大中小辣，始終第一次食，保守d，我揀左小辣，老公揀中辣。蘿白+鮮魷魚鬚+粗麵+小辣 - 係我心目中，車仔麵係必食粗麵。蘿白比左三大舊，很入味，不錯。反而鮮魷魚鬚無乜驚喜，口感係有既，亦都夠彈牙，但味道就比較一般。重口味小辣湯底就好正，夠惹味，小辣對於我就剛好，加多一度辣應該攪唔掂。豬頭肉+牛腩+蘿白+公仔麵撈麵+重口味中辣 - 豬頭肉勁厚身，真係啖啖肉。牛腩就正常發揮。中辣撈公仔麵，我試左一啖就立即放棄，老公就食到標哂汁，不過佢話辣得好過癮。涼拌生腸 - 味道就唔錯，但稍嫌口感唔夠爽脆。煎釀三寶 - 煎得好靚仔，未食已經比個賣相吸引，入口的確夠香口，鯪魚肉好合我心意，因為竟然係冇蔥既，好好食。

華記係太子都好出名 ，收工時間日日都排長龍，有日早收工就同朋友去咗食。6點到都鋪頭，等咗三張枱大概15分鐘左右就入得去。入到去手機落單，原本想叫埋釀三寶可惜賣晒，之後就叫咗太陽餅（蝦餅）$40同新鮮魷魚鬚$45。魷魚鬚對我嚟講好辣但同時又好惹味，至於個麵滷水汁真係好好味，其他地方都食唔到，最好既地方豬大腸可以揀瘦既豬大腸。另外當日著白色衫，店員好好人上菜果時，提醒我同朋友食果時要小心啲要小心d湯汁彈到上身。至於值唔值得排隊等咁耐去食就見人見至啦🙈

呢間車仔麵 個別幾個餸係好食，湯底（唔夜去的話 係好嘅。。。。夜晚去會淡左） 舖面乾淨，我亦都冇話要食幾十蚊嘅麵 要有五星級服務， 說話講在前頭，我要分享兩次好受氣嘅經歷！大半年前 佢地個app有減3蚊優惠，但幾乎次次都係唔work,去到cashier 會自動減俾我， 除左有一次，銀白髮短辮男，態度惡劣好似當我去乞果三蚊優惠咁， 我幾個月唔去了！ 利申：本人住得好近，通常一人午餐食呢啲幾十蚊嘅麵，係幾好嘅選擇。 點解受過第一次氣仲會去， 因為我之後幫襯 都係要望到果個男職員唔喺度先入去。第二次，發生喺今日，門口有一對情侶排隊，我喺佢地後面，短髮四眼男職員拉開玻璃門，我話一位， 佢叫我排隊， 我隔住玻璃望下入面有冇人似係走 （我都趕趕地時間，考慮下排唔排） 喺我冇打情侶尖，只隔住玻璃門望入面，呢個男職員大聲喝我， 指令我向左排 （門口冇指示向左定右排 而前面果對男女又平排企嘅）眼神、語氣 態度兇狠到 以為光顧緊三合會店舖！所以，無可否認呢間舖有啲野係幾好食、抵食， 但記得，你就算未幫襯，要注意：1⃣排隊都唔好望下估下自己要排幾耐！2⃣ 即使隔住玻璃門望都唔得架！3⃣職員叫你排左就排左

最近唔係咁鍾意食飯，呢晚收工就去左之前經過呢間食車仔麵嘅一試！車仔麵嘅配料超多選擇！但我比另一樣野吸引左👀就係早排成日想食嘅牛雜河啦！！咁仲好啦，唔使揀得咁辛苦😛牛雜河$45好好食！河粉夠滑！牛肚、牛肺、牛蒡、牛腸！！全部整得好正！口質好，味道好！唔會有怪味👍🏼辣椒油都一定要試試！又香又夠辣！加埋落粉麵度食更加惹味！以後又多一間收夜可以去食嘅鋪頭啦😄

華記潮州滷水車仔麵🍜📍 太子界限街34號民興大廈地舖❐❐❐❐❐❐❐❐❐❐❐❐❐❐❐❐❐❐❐❐❐❐❐❐❐❐❐小編最近試左車仔麵關注組力推既人氣車仔麵🌝，真係不愧為人氣車仔麵，去既當日係星期日，五點幾左右，竟然大排長龍😱，一場嚟到，點都要試一試既😂，好在等左二十分鐘左右就有位。 呢間鋪頭主打秘製滷水汁，而佢地既餸菜同埋湯底都好入味🤩。而我就一於點左出面少有既牛肺，果然⋯⋯⋯⋯真係好好味🤤， 係牛既系列都好好味😋，鐘意食牛既朋友仔真係唔可以錯過😏👍🏻，而普通餸菜，例如魷魚、蘿蔔、冬菇等等⋯⋯⋯ 都ok 既。份量方面，小編就點左個四餸車仔麵，女仔食會覺得超多😂，但我都食得晒既🤭。🌟四餸車仔麵 $56整體推介指數：❤️❤️❤️❤️🤍❐❐❐❐❐❐❐❐❐❐❐❐❐❐❐❐❐❐❐❐❐❐❐❐❐❐❐

叫左個四餸車仔面,好失望,貴而唔好味牛肚、豬紅、雞亦尖、春卷、重口味小辣、河粉牛肚: 正常唔叫做好出色豬紅: 無味, 口感都唔好雞尖: 無味春卷: 正常野, 好難唔好食湯底無咩味, 小辣亦都唔辣河粉痴埋一餅野外賣到開餐食10分鐘內既事本次消費連汽水78元,唔平, 但唔好食

本來一班人聽介紹夜晚10點黎幫襯雖然都知12點關門 明白時間緊迫因為見到去到都多人要排隊 照排啦排到10點半嘅時候有一位四眼哥哥出黎問條隊幾多人前面兩pair二人 我哋6人 後面兩pair二人佢一聽到我哋6人 就好辛苦語重心長奉勸我地「唔好排勒你地 我哋做唔到 裡面滿晒」就唔理我地自己入返舖禁點解唔係問我地可唔可以分開坐我哋可以分開兩個兩個喎後面兩pair兩個人就可以入我都知生意好 唔稀罕做我哋生意但最基本嘅待客都做唔好👎🏻Blacklisted

我一直都好鐘意食各種內臟既食物有日無意中睇到人介紹呢度既牛雜呢日去開旺角 就順便落埋太子試試-晏就時間黎到成間舖都坐滿人大約等左10-15分鐘有位入面位置比較迫但都乾淨用QR落單我叫左牛筋+牛膀+牛腸另外朋友就叫牛筋+豬腩肉湯底我地都係叫左滷汁黎到就已經聞到好香試左啖湯 佢香但唔會覺得好咸餸嘅份量好足 係平時出面食開嘅2倍牛筋唔係入口就爛個隻 係有口感的牛膀好新鮮 每塊都好大片牛腸好乾淨 食落好有牛香豬腩肉唔係薄薄一片 有口感肥瘦均勻 肥膏係爽口個隻-呢間嘅餸好岩我口味 CP值又高如果鐘意食內臟 一定要去試下-😋分數：8.5/10推介：豬腩肉、牛膀

一直路經都見到好多人等位嘅滷水湯底車仔麵🍜，終於夾啱時間可以唔駛等直入，鋪內嘅滷水香濃，選用好多材料同秘方熬製而成，非常出色🤌🏼.———————————————————————————.🥢多拼車仔麵🍜💬餸料係逐款烹製過，叫咗豬皮、豆腐、雞翼、冬菇等，好入味，配上大量芫茜🌿，最主要係在於湯底，係精華嘅所在，飲得出係混入好多香料，非常有有誠意，好好味😋.🥢滷水蘿蔔豬什🐷💬粉腸、豬大腸、豬脷、豬耳、豬肚、豬心、生腸，真係又腍又入味，絕對係用心製作嘅美食😋.🥢太陽餅💬兩塊春卷皮包住豬肉、鮮蝦等餡料，非常有趣，而且香口又好食，唔小心又再叫多咗一碟😋

之前有個廚師kol YouTube 介紹、想試好耐，今日經過終於食到、夜晚7點人不算多，直入就有得坐。叫左碗牛雜河及煎釀三寶，先講鹵水牛雜河加腩汁。同其他地方唔同、係鹵水牛雜、唔係坊間的五香牛雜，牛肚及牛腸夠入味及軟熟，其他部位普普通通啦。但河粉質感唔得、明顯攞貨唔靚、至於湯頭就偏甜，唔係鹵水個隻甘甜。跟住叫左個煎釀三寶、好唔掂、首先係翻炸左好幾次、d料充滿黑油，食左兩啖就無食了，我係街邊求其一檔都好食過佢。

哇～呢間車仔麵真係一試就難忘，我真係好鍾意食車仔麵㗎，呢間主打嘅餸係潮州滷水系列，如果鍾意食內臟你一定會超鍾意，首先佢個湯底都幾濃幾鮮，仲可揀麻辣，滷水汁等等，如果鍾意重口味佢有個咩汁可加落去，而辣度都好夠，重點我會叫豬粉腸、牛肺，大腸等，真係滷到好入味，腍到又適中，佢啲內臟洗得好乾淨，一啲怪味都無，如果鍾意食蘿蔔都要叫，因為次次食都唔會有渣，仲要好入味吸哂湯好鮮甜，另外仲可要求多蔥花多芫荽，令到成碗車仔都好香

車仔麵我好少食 我覺得唔多野食可以比我揀但呢間 可以電話落單 揀想食既野 而且待應好好人 會提醒客人小心弄髒衣服今次食左蘿蔔冬菇春卷油麵 原來油麵都幾好食 蘿蔔好入味 冬菇就有嚼口 軟綿綿的春卷 利申：佢地既辣度好似提升左 （小心選擇）特別推介：蝦餅🦐 好好味👍🏻有一飯蝦係內面加埋佢個甜辣醬好好味😋#hkig#foodiehk#foodiegram#hkfoodblogger#foodiegraphy#foodloves#foodstagram#happysharing#hkfood#foodie#香港美食#吃貨#手機食先#相機食先#foodoftheday#foodphotography#followme#likeoflikes#hkeats#hkrestaurant#followback#美味#hkfoodie #newtownplaza #太子 #太子美食