又到糧尾唔知食咩好？雖然話慳得就慳，但都唔代表要食一式一樣嘅碟頭飯，或者唔健康嘅快餐嘅。日本人鐘意喺夏天食鰻魚補身，計開飯仔話打工仔女到月底都要補一補！以下10間餐廳嘅鰻魚飯埋單都唔洗$100，總有一間近你屋企或者辦公室！
日本人主理紅磡小店 三河屋
圖：hana花
講到抵食鰻魚飯，唔少老饕應該第一時間諗起呢間紅磡小店，雖然門面同普通港式餐廳無異，但唔單止入到去就有日本家庭餐館Feel，而且仲係由真·日本人主理。呢度嘅鰻魚飯送埋麵豉湯都係$88，半條蒲燒鰻魚鋪上珍珠米飯上面。雖然無其他配菜，但鰻魚夠肥美鬆化無細骨，而且有焦香，無得輸。
尖沙咀荷葉香鰻魚飯 德美壽司
尖沙咀厚福街其實都有唔少抵食餐廳，包括呢間壽司店。佢地嘅鰻魚飯定食都係$79，用方形木架上枱，而且特別在仲加多塊荷葉包住，多一份清香。鰻魚夠厚身肥美，配埋蛋絲同醒胃醃黃蘿蔔，係小清新版本嘅鰻魚飯。不過稍嫌鰻魚汁唔係好夠，多啲用嚟撈飯就更好喇。
大埔街坊居酒屋 八鯨料理
唔單止九龍區，其實新界區一樣有唔少有心機嘅日式餐廳，呢間係唔少大埔街坊心目中嘅推介，鰻魚飯連埋沙律同麵豉湯都係$64，星期一至五學生仲有午市優惠$59！定價唔高不過無將貨就價，大半條鰻魚一樣香噴噴，醬汁偏甜啱哂送飯。
荃灣屋村日式快餐 和食快餐
正所謂低處未算低，開飯仔我指價錢咋，因為荃灣呢間快餐店嘅鰻魚飯一碗都係$58！唔好以為咁平無好嘢，其實店主都係真·日本人，小店無靚裝修，但鰻魚分量唔細又夠肥美，最重要嘅係仲有支燒鰻魚汁畀大家任落！重口味人士可以多汁撈飯啦。
尖沙咀一人前小食堂 東京食堂
圖：ms.b
尖沙咀呢間日式食堂位置比較偏僻，座位亦唔多，一班Friend嚟反而無咁方便，最啱一支公去食。佢地嘅蒲燒鰻魚飯（半條）包埋麵豉湯同茶盛惠$68，鰻魚肉質細嫩而且細骨唔多，珍珠米飯上面仲有飯素，就算係細食嘅女仔都唔怕食唔哂啲飯啦。
西環版深夜食堂 萬家廚房
圖：Pigsy
以前唔少餐廳或者士多都係前舖後居，呢間就係前面餐廳後面超市，同超市一樣食材大部分都係日本來貨。佢地嘅鰻魚飯特別用日本京都鰻魚同越光米，都係$88一碗。不過記得留意，餐廳部分暫時只做晚市，幸好開到凌晨兩點，OT完嚟食都得。
牛頭角大埔邪惡芝士版本 秋月居
想試下新嘢？都得！呢間日本餐廳喺牛頭角同大埔都有分店，而且都有供應呢個$78嘅蒲燒鰻魚芝士蛋包鐵板飯，無錯，係鐵板上嘅蛋包飯呀！鐵板Keep住熱力，所以個蛋包飯仲會有少少拉芝效果，芝士蛋包飯加茄汁香得嚟夠哂飽肚，主角鰻魚亦厚身大件。
將軍澳隱蔽料理店 瀛 ‧ 日式料理
圖：joggling
又一間隱蔽日本料理，今次喺將軍澳坑口村，蒲燒鰻魚定食一份連埋前菜、麵豉湯、日式蒸蛋定價都係$88。睇返鰻魚飯個Package又的確唔錯，鰻魚肥美油潤，燒過之後賣相誘人，醬汁亦夠味而且分量啱啱好，食下食下一碗鰻魚飯話都無咁易就清完啦。
筲箕灣Fusion籠仔飯 南駅
圖：喂食仔
唔少吃貨都鐘意用鰻魚汁撈飯食，撈珍珠米飯就當然好食啦，撈糯米飯你又有無興趣試？筲箕灣呢間Fusion餐廳除咗海南雞飯，仲有呢個籠仔鰻魚糯米飯，分量唔細但都係$68一份。荷葉糯米飯蒸得夠軟身，撈埋微甜嘅鰻魚汁估唔到咁夾。
粉嶺工廈有驚喜 What The Food Cafe
入到粉嶺。除咗聯和墟嘅平民美食之外，就要數到工廈呢間Cafe，招牌菜蒲燒鰻魚蛋包飯 $76唔算貴，因為碟飯都相當有分量，鰻魚夠大件，下面嘅滑溜嘅半熟蛋大到包哂成碟飯仲有剩，連下面嘅飯都唔係普通白飯，而係加咗鰻魚汁，食落有驚喜。
開飯編輯推介：
1. 【專訪】「我喜歡堅持 我只得堅持」 新入圍米芝蓮法式泡芙店谷底反彈
3. 10月份好評餐廳十強
熱門文章推介：
3. 精選芋圓甜品舖PK戰
隨時接收最新資訊
讚好OpenRice專頁！