東江大飯店

營業中

休息中

** 此食肆的第四個OK **8-3-2008(Sat)媽建議出街食飯,因為唔知煮咩餸好,但約唔到大哥同大嫂,只有我同雙親食啦.我提議食正宗客家菜,想去大圍港興的,但爸話遠,咁K ..咁東江囉.約7:00pm o黎到,樓下滿座,於是上樓上,樓上亦都係,且好多已留位,爸話去第二間啦,落到地下,原本o係我o地後面o個四個客人問樓面係咪一定要book位,樓面叫佢留低電話,有枱就call佢o地,因佢o地塞住個門口我o地走唔到,於是佢o地走o左後,我就想留電話,此時另一個樓面走o黎話有張四人枱就走,先前個樓面想叫返o個四個人,但佢o地走o左.佢見我o地三個人,於是畀我o地坐o個張長方枱.我o地冇尖隊o既呢.坐低後,好耐至畀茶,花生,兩碟沙薑同一碟豆板醬我o地,我o地睇餐牌,好多選擇,花多眼亂呢,同爸爸商量好耐,終於叫o左1.必叫o既鹽焗雞半隻$84.00好快到o黎,好大隻.我唔點沙薑試吓先,唔….有雞味,肉實,但唔夠鹽焗味,麻麻地,一定要點沙薑食,咁就變o左係沙薑雞唔係鹽焗雞.好懷念以前醉瓊樓o既鹽焗雞,o衣o家係咪多數都係鹽水雞呢?而且覺得呢隻冇o係九龍城南記飯店o既咸雞好食.味道: 1分2.

住荃灣咁耐, 聽過佢既歷史, 於是今晚走黎試下先!同老公食野唔多, 所以叫野會就住就住, 唔想浪費, 昨晚食左雞, 今晚黎試下五柳魚, $4x, 條魚炸到好硬, 真係自己整都好食過佢! 配菜幾多, 但我唔係黎食酸薑, 五柳菜! 另叫左碟灼菜心, $3x, 一般! 連茶錢, 一碗白飯連加一, $110!

在荃灣住了十多年，一次都未來過這裏吃東西，每次搭車經過沙咀道，看見這裏的老式裝修，和門口的幾缸魚，就好有衝動想入去食番餐。不過，每次都是過門不入。今晚無煮飯，個仔仲係term break唔使返學，佢竟話想o黎呢度食。於是一行三人，來呢度食飯。晚上九點未夠，樓下得另一檯人。我們坐低，叫了三個菜：鹽焗雞、炸大腸和菜遠炒牛肉。鹽焗雞真的乏善足陳，不香不滑，兼夾熱度不夠。炸大腸也好像擺了一輪才拿出來似的，完全沒有熱度。至於菜遠牛肉，梳打味勁到離奇。唉！希望今次係大廚偶然失手，否則，以這樣的水準，竟可以企咁耐，真令人費解。還有的是，整間餐室有一股怪味，十分難聞。而廁所也十分不乾淨。飯後也沒有糖水之類送。找數二佰二十大元。拜拜，下次唔會再來。

行完山去荃灣join埋屋企人食飯，不用諗要了3-4位套餐，再加其他小菜。鹽焗雞，只是半隻，份量唔少，不會過鹹，味道恰好，雞痴的細妹好鐘意。客家什錦煲-有豆腐、牛丸、墨丸、肉碎、豬內臟加生菜的雜滾湯。我以為客家菜的豆腐好出名，呢煲d豆腐好鞋。荷蘭豆炒臘味-太油，臘味本身已多油膩，而且又落得太多油炒。京都肉排-味道好好，醬汁調教得不錯，豬扒亦大塊鬆化。豉汁煎倉魚-蒸得剛熟、肉質唔鞋，因為用豉汁蒸的關係，幾野味。另加了生炒骨及楊州炒飯。生炒骨好差，每件骨都細細粒，冇咬口外，而且勁諗唔脆。楊州炒飯-雖然炒得唔油，但飯身好淋，完全唔爽口。總體來講，水準一般，價錢合理，普通的出街食飯，都食得過的。

呢次帶埋隻兔公唻, 佢第一次唻表現得好好奇. 佢想知道, 呢間野點樣咁吸引到狗老豆老母鐘意唻食. 食客中多數係上年紀或一家大細而唻, 咁多只得我地呢情侶檔. 我地可算係老牌食館既稀客. 兔公覺得d野食份量幾巨下, 可謂大件夾抵食. 眼見近食客都係食剩, 大都要搵個盒包番走, 連我地當晚都唔例外. 豆腐湯清甜, 好少食到大大舊既豆腐, 細食d齋食豆腐都可食飽. 傳統既梅菜扣肉, 上時仲用緊兔公至鐘意既綠豆青碗cover住, 伙記一拎開, 肉騰騰香味撲鼻而來, 非常間唔中食下d 肥肉還可以, 或者用佢d醬汁撈飯都唔錯. 白切雞大大舊啖啖肉, 仲係雞背滑肉, 岩晒兔公. 皆因佢唔鐘意食雞胸. 呢餐百零蚊. 又食又拎. 可以再唻. 佢有地下同閣樓位, 下次定必坐樓上感受一下.

鹽焗雞味道的確不錯，但隻雞略瘦，肉較少。另外，午飯時間（星期一至日）大部份的客都是附近地盤的工作人員，這可能與此店的午市平價碟頭飯（約$25連湯）有關。

0係荃灣搵食咁耐, 都未黎過呢間度食野, 今日就同屋企人黎試下.一坐低就叫左半隻鹽焗雞, 白果豬肚湯, 椒鹽白飯魚同菜。等等等, 等左50分鐘, d野食都仲未黎, 吹d伙記, 又係愛理不理, 點知隔黎, 遲我地好多先叫野食, 又係叫白果豬肚湯, 竟然黎先過我地, 除左我地呢, 其他食客都開始唔耐煩, 原來有一等左1個鐘碟炸大腸都未黎。講返d野食, 可能我自己唔鐘意白果味, 對個白果豬肚湯無咩意見, 不過屋企人就覺得好好味, 白果亦都煲得好淋, 鹽焗雞真係好好食, 好滑, 媽媽話係黃油雞, 所以好味好多, 椒鹽白飯魚就好普通, 一般水準。埋單27x, 都幾合理, 但係野食只係食左半個鐘, 等左成個鐘, 對我黎講就幾難接受喇。

又係由細食到大一間店, 細時去荃灣街, 狗老豆老母帶我食中式, 就係東江, 西式就係莎樂美, 佢係隔籬鄰舍...可謂中西孖寶.鹽焗雞可說係印象至深, 夠晒雞味, 皮滑肉, 狗老豆至愛. 不過唔知中式食店係咪走不出呢個弱點, 就係伙計服務, 佢工作態度, 令人覺得係做又36, 唔做又36. 始終服務行業, 咪怕貨比貨, 切忌交行貨.

3人晚飯, 奶奶想食正宗鹽焗雞, 佢建議此店.之前一直覺得東江又貴, 裝修又舊, 唔願幫襯. 有人請又係另一回事. 叫左:鹽焗雞半隻$78 - 冇得頂, 滑, 入味, 用靚黃油雞, 又夠熟.客家雜錦煲$48 - 好似潮式滾湯, 用生菜加肉丸, 最特別係家鄉魚腐, 雖然我覺得有少少雪味, 但勝在只得呢度有. 百花釀大腸$68 - 本來係想叫炸大腸, 唔小心叫錯左. 但有驚喜! 用墨魚膠包住大腸炸, 最重要是個紅卜卜的酸甜汁, 絕對是精髓所在.另加三支細樽可樂(超冰凍), 三碗白飯.呢一餐, 同上次在荃灣客家好棧食的一餐, 實在好太太太多喇. 自潮樓之後, 又一次證明稻香食肆有形冇神之缺點.

朋友話好耐無o黎過，而且我又未試過，所以大家都決定o黎食。好彩早一步到，遲d o黎要企門口等位。四個人叫了一個268蚊套餐，當然有招牌鹽焗雞(半隻) 、京都骨、三鮮骨髓、客家釀豆腐及冬瓜粒湯。鹽焗雞d肉算嫩，勝在味道o岩o岩好，唔會過咸；京都骨啖啖肉，一d肥膏都無；釀豆腐一般啦，可惜墊底的黃豆少，因為醉瓊樓勁多黃豆墊底；三鮮骨髓成碟清晒，一條都無剩。我o地見到其也客人好多都有叫梅菜鯇魚，又大條又正又只係40蚊，所以再加一碟梅菜鯇魚，梅菜唔咸，鯇魚肉新嫩，又係成條食晒。個個食到飽飽，埋單到係330蚊，抵到難。