Cafe Whale

營業中

休息中

太安樓食Tea真係有D難度，最主要係無乜得幾間可以坐得舒服，就算有嘅，下午茶時段又會落場唔開門做生意，不過呢一間Cafe就解決晒以上嘅難題。因為個Friend話Tea Time想食得健康D，於是佢就叫咗封門柳沙律，佢嘅份量都好足，D封門柳唔會得三幾片，而且個肉質同味道都唔錯，而D沙律用蔬菜都幾新鮮，唔會有出水嘅情況，仲有得揀芝麻醬同柚子醋，真係唔錯。至於我就梗係邪惡D揀咗個炸魚柳件，佢呢度個名叫魚仲，一份有5至6件左右，餐牌話魚市場直送，食落又真係同平時其他地方食到嘅好唔同，真係新鮮D，配菜都係用返封門柳沙律嗰D沙律菜而唔係求其用D下欄野，佢用黎點炸魚柳件嘅醬好正，唔好睇佢係白色就以為係沙律醬咁簡單，我覺得佢係用法式他他醬再溝沙律醬嘅。最後仲叫多份薯條，佢呢度嘅薯條即叫即炸，所以味道好正。

呢幅相衣家睇返都影得幾衰，不過呢個Burger真係好掂，由件騸牯牛肉漢堡扒到個麵包至到入面D醬汁再連埋個包入面D菜都係好食，而且明顯係新鮮嘅材料，$108連埋細薯條同埋汽水一罐都算合理。手打騸牯牛Burger真係好少見，對於漢堡包入面舊肉，我自己都比較prefer人手打instead of用機攪，因為人手打先至出到有粗有幼同大大小小的肉粒肉碎口感。個騸牯牛嘅牛肉味都幾出，唔會好似安格斯或者和牛一味得個Heavy的感覺，所以食完之後飽得黎又唔會好滯。

呢一個價值$68的魚湯烏冬真係不得了，CP值同性價比都非常高，聽講每日限量10碗左右，點解我會知？因為我叫咗最後一碗，之後有客人黎想叫，侍應姐姐話已經賣晒而且每日得10碗，Lucky!!一份魚湯烏冬仲包一份小食，可以揀麻辣魚扣或者話梅漬番茄仔，我揀咗麻辣魚扣，其實又唔算好辣，食落去有D似豬耳，煙煙韌韌都幾爽口。佢個烏冬都幾滑，當然最正係個魚湯，好鮮味，應該要用大量新鮮魚先煲到呢個雪白嘅魚湯，我全碗飲晒，好滿足。除咗烏冬之外，佢仲有魚蛋同魚片頭，都幾爽口彈牙。$68仲送汽水，物超所值。

還記得上次光顧點了回味無窮的魚湯烏冬，當時已決定下次要試這店的漢堡包，機會終於來了，點了芥末蛋黃醬吉列墨魚漢堡和安格斯珍寶牛肉漢堡，晚餐時間堂食還有免費薯條贈送，真的令人喜出望外。這就是吉列墨魚漢堡的真身，中間的吉列墨魚很有彈性，其實就是手打墨魚餅中加入墨魚粒，所以吃起來很有層次感和口感，配予的蛋黃醬亦和吉列墨魚非常匹配。安格斯牛肉漢堡的牛肉質素高，加上厚身的漢堡扒，實在令人欲罷不能，一邊吃一邊有很滿足的感覺。因點了兩個包，所以送上兩份細薯條一拼上，而且還送汽水，真正物超所值的一餐。

香煎封門柳沙律配芝麻汁$108真係物有所值，因為比起其他地方食到嘅類似沙律(通常係牛柳或者薄牛扒嗰啲)，佢呢度係用封門柳，牛味濃郁而且鮮嫩，同埋份量比想像中多，所以性價比算高。小食系列之炸雞鎚$64就相對平淡咗少少，不過味道都ok嘅，只係未有太大驚喜，喲拌碟嘅沙律菜質素都算高唔係求其切啲菜落去。小食系列之烤焗魷魚乾$48都幾香口，特別推介佢個醬，自家製好掂。主角出場，就係炸軟殻蟹Burger，佢哋嘅軟殻蟹似乎係自己炸而唔係出面交貨返黎，所以啲炸粉好薄身，而且件軟殻蟹亦唔會一大陣雪味。堂食仲有薯條同汽水送真心正。

喺太安樓一條比較靜既橫巷，見到有間新開既burger鋪，當然要試下避風塘軟殼蟹漢堡上網見到其他人個漿係飛魚子蛋黃漿，落左order先發現嗰日係避風塘風味，可惜😢個軟殼蟹真係炸得唔錯，粉薄得黎又夠脆，只係避風塘口味有少少辣，好食但好熱氣和牛竹炭漢堡個包有陣特別既竹炭香味，和牛漢堡有點太熟，但依然好juicy手打騸牯牛漢堡呢個肉味更重，口感比較結實，而且煎得岩岩好，比和牛竹炭堡更好味除左漢堡，下午茶既沙嗲牛肉麵亦係誠意之作，牛肉好食之餘 沙嗲味好濃，比茶餐廳更好食另外魚湯烏冬就飲得出係用鮮魚黎熬製，鮮得黎有少少腥味，我諗老闆要諗下點樣去腥整體黎講，食物質素係高既，可惜鋪頭位置唔好，平時比較少人行呢條巷，所以我中午1點半左右去，都係得2枱客。而由於係即叫即整既關係，人雖然少但依然要等15分鐘以上先有食物上枱。不過，係值得再encore既❤️

今天的主角是魚，不過在一家Coffee Shop食呢兩樣野(魚湯烏冬同炸魚仲(魚柳))感覺係有D奇，不過無所謂，最緊要好食。先來個小食，漁市場直送的炸魚仲，一份有6件，鮮魚味好香濃，而且好Juicy，唔會炸到乾晒硬晒，皮頭的炸粉漿唔會太厚，咬開件魚仲入面D魚肉係一梳梳嘅，新鮮程度都幾高，同埋係即叫即炸唔係炸定然後再翻炸。呢度嘅魚湯烏冬真心佩服，其實就係魚蛋魚片頭烏冬，不過個Selling Point要講「魚湯」呢兩個字，佢個魚湯應該係亮點。白白的魚湯無化學味無味精味，似乎真係用新鮮魚去煲，似係傳說中的雜魚湯，不過佢比一般雜魚湯嘅魚味會再濃D，但係又一D都無魚醒味。另外佢有兩粒話梅番茄仔，冷盤黎嘅，酸酸地，開胃好味道。

呢度嘅burger同小食都好出眾好出位。炸番薯條甜甜地好味道，店長話攤一攤先好食因爲即叫即炸，真係熱辣辣。炸雞鎚唔係一般食到嗰啲，佢係有一條骨露出黎嘅，加埋個汁好食喲。炸魚仲一碟5件，用新鮮魚黎整好似有喲浪費，始終都係用黎炸，不過味道真係唔錯，浪費喲都值得。鱔仔乾個個都話最正，脆卜卜點沙律醬好味道。吉列墨魚漢堡舊炸墨魚餅好好吃，食到入面有一粒粒墨魚粒，有啃口，個醬好似係蛋黃醬，好夾喲味。招牌魚柳包用新鮮龍躉做真係真材實料，新鮮野就係無得輸。

今日叫咗個炸魚柳加薯條嘅下午茶餐，唔好睇小佢只有三件炸魚柳同埋一小盤薯條，其實都幾飽肚。佢嘅炸魚柳做得好好食，主要原因就係老闆真係用新鮮魚去炸，而唔係用超級市場嗰啲魚手指又或者係冰封嘅炸魚柳去炸，一咬開見到魚肉嘅質素就唔明點解佢味道咁好，始終食材對於味道嚟講係重要嘅，印象中真係冇乜邊度試過炸魚柳係真係食得出有魚味。個餐送罐裝或者紙包裝飲品，雪櫃自己任揀。雖然下午茶餐要$45睇落去好似有啲貴，不過我夠膽講真係物超所值。

Weekend諗唔到食咩？一定要試下食呢間小店，佢哋嘅Burger真心超好食，大大份，啲肉又juicy。套餐仲會送汽水飲品一罐。芥末蛋黃醬吉烈墨魚🦑漢堡。呢個真係不得了，超正。入面塊墨魚漢堡好厚，咬落去好juicy。手打騸牯牛漢堡呢款牛肉名好特別，食落口感唔算冧身，但牛味濃，肉汁都多。整體漢堡夠大份，男人都食得飽嘅，高水準，值得一試。

呢一間雖然係一間Cafe，不過其實佢主要係做漢堡包的，當中有兩款Burger係用和牛做的，上次試咗個竹炭和牛漢堡，好Rich口感比較豐盈而且因為和牛嘅油份關係所以食落會比較滯。今日就試咗另一款和牛Burger黎比較一下，今日呢個竹炭吉列和牛孖芝漢堡。竹炭其實就係指個包係黑色的竹炭麵包，孖芝唔洗我講就當然係佢有兩塊芝士啦，不過估唔到件和牛漢堡扒做咗吉列之後竟然降低咗個油膩感，食咗都真係無咁滯，因為做咗吉列嘅原故所以就外脆內軟，味道同食落去嘅感覺都真係唔錯。佢D薯條都幾好食，始終即叫即炸係會好食D嘅，依家晚市堂食如果叫Burger仲有半份薯條送，同埋佢本身叫主食(即係Burger、飯、沙律或者烏冬)都會送罐裝汽水，好抵食呀。

放工同朋友黎到泰安樓食dinner 去左呢間cafe 食burger 大概8點到都冇咩人 主菜：牛肉burger 叫左個牛肉炭竹漢堡包 安格斯牛肉好大舊 多汁 同埋嫩滑 燒到岩岩好 8-9 成熟左右 同埋一埋生菜蕃茄加埋自家制醬汁 炭竹包第一次食幾特別 整體都好好食 個set 連埋個半份薯條 即炸 好大條 同埋新鮮 一定要有 最後仲有杯野飲 竟然有soda water 唔多地方有 整體來說 不過不失 $88 一個set 唔洗加一 算係咁 但份量偏細 唔岩大食人士

呢間店嘅burger都幾有特式，我地揀咗軟殻蟹burger同埋騸牯牛burger，兩個都唔錯，佢本身送罐裝汽水，衣家晚上6點後堂食仲送多半份薯條，真係好抵食。騸牯牛呢個名聽就聽得多，出面打邊爐都試過，不過用黎候burger都係第一次，肉質偏韌，肉味都算濃，牛魔王至愛，另外想講嘅就係佢入面嘅蔬菜都幾新鮮，d菜葉唔會霉。呢個軟殻蟹burger幾過癮，對蟹鉗凸晒出黎，薄薄的炸粉唔會令你淨係食到粉，以炸野黎講佢都幾新鮮。因爲我地叫咗兩個包，所以有兩個免費的半份薯條，夾埋一份出，份量都好足，薯條食得出新鮮炸起，高質。

天氣真的太熱，來個啤酒再點一些小食比正正經經吃個正餐來得更暢快，看見這家Cafe竟然有日本Suntory生啤於是便坐下來。它有Larger和黑啤，我就來個黑白mix，真的透心涼，爽YY，始終天氣真的太熱了，喝了一半才記得影相。點了兩款小食，先點的是炸雞鎚，後來見到有外邊比較少見的炸番薯條，所以也來一客。炸雞鎚也不是一般的，這款是露出雞骨的，味道和肉質都不錯，有沙律菜拌碟。炸番薯條的份量比想像之中的多，甜甜的番薯味很好吃，用來餸啤酒真的是絕佳配答。

呢一個叫鱔仔乾，其實係鱔嘅骨連住少少肉，封乾咗之後再攞去炸脆佢，食嘅時候都幾香口，而且雖然佢係鱔嘅骨，不過因為炸脆咗所以可以吞落肚都唔會「吉」親，另外佢個沙律醬如果點埋就無咁乾，我自己就覺得唔洗點都OK，呢個小食比較少見，幾好味。主菜就要咗個芥末蛋黃醬吉烈墨魚Burger，佢地服務好好仲幫我將個Burger切開兩邊等我可以容易D食。佢個吉烈墨魚都幾彈牙，店長話係自己打而唔係買外面現成嘅，咁又真係好食嘅。佢個芥末蛋黃醬都唔錯，同個吉烈墨魚都幾夾。