爵士拉麵

Open Now

Now Closed

而家工作都並非一個固定地點，有日咁啱比人掟咗去粉嶺做嘢，無法啦又要一個人隨地解決午餐。於是行到去聯和墟，咁巧合見到呢間拉麵店，見個名叫「爵士拉麵」就一下子吸引咗入去。店鋪不是十分大，但裝潢舒適，店鋪放咗啲漫畫啊、菊嘅花樽、舊式風扇等等，呢種隨意嘅佈局，予人一種番到屋企嘅感覺。睇下菜單，除咗拉麵類，背面仲有小食類；拉麵分別有大細之分，基於我想食平啲同想試下佢地嘅醬油蛋，所以我就柯打咗細碗嘅雜錦拉麵，而湯底則揀咗味噌湯。中午時段都幾多街坊幫襯，稍微等咗一陣，拉麵先到。第一個感覺係，真係一碗好樸實嘅拉麵啊！可能因為環境影響，就連碗都相當家庭式嘅感覺。基本上，我覺得雜錦可以食到最多嘢，除咗蛋、蟹柳、粟米呢啲，意相不到竟然仲有一片叉燒呢。麵嘅份量適量，麵身唔係好幼個款，中粗度，彈牙有嚼勁。湯濃郁但唔會係超咸個種，食完無好口乾嘅感覺。雖然佢個樣係好樸素，但食完相當有飽腹感，馬上暖笠笠。總結，後尾問番住粉嶺區嘅朋友先知，原來呢間鋪已經開咗好耐，轉咗第二代之後，人手比較不足，所以唔係成日開鋪。有見及此，有興趣嘅朋友，光臨之前可以致電去店鋪電話再出發啊！

爵士拉麵🍜喺粉嶺已經好多年要食到真係好講緣份因為佢唔係日日開門門口貼咗張月曆 show咗幾時放假，幾時開門不過我都試過幾次摸門釘😣穩陣起見我都會打個電話問下有無開門先搭車入去店舖不大 所以晚市通常都要等位排隊時已經諗定食咩入到去好快就有得食😋百吃不厭的日式炸豆腐外脆內裡係滑一滑的豆腐，配埋木魚汁今次試埋個炸雞即叫即炸 好香口 炸完都仲係咁juicy 炸粉漿不會太厚加少少檸檬汁 感覺更清新炸年糕拉麵🍜平時炸年糕都係當小食咁叫今次配拉麵又幾特別年糕炸都熱辣辣 一口咬落去. 煙煙韌韌咁拉麵軟硬度適中醬油湯 不油不會太咸年糕+拉麵. 超飽呀！

爵士是我和太太的喜愛拉面店，由老店主時已開始幫襯。只談食物：什錦拉面－醬油底－湯咸味適中，胡椒不放更佳－面質保持，彈牙而少梘水味－配料很一般叉燒拉面－醬酒底－湯底／面質一樣不重覆了－叉燒味淡，比較厚，有點肥膏，唔算好腍，這方面各有喜好，我個人不太欣賞凍豆腐－這一味抵打。－豆腐選用硬豆腐是敗筆，應該用滑豆腐－醬酒過咸，因為是放在一起所以豆腐是越食越咸＊聽說老店主小村先生已去世（未証實）最近有親人離世，也希望繼續支持女兒小村小姐。

唔好誤會，依度嘅拉麵真係好似係日本食嘅拉麵點解我會寫香港味度，稍後再講！地點好易搵，係聯和墟街市附近，行幾分鐘就到內裡唔係太大! 我估有20個位掛（無特別數）但都坐得好舒服今日大約1pm到，唔使等位！都幾多選擇，本來想吃“爵士拉麵”咩都有但因為又想食小食，所以就叫左“叉燒拉麵”+“日式炸年糕”依個年糕口感好好，但就咁吃係無味所以要點個汁醬油味叉燒拉麵個人係日本食嘅時候，一般較濃味，有啲喊今次食到的較岩我個人好味，但又不失日本風味麵質亦好似係日本食咁好爽好彈牙所以絕對值得一試可惜逢星期一，二都會休息仲有不定期的休息所以如果係特登去食嘅話，就打個電話去先

是日無無聊聊，諗唔到食乜，諗起好似好耐無食過拉麵，就同老闆講想食拉麵。老闆直接就帶左我嚟呢度。佢鋪仔細細，十零個位，應該係快來快去格，老闆點左我想要的义燒拉麵，我唯有揀第二個，叫左中辣肥牛拉麵。一嚟到，嘩，點呀？你係拉麵定油面呀？啲牛肉好似打邊爐“6“老曬嘅咁。就連老闆個义燒拉麵都變左豬油拉麵。。。好慶幸我只叫左細碗，唔係都幾難捱。去嘅時候係下午一點幾，無其他食客，係店員亦匆忙趕收工，係咪令到碗面唔好食嘅原因，我唔知，不過拉麵嘅特質，喺度一啲都見唔到

自從太子女正式主理後我反而多來幫襯咗，可能以前佢日本父皇主理時令作為食客既我有壓力，老闆又被人很寸的感覺，而家阿女主理親民好多！提提非區內居民，記得他們不定休，最好先致電才去品嚐！

聯和墟對我來說，話近唔近，話遠唔遠，很少會特地來吃東西。剛好經過曾經風靡一時的爵士拉麵，才發現從未試過。擇日不如撞日，今晚就來吃個麵吧。 坐落在聯和墟舊街市旁，平時不會經過。 一貫拉麵店的簡單裝修。書架上有幾set讀書時沉迷的漫畫書，令人回味。 我們坐在吧枱，欣賞女師傅手起架落的煮麵英姿。 除了常吃的叉燒拉麵，還有幾款自家創作。肥牛、炸年糕拉麵，太有趣吧？ 不設第二次落單，食完好讓出位置給其他客人。 落單後就要俾錢，直接、免混亂。 醬油底叉燒拉麵 $70 叉燒偏瘦，有點痴牙，口感一般。拉麵帶點鹼水味，軟硬還算適中，略嫌不夠彈牙。 餐牌已事先聲明所有湯底會落胡椒粉，但没想過會咁重手。除了胡椒，完全吃不到醬油味，嚐不到味道如何較清⋯⋯ 味噌湯叉燒拉麵 $72 味噌湯底（另加$2）看似濃味一點，但同樣，胡椒味蓋過一切。愈吃愈覺得自己食緊fusion胡椒肚豬肚湯拉麵⋯⋯ 溏心蛋 $12 溏心蛋算合格。可能湯底的胡椒太濃烈吧，這棵蛋毫不入味。正確來說，接近無味。 也許店主覺得要為食客驅身保健吧？完全想不到這個胡椒湯底，同拉麵如何有效地夾⋯⋯

通常去聯和墟就係去食豬手米朋友話嗰度附近有間食拉麵幾好所以就揸車過去食但係諗起好多拉麵店都收下晝所以特登打個電話去確認有冇得食先去到見到佢真係寫會不定期休息 所以一定要打電話第一次食緊係食招牌面啦我地二人要左一碗爵士拉麵醬油湯底 小碗同一碗爵士拉麵味增湯底 中碗餸嘅份量係幾多下肥牛肥瘦適中 香牛味 唔韌 但有咬口叉燒係比較厚切的，但又硬又鞋好似煲完湯啲豬肉咁隻蛋唔算溏心 過左D火 蛋白已經幾乎熟晒蛋黃邊都熟晒雜錦係普通嘅雪藏蟹柳 同罐頭粟米塊紫菜成塊浸晒喺水裏面 面目全非 都唔認得佢係一塊紫菜 麵係少少偏硬 幾煙韌 不錯的醬油湯底係幾清嘅 唔太咸 唔油 冇味精味增湯底幾香 飲得出係淆出來嘅湯但唔油膩 飲得多都唔覺滯小碗面嘅份量真係幾少 但爵士拉麵D餸好多， 所以都好飽但如果叫其他一個餸可能小碗會唔夠食但感覺呢間野唔係好傳統日本 其實都幾港式坐吧枱可以睇到廚房裏面響日本食店唔會見到個廚房立立亂同埋個blue girl 嘅stand 再加杯暖茶(見圖)真係幾似茶餐廳如果住附近有時去食下午餐都可以但如果特登揸車去食佢 好似唔太值得

今日酷熱天氣，去到聯和虛見到爵士拉麵就好想食。我地叫左两碗麵，呢到拉麵唔算多款，但價錢好相宜。叉燒拉麵要左味噌湯加左隻糖心旦。味噌味好濃郁，拉麵偏軟，但叉燒份量好多😋叉燒偏瘦，岩哂唔鍾意肥嘅朋友。糖心蛋好好味，旦黃好香夠流心。肥牛拉麵 要左醬油湯底，醬油湯底偏清，岩哂宜家嘅天氣，牛肉用左壽喜燒汁去煮，食唔到甜醬油味但有少少偏辣，牛肉就同我地平時打邊爐嘅一樣。两個人食左160蚊左右，呢到係小店經營，只可以落一次order 。

首先講第一樣，店內提供麥茶，茶錢一蚊，重點係暖嘅! (唔係 order, 係坐低就俾你)吹噓咩正宗日本人開？搵傻仔信。。。食拉麵飲暖麥茶(相信本來係熱，放喺膠壺放到暖, 茶餐果隻膠壺)唔俾翻單果 d 營銷手法無意見，啅頭而已，今時今日越串越多人當係寶，犯賤也講返食物質素，試咗 98蚊嘅爵士拉麵中碗醬油湯底，塊紫菜細塊都算(細過包裝紫菜一格)，成塊係浸咗落湯入面墊底。。。份量方面肥牛真係幾多，不過叉燒係垃圾麵係同味千同級水準由上水特登揸車過聯和墟試傳說中食到算行運嘅爵士拉麵，失望北區食拉麵都係留返喺上水

聯和墟係一個古舊嘅舊區， 作為北區人嘅我對佢一啲都唔陌生， 因為呢個位置有好多懷舊經典及創新嘅食店 今次嚟到呢一間食過好多次嘅拉麵店爵士拉麵 要食呢一間拉麵店需要一定嘅幸運因為佢一個月入面有好多日子都唔會開舖，而且佢食嘢時段亦都好短， 所以能夠食到都算係一種幸運 以前食開呢間拉麵店都係一個應該係日本人嘅男老闆親自主理，而家應該係父親退咗休由囡囡繼承父親嘅業務繼續傳承日本拉麵嘅精神，實在值得抵讚我最鍾意食呢度嘅叉燒拉麵因為佢係用呢種厚厚既叉燒佩辛辣嘅味噌湯作為湯底，口感 彈牙有層次，雖然，女女嘅功夫仲未到達以前爸爸嘅層次，不過碗拉麵都算keep到好食值得推薦煎餃子 都依然係皮薄餡靚 入面嘅餡好多汁唔咸不過，黎食前最好打電話check下有無開

20170317(星期五)--時間大約下午六時，店內有數位客人，但仍有位置，廚房的女拉面廚師指定安排坐左邊的一個角落位，我也沒意見，反正一個人，也不會坐太久。店子不大，廚房是開放式，客人就坐在旁邊，可看到廚房運作，好像說現在是女兒接棒了，眼見煮麵的是一位年輕女子。點了雜錦拉麵醬油湯底(小$40)雜錦拉麵醬油湯底--材料有蟹柳、栗米、醬油蛋、海草和叉燒，湯底味道是屬於較清淡味道，沒有豬骨的肥膩，清清的醬油味也不錯，食物材料也沒甚特別，不過不失，拉麵麵質爽口，搭配湯底，味道特別。我點了小碗份量，份量真的很少，初小學生吃應夠飽，如當正餐吃，相信要點大碗。埋單: $41，有$1是茶錢，在我印象之中，我是第三次到此店，每次離開我都疑惑地問家人: 有傳說中的好吃嗎? 每次我們也找不到特別好吃的地方，只能說不差。我經常路過此店，也不見得經常有人龍排隊。

提起粉嶺聯和墟，除左霸氣豬手米之外，其實仲有間好有性格既拉麵店，一星期只開幾天，每天只營業幾小時。 今日難得經過粉嶺，同自己講點都要試下。 專登揀中午來，來到已見到有人排緊隊。但我都唔係等左好耐就有位。 左揀右揀最後揀左68蚊叉燒拉麵（中）。 拉麵一上檯已覺得好驚喜，五片叉燒大大片鋪滿成個碗，真係好少見到有咁足料。 試下個湯，湯底係醬油豬骨湯，足料既豬骨湯，入口香濃兼完全沒油膩感。醬油身分是配角，雖然混在一起但沒有搶走豬骨湯味。 點解會知係足料豬骨湯，因為老闆係門口貼埋告示，每晚將用完的豬骨派比街坊作餵飼狗隻。 而麵底都算大份，份量足，吃完有滿足感。 另外特別想提就係生蔥，吸收了湯底精華，份外滋味。其實想食好嘢真係唔洗出旺區，有時去啲小區尋吓寶，感覺都幾過癮👍🏻

之前某報紙介紹過聯和呢間拉麵店，好想試。辛苦完一星期，放假梗係要搵好野食啦所以專程揸車入粉嶺，拉麵店係比較偏僻嘅轉角位置，泊好車都搵左一陣先見到。可能粉嶺對我地黎講比較少入黎。店鋪唔大，客人已經一半有多。餐牌拉麵款色唔多，只得9款。所以感覺就似日本拉麵店咁，貴精不貴多。餐牌上講明，不設第二次落單，所以要唸清楚要咩，而且茶水要俾$1，呢間拉麵店真係好有性格。爵士拉麵（味噌湯底-中）$100 ，爵士拉麵（醬油湯底-中）$98 - 爵士拉麵有肥牛，义燒，蟹柳，栗粟米，蛋。材料份量多，醬油湯底比較清偏淡，味噌湯底的味噌味濃，帶點點辣。拉麵麵質尚可，其他食材都只是普通，是本身食材的味道，不是太出眾。而且蛋方面，一般拉麵店都是流心蛋，這隻是全熟的，是有點失望。

爵士拉麵係聯和墟都有一定既名氣，可惜成日都好多人。今日經過見到唔使排隊就決定入去試試。店鋪位置較細，坐得唔係咁舒適，好易同隔離左手掂右手拉麵款式好多，呢道只會落單一次，茶水亦都會收一蚊，要諗清楚先好落單。肥牛配拉麵總係覺得唔係咁夾，又唔想加錢要其他湯底，所以都係叫左絕配既叉燒醬油拉麵。湯底同出面既拉麵店完全唔同，係十分清淡，飲落去有少少甜味。麵條好彈牙叉燒好多，不過質素比較參次，有啲好鞋，有啲就好嫩口。我本人幾鍾意呢種清淡既湯底，飲完一碗唔會口渴又唔會覺得油。不過食食下覺得有啲似公仔麵