新興棧食家

Open Now

Now Closed

瘋狂地迷上魚卜，忙完公事，趁一點收舖前飛的來試碗粥來伴蔥爆魚卜同魚皮，無錯，魚卜是主角因為怕太鹹，才點個豬潤粥清清胃口。蔥爆魚卜嗦價卅五個大洋，連埋阿姐爆出5尺高的大火作表演，加上惹味而爆後蔥味迫入黏腍帶膠質的魚卜中的滋味，就算收五十大洋亦抵比。見了兩款海產，粥就要了豬潤，粥底煲得開花，卻起不出米香，地痞小店吃粥，穩真計是不斷的翻呀翻．．．．．．幸好無偷懶，否則將新鮮生猛的點蟲蟲（阿姐話係隻野後期自己飛入去的，呆了三分鐘．．．）食落肚就大件事，唔該換碟炒麵，是即炒的，乾身惹味，鑊氣十足有水準。忘了白灼魚皮，三字來形容：「薄腥腍」。地痞小店，太執著換來是自討苦起，主打魚卜掂的話，其他的隻眼開隻眼閉做人會更開心。

年初七去和味，全程得四五個客。食完經過這裡，人頭湧湧，完全是兩番景象。年初八又想食粥，由屋企搭車過來，正午，又係人滿。無魚鮫，改叫魚腩粥。加碟魚皮。人多，阿姐都做唔切，所以要等一陣先上魚皮。第一次食魚皮，無想像中爽脆，不過幾有口感，都鍾意，而魚皮上面的薑葱及豉油，竟有點晴之效。等粥，看阿姐端過的別的食客的order，睇師父「表演」打發時間。粥來了，非常大碗，料亦多，粥底比較稀，唔太咸唔太淡，味道不錯。少食鯇魚，所以不知味該如何，只能說魚肉唔老唔霉又夠味，不過太瘦的部位會無咁滑。仲有，魚腩食極都仲有。喜歡和味的粥多一點點，不過一定會再來光顧。因為，原來我阿婆曾經是常客。

魚腩粥$23食物: 魚腩煎過再放入粥內煮熟, 幾滑, 但味道欠奉.粥底唔夠杰, 失望.環境麻麻, 其他食客食完, 阿姐不會自動收碗, 要另有客人坐低催阿姐收碗, 阿姐才推着大筒, 把桌上的碗碟全部掃入筒.薑葱自助, 阿姐叫你自己出大桌拿, 你話這是本店優點又得, 你話無服務又得也許是即叫即煮的關係, 每次廚房煮幾個人的份量, 粥上得很慢, 平均每個客人等15分鐘, 很多客人都等得唔耐煩, 問阿姐有無落單(阿姐是老式只憑記憶不寫單的那一種), 阿姐沒好氣地回答: 煮緊, 等等. 其實阿姐的記憶並無錯, 只是不寫單令人欠缺信心.總結, 食物合格, 但名大於實, 服務見仁見智.

天寒地凍,除打邊爐,煲仔飯,一碗魚粥,亦是最令人窩心之選擇.每一次來新興棧,總會把前菜薑荵,吃完又添,撈著豉油齋吃,味道辛辣,無論個鼻塞過紅隧,三兩下包你藥到病除.而且有驅寒作用,用這個前菜作熱身,最適合不過.差不多魚所有部位吃過,唯獨這裏的魚片.因為相比之下,區區一塊魚片,實在太單調.其他如魚咀,魚鬚,魚鰭,魚頭等等,各擅勝長,每樣有不同的質感.吃到各位魚迷滿心歡喜.難怪這間魚粥店,能屹立幾十年不倒.如果嫌魚鬚等部位,沒有肉食的話,肥美的魚腩,就最合乎閣下之口味.魚腩用酒爆到火焰沖天.已經沒有其泥味.吃落肥美甘香,味道鮮甜.其已吸手魚味的稀粥底,差不多淪為配角.魚卜用薑荵爆,又係爆到火起.味道夠惹味,魚卜有口感,煙煙齦齦,尾部更非常爽脆.絕對是佐酒佳品.魚卜乃滋陰養顏之物,吃多多也不怕.總不會像吃花膠吃到破產.一邊吃魚卜,一邊享受著魚腩,魚骨散到一檯都係,再來一支在對面辦館買來的紅牌,雖然面前的並非山珍海醋,但一樣吃得豪氣干雲.窮,也窮得特別風流.當然,飯後還要工作,唯有以汽水代酒.

尋晚10:45去到,竟然還有魚鮫,食落真係好正,因為真係好滑,仲有2個添..可惜係無魚尾,唯有食魚嘴+魚鮫,如果係一碗鮫尾粥就正了.雖然一碗粥要成$27,不過有咁多魚食,係物有所值的.順帶一提,上個禮拜的飲食男女係介紹新興棧的,不過講的野就有小小出入,油炸鬼是要錢的,$4一碗還有,我覺得她的粥唔係清,仲係未濃添,因有酒味,魚味同薑蔥味最後,昨晚係好滿足咁走,因為D魚實在煮得太好味了P.S. 怕鹹的朋友勿試,因為食完粥一定要買水飲...^^

我就覺得佢粥的配料醃得咸左羅，食完佢的粥一定要立刻走去賣飲品。

在佐敦寧波街,有間老牌粥店"新興棧",以鯇魚粥打出個名堂.門面九流,殘過屋企樓下的車仔麵檔.入面更九流,除左幾十年無修過格局之外,衛生程度仲令人驚心動魄.隔離條後巷,隨時走隻老鼠入來也非閒事.地理環境關係,橫顧眾多食客,江湖中人馬夫搭你檯,一樣非閒事.受不起的話就不要來.全店除以鯇魚各部位來饗客外,尚有炒麵,粉腸等等,一場來到.無理由不吃鯇魚吧,先自助添加薑荵一碗,加些豉油伴之便吃.非常辛辣刺激.原理同韓國菜以泡菜打頭陣一樣.唔夠可以再加.鯇魚皮賣$12,份量少少,無七喜般爽脆.煮魚粥的不死方程式,就係用銅煲加些燒酒,將材料爆到火光熊熊,再加粥底便可,好少失手.此店也不例外.上次在鋮記吃過魚卜,今次來客魚咀粥,其實係一半係魚頭的.連眼珠也放入口.肉就無甚肉吃,但膠質豐富.粥底也很鮮甜.魚鮫粥的魚鮫,相信係魚鰭,經常郁動之關係,肉質特別嫩滑.經過烈焰沖天之火爆後,丁點泥腥味也沒有.差不多所有鯇魚的部位也能吃到,但我最想吃的,還是生鯇魚片.味道質感,同油甘魚極似.唔信可以試下,假如你唔怕死的話.一間專門賣鯇魚粥生存左幾十個寒暑,獨孤一味,唔整色整水,才是生存之道.呢個道理,應該好容易去實踐

平時都好少去佐敦寧波街一帶，仲以為個度得茶餐廳咁悶。門口貼左好多雜誌介紹，呢間舖應該來頭唔少。想叫魚鮫粥(其實都唔知係乜)，但係老闆話冇喎，迫住叫魚骨粥同呢度最出名既魚卜粥。睇到其他食客食一碗粥都食耐，因為佢d粥真係好大碗。佢d粥特別在用大火生滾，再加d生菜係面，食落真係幾爽口。睇住煮粥既伙計對住個火光紅紅既爐頭煮粥，佢條圍裙差少少就燒著左，真係好想走埋去同佢講小心安全。可能火氣太猛既關係，魚卜粥既魚卜煮到左，陣味真係好難頂! 相反我以會好多骨既魚骨粥，d骨都有幾多肉，都幾有魚味! 不過d粥就唔係幾夠綿，以$27一碗粥黎講，似乎差d喎。呢間舖以乎有好多熟客仔，因為大家一入舖都知要自己生菜、油炸鬼等食品，咪以為自己就唔駛錢，油炸鬼要$3一條架!P.S. 樓面阿姐唔係幾好脾氣，十問九唔應之餘仲嫌我地坐得耐阻住佢做生意!

2月8日，19:10從中港城出便想起到這裡吃粥。要了魚卜粥，客人不算多，等了不到十分鐘便有粥吃。粥底：比去年薄了一點，但那鮮甜的味道不變，加入片片生菜更清新。魚卜：七大個新鮮魚卜，既肥美，口感亦好。在這裡同場加映：火焰爆魚，無論魚腩和魚卜都用粥鍋爆過，火光紅紅。鍋氣到極！題外話：魚卜=魚鰾=魚肚=花膠有滋補食療作用，有豐富的膠質及蛋白質，滋陰養血，固腎培精，對于肺腎虛弱、貧血等，均有效。鮮大魚卜的功效，當然比不上深海舊花膠，但多吃仍有療效。

22/01/2006 14:00星期日,一如以往懶洋洋的,因為要去佐敦,同老婆就走左去新興棧食魚粥,呢間係我地一年裡頭點都要去一兩次o既食肆.老婆想食魚鮫粥,點知賣晒,改食魚咀粥,我就要及第粥,再加一條炸麵.粥底一如以往的比較稀,但真材實料,食到有瑤柱同麥皮,魚咀很新鮮,份量十足,加埋生菜絲真係料多過粥.及第粥亦很多料,即叫即製.同老婆談論魚咀跟魚雲的分別時,有一待者糾正了我們的說法,原來這裏的"魚咀"是指鯇魚頭,不是單指魚的咀,而"魚雲"就是大魚頭.埋單$22+$22+$3

以前經過覺得地方好污漕..見到網友推介..早一輪天氣冷..仲唔俾藉口自己試一試..試了肉丸魚卜...好多肉丸..8-10粒...魚卜也有最少4 個....真的十分十分十分好味..本人不好魚..也第一次食魚卜...真的估不到唔鯹..好爽口..今日當然要再接再厲..試及第魚卜..今日好多人..坐到出門口出面...因為魚要爆香..等了一會好味...不過粥不夠杰

睇完各位既食評, 雖然已經有哂心理準備,但係一入到去真係覺得好污糟.... d衛生仲衰過大排檔! 不過d粥就真係幾好味既,d魚腩新鮮又好味,粉腸都唔錯,不過真係因為地方污糟,所以影響哂心情....

我星期六晚去左食，坐滿晒人，不過環境真係幾污糟下，又多人，好麻甩FEEL，唔好坐。我地叫左魚卜魚腩粥，粉腸魚腩粥，同埋油炸鬼。等左大約十零分鐘，期間見到廚房阿姐煮野好火氣，成個煲著晒火，因為要燒個魚，碗粥好多料，舖滿生粥絲，薑蔥等，粥底稀但真係好多料，不過如果純粹想食粥就唔O岩口味，因為料多過粥，油炸鬼唔脆。找數五十零蚊。

昨天剛行過佐敦睇下時間又係揾食時候,正在唸咁食啲乜突然唸起好耐冇食魚粥便舊地重遊,点咗一碗魚雲粥+魚皮真係能夠保持水準無腥味.但最怕就係衛生太差太多人,差多要等十五分鐘先有得食.

今晚2個人黎呢度食粥,差不多7點舖頭已8成滿,環境都幾污穢下,2個share左一碗魚鮫魚云粥$27,由於即叫即做,我地等左右15分鐘先有得食.魚鮫魚云粥---size不算大,粥底亦談不上綿,但勝在粥底鮮甜,魚鮫魚云頗新鮮,炒過後無腥味.$27食得過;但個人還是偏愛較"和味生滾粥".