雄記美食

营业中

休息中

以手工製作、慢工出細貨而著名的灣仔雄記美食，於上周開始提供全新產品芫荽餃。湯餃每一口都帶有芫荽清香，卻不會濃烈得搶去鮮肉和餃子皮的味道，在材料之間取得相當好的平衡。自家熬製的湯底鮮美，蘿蔔及西洋菜都是吃得出的新鮮，喝畢亦沒有口乾的味精感，絕對證明其真材實料。Coriander dumplings, the latest lineup from Hung Kee, let you enjoy the refreshing aroma of coriander in each bite, and strive for a perfect balance between the herb, meat and the flour flavour of the dumpling outer. Not only the dumplings, but the homemade soup base is also amazing with sweet radish and watercress. 

趕上冬天的尾巴雄記平曰唔開夜晚。要撞啱放假或星期六日先去到。終於食到了👍🏼個糯米飯粒粒分明，臘腸潤腸味濃郁。本身個飯啲臘腸粒潤腸粒好多，淡淡充滿油香，唔加錢加多條腸都得。兩個人分都絕對夠食夠飽。煎蝦米腸外賣返去就一定唔夠堂食出色，脆底無了。但絕對唔會油琳琳。仲有個綠豆沙唔記得影。煲到起晒沙又唔會太甜。同路人。對食物有要求。太正了。#好食過灣仔米芝蓮大排檔做到搬入鋪嗰間好多倍😆 #你知唔知灣仔嗰間個綠豆沙，我曾經比$20買一碗無綠豆只有糖水的綠豆沙。佢咁都可以賣比人先係好嘢。

想去雄記食咖喱牛腩好耐，次次星期六想去食但因疫情無開。今日星期一去開灣仔做野終於食到，我下晏2:30去到餐廳都坐左成7成人，有d野食都賣晒，証明生意都唔錯。一入到去我點咗咖哩牛腩通心粉，因為之前見到雜誌介紹過咖哩牛腩通心粉同埋招牌煎腸粉都係出名嘅，但今日得我一個人所以食唔落煎腸粉。個咖哩牛腩通心粉可以選擇大中小辣，我揀咗中辣，嚟到聞到好香嘅咖哩味，通心粉嘅煙韌度適中，咖哩亦都好香幾好味，入面除咗牛腩之外仲有啲薯仔粒粒，牛腩方面我覺得中規中矩，但咖哩汁唔錯，我覺得中辣都算辣啦，下次我可能叫小辣都應該夠。之後我加咗十蚊叫咗一杯凍嘅腐竹糖水，味道好似好濃郁嘅豆漿，甜度適中都值得一飲。如果你哋經開灣仔又咁好彩佢開門嘅都可以試下，佢哋家庭式經營服務服務態度都好好，味道都唔錯。

要食雄記美食，首要條件係follow 雄記美食 instagram 捕捉佢哋營業時間，因為佢哋每朝早都會出post講佢哋會唔會開鋪；有時因為貨源唔穩定，無新鮮牛雜所以老闆們決定休息去飲咖啡。有日，我終於得閒咁啱撞到佢哋有開鋪就即刻飛車去食！！難得一場嚟到我就盡全力叫晒餐牌上我想食嘅嘢，價錢經濟得嚟份量唔算好多所以都輕鬆食曬，會認識呢間餐廳都係朋友介紹加上youtube有睇過不同平台簡介而知道佢哋嘅出品係心機之作聞名！ 食過之後都認同佢哋食物帶層次同心機；由最花時間清洗嘅豬同牛雜到甜品腐竹糖水嘅濃濃黃豆香，煎蛋腸粉嘅生熟蛋漿比例都真係出乎我對小店嘅要求。豬雜粥$35腸粉加煎蛋$24咖哩牛腩撈粗$50鮮牛雜淮山麵$50腐竹糖水$10(跟餐價)呢到不論職員，老闆，定熟客都有種好似識咗好耐嘅同聲同氣感覺。 感覺就好似人在異地搵到間終於識講廣東話嘅鋪頭親切一樣。

好食既野絕對值得排隊小店賣既食物種類唔多，主打牛什，煎腸粉，粥，車仔麵，仲有自家製糖水/冬瓜茶。一個人食都唔怕尷尬，因為店員姨姨好nice。老闆老闆娘都好好人，一手一腳自家製既小店。食物製作需時，不過我覺得除左濃濃人情味，食物的確好好味。我最鍾意食蘿蔔牛腩飯，底會有索哂牛汁既生菜，超好送飯。牛腩飯會比平時多汁，唔係稠身的，但飲落肚係好順口，而且好濃郁。蘿蔔清甜，如果再淋身d 更好。牛腩唔係入口即溶個種，不過幾有咬口，盛惠$50，仲可以加錢加自家製糖水/冬瓜茶，都見到好多人嗌。

嚟之前記得check IG 真係開好少 當日只係開1100-1500老細有態度又唔休做牛雜油麵$50 雜份量唔多 但食得出係落足功夫洗好未係其他鋪食過咁乾淨至於個湯底就重麵豉味 我就唔太鐘意價錢同其他港島區其他出名鋪比老實講係好貴餐牌老闆廚房一個做都有咁多款嘢食 算係咁繁忙時間老闆娘一個打晒樓面 忙到單都寫唔切鋪面有雙人枱同俾單丁客坐嘅一條張枱都間隔得好迫吓幾鐘意老闆放晒佢自己鐘意嘅公仔同海報出嚟好似成間鋪就係佢嘅大玩具咁

呢間食肆，老闆比較有性格，不是日日開門營業，要到佢IG 睇下當日會不會開門才前往。今日遇到佢開門，由於一行3人，要等大約20分鐘才可入座，1人入座會比較快。一入到鋪頭，會見到好多figures, 有種比figures 包圍食嘢既感覺。點了2個牛雜撈麵及1個牛雜湯麵。牛雜每樣一件，牛肚多少少，但總分量比較少，一個女仔都食唔飽。如果好肚餓，可以叫多少少野食。牛雜煮得好淋，入口咬兩下就溶化，但味道不是太特別。

自問大江南北的麺食都食過不少，包括東西欧国家，又偏爱牛雜/羊雜/朱雜，故此今日試下这間有人龍的雄記是否经得起舌尖的嚴格考验。在店門外下午等了15分种，又在绝不舒適的狹窄空間的店内，再等了15分钟，初探$50一碗的什粗。牛什麵一上，先试湯底，唔....冇味精味，有咁香纯真感，合格。再试粗麵，咦，只系正正常常的質感，舆心中的回彈高質麺食有相當落差。最后试不同的主角，(冇味，冇味精，冇適當的溶化感)。完！不涉及政治，如果香港人的美食以雄記為標準，莫講舆外国的鲜牛，鲜羊有天舆地之分别。只要往深圳，广州，中山，珠海等大灣区，找寻一間稍有名气的牛雜店，雄記都要跪地。香港人要放眼岛外，不要自吹自擂呀！

喺Openrice見到呢間鋪頭啲好評都幾多，所以就決定今日中午去食。去到門口，已經有好多人排緊隊，我地大概等左10分鐘就入得了。店內空間不大，但勝在乾淨企理，而且成間店都被有好多figure包圍，鍾意figure嘅朋友一定要嚟朝聖！店內分開兩種形式嘅枱，一種係普通四人枱；另一種就係自閉一人位，每枱之間都有隔板間開，確保衛生。頭先喺門口排隊嘅時候已經睇定餐牌上面有咩食，但係入到去先知出面餐牌同入面果個唔同，入面餐牌嘅野食係貴幾蚊......呢一點唔知佢大意唔記得換定點啦，但站喺客人嘅角度嚟睇，一定係覺得反感，雖然唔係介意佢貴幾蚊果度，而係有少少被人呃左入去嘅感覺，係一種掛羊頭賣狗肉嘅行為。最後點左牛雜粗麵，味道中上水平，份量正常，值得一讚嘅反而係佢嘅辣椒醬幾好味，配牛雜食真係一絕！牛雜麵盛惠$50，加汽水就total $56。要留意嘅係：繁忙時間12:00nn-2:00pm店內每人最低消費$50，所以你想就咁食一碟腸粉/一碗喳咋嘅話，最好就晏啲下午茶時間先過嚟食啦~

灣仔一直都係出名多好嘢食嘅地方，無論你想食高級貴價定係平民貼地嘅食物，灣仔一一都滿足到你嘅要求。除咗價錢方面，款式一樣有得你揀！好似歐美、日韓、中式定係東南亞菜一樣搵到。講咗咁耐，今次想介紹嘅E間鋪頭係香港嘅代表🇭🇰 - 「雄記美食」。🤩入到嚟餐廳，即刻就俾佢嘅裝飾吸引住。店鋪入邊擺咗好多店主嘅動漫收藏。相信E度會係男仔嘅浪漫呀。坐底點左碗牛腩麵、一份炒腸粉加蛋同埋一碗喳咋。牛腩煮得好，唔會韌；炒腸粉加蛋賦與腸粉更多一重嘅滋味；再嚟一碗喳咋為今餐畫上句點。😎嚟幫襯E間鋪頭嘅好多都係熟客仔，客心只要一嚟到老闆已經知佢哋想點啲咩。老闆同客人有講有笑，好有老香港嘅人情味！🤗

出色嘅牛雜店真係買少見少，雄記之前牛雜檔起家，牛雜當然係處理得非常專業純熟，只食到牛內臟嘅營養美味，湯底充滿牛味，非常清甜，另上當湯飲都收貨，淮山麵係一般中式麵檔並唔常見，呢度唔使另外加錢，淮山麵身較幼，更加可以連湯一齊食蝦米蔥花腸粉加蛋亦係名物，腸粉煎好一餅，配有麻醬同埋黑白芝麻，一切開蛋液剛好半熟，單食腸粉都帶有蔥花同蝦米嘅香味，配埋蛋汁外皮脆裡面滑就更加不得了餐飲+$7可以有腐竹糖水，雖然唔連渣，但都感覺足料，檯面雖然有不同調味料，但其實根本唔需要用已經好好味。店員好有禮貌好勤快，環境都好乾淨，鋪面唔大但坐落唔逼，上菜速度都好快

呢間傳統港式甜品小食店煎蝦米腸加蛋，豬骨粥同熱喳喳豬骨粥好綿滑 有腐竹味，裡面仲有大量皮蛋同花生 口感好豐富 個喳喳係無花生 大量麥米，紅豆同西米，勁大碗好抵食 好香甜順口煎蝦米腸加蛋 煎到脆底既蛋邊 腸粉煙韌有米香 加麻醬芝麻食特別香口港式炒麵  入面有醬油炒香既麵條同紅腸豆卜 好大碗,麵身夠彈牙 配料又多好好食夠獲氣!平均消費$100評分8/10灣仔克街6號廣生行大廈B座地下B2號舖

eat乜牛雜牛腩 | 灣仔碗湯好飲到一滴都冇剩！牛雜米，加牛腩。小編每次去都會咁叫，為的就係個湯底，因為真係好好好好味。好香，好濃郁，飲完一啖好想飲多啖。但係，就算飲哂成碗，都完全無口乾口渴，可見個湯底無味精，係真材實料。「老闆娘，個湯勁好飲，我想問係咪藥材湯嚟㗎？」小編唔識嘢，走咗去問老闆娘。「梗係唔係啦！無落任何藥材！係純粹用牛熬出嚟，係100%牛湯！」老闆娘堅定但非常友善咁回應。佢嗰個笑容有啲似一個呀媽精心炮製咗餐飯俾仔女食嘅感覺。😂個湯汁咁勁，啲牛腩牛雜都好難差得去邊。牛腩入味，索曬啲汁。半肥瘦，有咬口，但亦夠淋。牛雜乾淨，無任何餲味，但牛味仍然好香，唔會漂到咩味都無哂。如果你唔想食粉麵，可以試下個東坡肉飯。小編老婆至愛。首先，肉夠肥，又炆到入曬味。第二，個汁送飯一流，加埋啲豆卜，只會令你食唔停口。另外，介紹埋杯冬瓜茶。坊間一般嘅冬瓜茶都甜到無朋友，但呢杯少甜，反而令冬瓜茶嗰種清涼，清爽感覺更加出，連怕甜嘅小編都愛不釋手。好簡單嘅飲品食物，但係卻帶俾你一種食完會掛住，會想翻去再食嘅味道。其實小編最鐘意，最想介紹俾大家認識嘅就係呢類好認真製作，又好有人情味嘅小店。真心，去試下啦。

第一次嘗試，落單前都問下牛雜有冇牛腸，點知得一舊，牛肚就最多，牛肺就大大舊，連生菜都好似得5分3一片咁$46嚟講，個份量失望咗啲。 個湯好濃味，少鹹。 個辣椒油幾好味。同類價錢同區可以找到更好的。有良心在於同路，但唔覺得係食物方面。

灣仔返工一直聽聞雄記美食好出名，今日終於有機會一試。叫左咖喱牛腩飯 💰48試食左朋友嘅牛腩 真係覺得驚為天人牛腩軟嫩 重點係咖喱汁濃郁得來非常順口雖然平時外出好少叫咖喱牛腩但個咖喱汁真係調配得好好跟餐加7-8蚊可以配咋喳/腐竹糖水可以當日未有咋喳 但係腐竹糖水都好濃郁另外，牛什粥就稍為遜色雖然牛什好足料，但係粥底相對叫稀成碗似係飲緊粥水咁順帶一提，午餐人流都好旺，但係職員都細心有禮。全程用餐都好愉快香港🇭🇰加油💪