影片
更多
2012-07-19
52 浏览
呢間Mr Steak Buffet à la minute，加埋一接近五百蚊一位嘅dinner buffet (七月開始剛加價$20/位)，講真係金鐘五星級酒店價錢，但有冇同等級數同質素呢? 唔知係我去果晚唔好彩定最近差咗，我真心想講句除非係一心喪食生蠔其他乜都唔緊要啦，如果唔係真係完全唔值呢個價!去食之前見Openrice咁多好評，連平日夜晚去都要預早半個月book檯(仲要親身上去畀訂金)，唔少食評又讚到乜咁，真係以為一定好正! 不過可能希望愈大，失望自然就愈大...綜合近期Openrice內關於呢間Mr Steak Buffet à la minute嘅好評，有唔少人話服務好細心---自動自覺畀好多紙巾/濕紙巾、主動提醒有梯級(p.s.咁基本都要讚???)，又有人話好多嘢食(海膽、Dreyer's同Haagen-Dazs---「平時賣廿幾蚊杯嘅新口味」...)，又有人話樣樣都係即叫即製啦咁，我唔係懷疑咁多位之前去食過嘅「前輩」嘅評價(事實上個個都有圖為證呀)，但我在7月10日晚親身體驗呢，並唔係咁樣嘅!===長腳蟹===長腳蟹棒係餐廳賣點同好評推介之一，無錯真係每條蟹腳都好大隻兼且
去食之前見Openrice咁多好評，連平日夜晚去都要預早半個月book檯(仲要親身上去畀訂金)，唔少食評又讚到乜咁，真係以為一定好正! 不過可能希望愈大，失望自然就愈大...
綜合近期Openrice內關於呢間Mr Steak Buffet à la minute嘅好評，有唔少人話服務好細心---自動自覺畀好多紙巾/濕紙巾、主動提醒有梯級(p.s.咁基本都要讚???)，又有人話好多嘢食(海膽、Dreyer's同Haagen-Dazs---「平時賣廿幾蚊杯嘅新口味」...)，又有人話樣樣都係即叫即製啦咁，我唔係懷疑咁多位之前去食過嘅「前輩」嘅評價(事實上個個都有圖為證呀)，但我在7月10日晚親身體驗呢，並唔係咁樣嘅!
===長腳蟹===
長腳蟹棒係餐廳賣點同好評推介之一，無錯真係每條蟹腳都好大隻兼且極大量供應，但唔好彩嘅係我地十幾個人竟然都覺得蟹腳鹹到唔係個個食唔落，難怪成晚大量蟹腳任取唔駛排隊...諗返轉頭可能間餐廳諗住啲蟹腳插在冰塊入面會慢慢溝淡鹹味，所以重手落鹽啦...睇見呢篇嘅你，破解方法係唔好拎最面果啲、無禮貌地抽佢插響冰塊中間果啲蟹腳，應該會無咁鹹。===生蠔===
另一重點中嘅重點---生蠔，的確係排隊即開，每次各款共四五隻。條人龍一直keep有廿個人排隊，直至開始食咗成粒鐘先開始無咁多人。當晚離席時仍然有四款生蠔，供應充足。食咗望落個樣最新鮮同size最細嘅一隻fanny bay，生蠔味好重("哦"返啖氣出來都有果陣味...)，但似乎並唔係想象般新鮮，為免個肚唔受得，其他款都已經唔敢再食。至於有冇「海水味」、 「金屬味」? Sorry，小弟真係成世人都未食過「金屬」，無呢個專長去分辨咁嘢叫做「金屬味」...===澳洲和牛===
另一賣點---澳洲和牛其實係鐵板煎牛扒，OPEN KITCHEN一次過係咁煎，有人排隊拎就切畀你。可能澳洲和牛好貴都唔定，「配給」得極端孤寒，開到口要多一份總共才得那四小件(每件約1.5平方吋)，相當令人失望；不過都好彩佢無畀多，我去果晚唔知係咪個CHEF心情唔好，煎到90%熟，又乾又鞋完全無肉汁，真係多謝晒... 老實講，和牛又好乜牛都好，煎到咁乜都死啦...===冷盤===
冷盤薄牛肉係全晚難得好味之一，青口同藍青口都真係好食。沙律吧選擇算多，望落都唔錯(但咁貴嚟呢度唔會想食菜)。煙三文魚則一如openrice其他食評，認真麻麻。講開煙三文魚，擺放位置同附近嘅SALAD BAR旁邊竟然都冇提供檸檬、酸豆之類食煙三文魚必備配料，要檸檬要搵到去生蠔師傅面前，要插隊入拎生蠔條人龍入面先有(但都係冇酸豆)，都幾離譜...
===熟食===
唔愛好食牛、唔愛好食蠔又唔愛好食魚生的話，就千祈咪幫襯喇，因為呢間餐廳基本上唔預你會專程食其他野。其他熟食生食款式都唔多同唔吸引，絕對唔係你EXPECT加埋一近$500嘅BUFFET會有嘅款式數量，而且接近純西式，貴價自助餐通常有嘅別國菜式好似點心、燒味、粉麵都係冇嘅。事實上現場所見，基本上熟食都係無人拎嘅。
現場即煮嘅熟食比較深印象嘅有...炸天婦羅---極厚粉所以冇乜人食；日式串燒---係超市凍櫃有售嘅雞軟骨串來貨(你食埋我果份啦)；鵝肝多士---呢個去貨去得快，所以熱辣辣唔錯；即煎薄牛肉---說好的牛味究竟去咗邊?
===魚生===
魚生方面三文魚係肥美新鮮同大大片嘅，其他魚生就極普通。說好的海膽、帶子呢? 全晚都冇出現過。
===雪糕===
至於說好的Dreyer's同Haagen-Dazs呢? 原來變成雀巢雪榚杯同阿波羅雪條...收人五星級酒店價錢，竟然畀人食Apollo...真係唔爆粗再加句「痴x線」都唔得~ 其他酒店收$3XX嘅最「CHEAP」都兩三款Haagen-Dazs啦、韓燒都DREYER'S啦...
===服務===
咁說好的細心服務呢? 唔叫都唔加水、叫極都唔加派濕紙巾(自問好有禮貌同侍應講要濕紙巾仲有講唔該嘅)... 其實去食自助餐都唔係點需要乜嘢服務，不過侍應唔夠呢個係事實。
===環境===
不過最失望嘅係呢間咁貴價嘅餐廳逼到同百幾蚊位日式放題一樣，椅背貼椅背，全晚不斷被路人同侍應碰撞、掃背，張檯又細到放多隻碟都無位...而且環境又嘈樓底又矮，總之食得好唔安樂! 都係果句，唔係畀呢個價錢EXPECT得到嘅用餐環境!
簡單總結啦，又再經一事長一智，第N次親身驗證今時今日openrice嘅好評參考價值係零。
张贴
