香港人去台灣玩嘅藉口可能又少咗一個：因為台南百年祖傳老店，招牌菜係傳統美食擔仔麵嘅度小月即將喺尖沙咀正式開幕！擔仔麵有咩「味」力，仲有咩其他特色美食值得一試？即睇開飯仔介紹啦！
 

擔仔麵有三大特色，一係細細碗，「小」食多滋味；二係肉燥唔會太肥，但依然香氣十足；三係湯頭用鮮蝦頭熬成，香濃惹味。配料方面除咗肉燥，仲有蝦肉、豆芽、蒜泥、台灣五印醋同芫荽。
 

食擔仔麵亦有秘訣，先用筷子搞勻肉燥，再聞一下肉燥同蝦湯嘅香味，然後飲湯再食麵同配料，留一啖湯最後享用。食完有少少意猶未盡嘅感覺就啱啱好，因為要留肚試其他美食呀！
 

祖傳肉燥飯同樣細細碗，度小月嘅肉燥用嘅係豬嘅後腿肉，加紅蔥頭爆炒再慢火炆燉。香而不膩最啱送飯。香港店嘅肉燥由台灣空運到港，開飯仔幫大家問過，尖沙咀店暫時未有肉燥罐頭售賣，但唔排除之後會引進！
 

三杯雞煲係香港店限定，三杯係指一杯台式醬油、一杯麻油同一杯米酒。用煲仔上枱，一打開蓋就聞到醬料同九層塔嘅香氣，加埋熱辣辣嘅吱吱聲相當吸引！食落雞肉亦算嫩滑，而且值得一讃嘅係紅色煲仔保溫效果唔錯。
 

黃金蝦捲係唔少香港人最愛嘅小食之一，金黃色脆皮嚟自台灣空運到港嘅秘方炸漿，味道帶少少甜口感酥脆。入面嘅蝦肉亦用咗台南每日新鮮直送嘅鮮蝦，相當彈牙。
 

安平鮮蚵湯記得要趁熱飲，蚵蠣（蠔仔）嘅鮮味加埋滑嫩嘅豆腐同薑絲，有相得益彰嘅效果。唯味道稍嫌過鹹，可以二人分享淺嘗。
 

櫻花蝦高麗菜同樣香氣四溢，香味嚟自櫻花蝦乾，配埋台灣高麗菜（椰菜），有鮮味而唔會太飽膩。
 

介紹完嘢食當然要介紹埋飲品，唔好睇小呢樽金萱綠茶，佢係近年台灣同日本大熱嘅冷泡茶！用嘅係台灣嘉義阿里山同南投松柏嶺嘅金萱茶葉，用凍水浸泡四個鐘再雪四至五個鐘。低溫慢泡更突顯金萱茶獨特嘅桂花香味，而且比熱泡多一份甘甜，少一份苦澀。
 

尖沙咀店大門一旁係傳統爐灶麵攤，客人可以透過玻璃窗見到師傅製作擔仔麵嘅部分過程，而且師傅之前已經去過台灣總部接受訓練。裝修以台式懷舊風格為主，連用嘅青花瓷碗亦係嚟自台灣嘅「趣遊碗」。以後掛住台南嘅話，就可以嚟度小月香港店喇。
 

最後提醒大家，尖沙咀店而家試業期間分三個時段派籌，6月28號（星期三）正式開業。預計一開業都少不免要排下隊，不過好消息係，負責人表示有意喺香港其他地方開設分店，各位Fans不妨期待一下！

文、相、片：Cathy