大壹燒鵝 (啟田大廈)

營業中

休息中

本人最愛系美食，今次特意到來試食！我們一同三人，在門口等了五分鐘便可以入座。我點選了燒鵝/乳豬雙拼飯，我的家人點選了叉燒/燒腩雙拼飯，還有一個叉燒/燒鵝雙拼飯及加一個咸蛋，三個例湯，兩杯凍檸茶，一杯熱奶茶(茶走）。試食評讚如下，燒鵝鵝皮薄脆甘香，鵝油及鵝汁滴出，鵝肉鮮嫩入口多汁在口裡爆出鵝肉香味!比深井燒鵝還好，有水準嘅燒鵝！乳豬皮都脆肉嫩，可惜乳豬醬太少，叉燒好味有燶邊，昵度叉燒切方塊，外間切片，麥芽糖唔會太甜，燒腩皮脆，切方塊，點芥辣胖吃，美味一流，咸蛋切開無蛋油，唔夠靚，＄10元一隻唔值太貴，下次可以不要！今天例湯木瓜南北杏煲豬骨,味道鮮甜，湯渣都幾多，啲湯師傅唔多，渴後唔會好頸渴，＄五元一盅超值！水吧評分如下：凍檸茶茶贍夠燶，檸檬夠香有茶味，熱奶茶有驚喜，茶味夠燶，奶茶入口香滑，喜出望外！我並不是街坊，我相信我會再次光臨！

今天探訪住在藍田匯景花園的親戚，親戚介紹我到附近的「大壹燒鵝」吃晚餐。六時未到，門前已經不少人買外賣了，我們幸運地找到座位坐下。一眼看到枱上的餐牌，二話不說便選了個二人套餐：一碟燒味拼盤再自選兩個小菜，有飯有湯。“叉燒拼油雞”，半肥瘦叉燒，厚肉油雞，不肥膩，果然是燒味專門店出品。“椒鹽豬扒”，新鮮酥炸的豬扒，入口甘香，肉質彈牙，口感特別好。“紅酒會牛尾”，牛尾炆得很腍，又入味，配上紅蘿蔔、薯仔、洋蔥等配菜，連獻汁都美味非常。更令人喜出望外的是這裏的小菜都是大碟頭，份量十分充足，足夠四人食用。例湯是足料老火湯，有豬骨、冬瓜、南北杏、龍脷葉等湯料，非常好味。附加飲品每杯$5，我們大家都吃得飽飽，大壹除了燒味外，小菜都一流。

不得不提，燒味真係讚不停。叉燒嫩口大件好味之餘，碟飯都好夠份量。還有油雞，無論雞脾買是雞胸，一樣咁嫩口彈牙，真係好好味。平時吃不下一碗仔飯，但來到吃燒味飯，竟然吃得下整碗飯哦。這裡除了燒味，小炒也不錯，晚上還滿多食客的呢。簡直就是我藍田的飯堂哦。

又到左繁忙嘅星期一，好唔想煮飯，就諗住落樓下食燒味飯，知道有一間口碑幾好就去試吓，之後我哋整咗個二人套餐，有三餸一湯，我哋點左燒味雙拼有叉燒同油雞，另外點左小炒王同埋椒鹽豬扒，先講燒味叉燒半肥瘦瘦肉分明而且份量都好平均，油雞方面味道好深入而且啖啖肉係我鍾意食嘅燒味，以套餐都包兩碗飯，小炒王方面炒得好香口而且有大量海鮮加腰果係我鍾意食嘅小炒其中之一，而豬扒方面炸得好香口已經幫你切好晒食落去好脆口而且都好厚肉，除此之外套餐都會包兩碗老火湯，正正常常冇乜特別，而飲品點左凍奶茶同埋凍檸茶都好有質素係我鍾意飲嘅味道，下次可以再試其他小菜

Mcdull好中意燒鵝。中意肥嘟嘟嘅感覺，就好似中意Mcmug咁。有一日，Mcdull同Mcmug肚餓了。Mcmug話「不如我地食依間丫，舖名都有燒鵝兩隻字」Mcdull點點頭。佢地坐低左，睇餐牌。Mcmug睇到「超值」滋味套餐嘅餐牌，佢🐽事不理，係佢嘅極速🐽心算下「兜兒，不如叫依個套餐丫」Mcdull開心地「乜兄，好呀」其實Mcdull連餐牌都未看清楚，因為太多字了。結果，佢地就入左一間主打燒鵝嘅舖頭，點左個既超值又滋味，但無燒鵝嘅套餐，兩隻🐽都好開心咁食左依餐飯。言歸正傳：超值滋味套餐 $288 任選三餸一湯 餐牌其實真係有啲亂，密密麻麻嘅字都睇到老花，我地叫左三個餸：大壹叉燒皇併香妃雞、菠蘿咕嚕肉、西蘭花炒蝦仁，同時我+$38將餐湯升級至花菇雞腳燉螺頭。花菇雞腳燉螺頭🙂個湯好熱，飲落口熱辣辣，好清，冇乜咩油，佢用功夫茶嘅形式黎上菜，要飲幾多做倒幾多，每次一細杯，對於我黎講就有少少煩，但個湯真係幾好飲，淡淡地，似冇味精。佢個湯嚟嗰時，仲特登俾埋兜辣椒豉油我黎點湯渣食，依碗湯嘅雞腳好淋，香菇都仲有味，但螺頭就煲到出晒味，食落去冇乜味。大壹叉燒皇併香妃雞😐我特登叫左肥叉，唔肥嘅叉邊好食

餐廳有上下兩層，上層雅座是C區，下層是B區。七時叉燒及乳豬已經售罄，過多一會燒腩仔都賣光了，很受歡迎，如果食燒味要早點來。大壹燒鵝飯 $58，雙拼加$5幸好我們點餐時還有燒腩仔，燒腩仔皮十分脆，肉質鬆軟，芥末醬甜甜的，似是蜜糖芥末醬。燒鵝皮鬆化，皮下脂肪適中，可以點酸梅醬。黃金蝦球 $108大蝦爽口彈牙，十分大隻啖啖肉。外皮炸得脆脆的，入邊包着濃郁的鹹蛋黃，令人食指大動。椒鹽九肚魚 $88另一碟也是炸物，椒鹽九肚魚的外層蛋漿炸得香脆，九肚魚滑溜。熱奶茶 跟餐$5黑白淡奶杯裝著熱奶茶，充滿了香港茶餐廳特色。凍朱古力 $20 朱古力味道濃郁，不過碎冰粒較多，要減少一點避免溝淡了朱古力味。

今日去藍田食港式小菜，這裡雖然最著名的是港式燒味飯，無奈我的朋友對燒味不感興趣，所以就試一試其他出品。首先食的先椒鹽九肚魚，不得不說，椒鹽九肚魚一句話說就是，皮脆肉嫩，椒鹽分佈平均，不會過量，又食得出魚肉本身的鮮香，再加上魚肉本身質地溝溜，淡淡肉的感覺很好，炸漿又相當之薄身，咬落很是酥脆，相當出色。然後是下午茶的豬扒炒公仔麵，下午茶的份量不大不細，而且價格合理，岩曬較細食的人，豬扒本身肉身較厚身而且不會太硬身會帶點肉汁,再加上炒公仔麵本身的個麵係會比較乾身啲，兩者相加後，可以平均返口味。下午茶的人均消費紉五十多元，相當化算超值的價格。

同老公兩個人做中秋節飯,係附近一間好多人排隊的茶餐廳食飯，因為內籠好大， 入面有好多位置，所以等一陣就有得入去。本身好想食佢個燒鵝，點知售罄， 可能臨近中秋太多捧場客， 見到有個好抵食嘅二人餐$288， 三餸一湯， 見隔離枱食啲，d餸仲要大大碟，即叫。冇燒鵝食就點了個燒味雙併， 叉燒油雞。本身上碟時見到個叉燒好似好瘦，正擔心之際，如果食落並不是這回事， 其實佢肥瘦均勻， 肥個位食落去完全冇肥膩感軟嫩，瘦位不乾不柴， 味道鹹甜兼備，有微焦香，好味。油雞肉質滑，肉厚不柴， 配上蔥油， 送飯一流。椒鹽鮮魷，生炸脆口，一點都不韌，而且份量 毫不吝嗇，大大一碟，我都唔理膽固醇同“熱氣”問題，呢一碟係出街先食得到的獲氣惹味小炒。一碟菜心炒牛肉，擺碟非常有心機， 本來以為會係菜多肉少， 誰知係兩樣都平均地多，菜心煮得嫩，牛肉軟滑入味。而且套餐有湯送，呢個價錢非常之抵食。 食到 鑊氣，感覺乾淨， 性價比極高， 唔怪之得咁多人排隊。

上次去左銅鑼灣既大壹，食過後十分滿意，今日黎到藍田既分店食晚飯，睇下水準保唔保持到。藍田分店樓面比銅鑼灣大，鋪位間左2層，近門口的下層主做燒味斬料，上面則是廚房及水吧。藍田店比銅鑼灣多左小炒菜，令餐廳食物選擇更多。 當日叫左套餐：包例湯，一份雙拼燒味，2個小菜，白飯2碗及飲品。當日仲令外叫左個燒鵝上庄。 燒味當日叫左叉燒及油雞：叉燒叫左肥叉略嫌有點太肥，上次係銅鑼灣食並無要求肥叉個人認為岩岩好，建議唔洗另外要求；油雞有玫瑰露香，雞髀啖啖肉調味足。燒鵝一如既往水準好，皮脆，有肉味，夠入味。上庄既胸肉肉質亦唔會過鞋，鍾意食肉既朋友推薦叫上庄。小菜叫左咕嚕肉及啫啫雞煲：咕嚕肉調味較酸，用上梅頭啖啖肉亦唔會太肥，餐廳亦用上新鮮菠蘿伴碟，食落好清新可作解膩；啫啫雞煲上菜時出哂煙，香氣十足，雞件以大量洋蔥及蒜頭爆香，送飯一流，另外，坊間一般以豬潤為伴菜，但餐廳以豬頸肉代替，唔食內臟既朋友就多樣野食！ 經兩次食飯既經驗黎講，銅鑼灣店燒味比較出色，但藍田店的食物種類比銅鑼灣多，總結餐廳各分店水準既保持到高水平，以後想食燒味第一時間會諗到大壹。

今日來藍田揾朋友，順便食下午茶，之前食過大壹燒鵝銅鑼灣分店，就同朋友黎食好掛住嘅燒鵝脾😉餐廳光猛濶落，地方大，分兩層有閣樓，樓下幾乎滿座，我同朋友坐上層😄除咗燒味，仲有小炒、海鮮、燉湯、粉麵等等，種類多元化😄我哋要咗兩份燒味雙拼茶餐，朋友想食話梅豬手，就點咗一份😄燒鵝脾燒腩瀨粉燒鵝脾厚肉大隻，脾位皮脆肉滑，無鵝羶味，一樣咁好食🤩，燒腩皮脆，肉質肥瘦均勻鬆軟，唔太鹹，瀨粉好多好大碗😋燒腩叉燒米粉叉燒濃邊帶少少肥，叉燒搽咗蜜糖，食落有汁香口，我試咗一嚿，估唔到咁好食🤩話梅豬手豬手好大碟，又大嚿，用話梅同子羗炆到又腍又入味，酸酸甜甜，骨膠原豐富，唔油膩😋餐飲凍檸茶，朋友要西洋菜蜜，我哋又要咗甜品芒果布丁，布丁充滿懷舊味道，童年回憶返哂黎😛

今日又擺工唔想煮飯，落街搵野食算，家常便飯黎講我最鍾意去我飯堂食燒鵝，餐廳係藍田啟田道近馬路，方便又易搵，今次我地2個食左燒鵝，鵝肉依然無令我失望，肉質鮮嫩又多汁，最重要係個皮燒得好香脆。另一個小菜就叫左個椒鹽九肚魚，炸得好香口，又唔係好大舊炸粉，魚肉好滑溜。之後嗌左個滑蛋蝦仁炒河，首先炒河要炒得好食已經好難，仲要條條分明，又唔油膩，滑蛋又炒得好細緻，街坊價錢食到酒樓式水準真係bonus，見到仲有其他小菜都想試一試，但真係好可惜我哋得兩條友真係食唔晒。

啟田真係好耐冇嚟，今日靚仔放假，就同佢嚟回憶下佢細細個係嚟過呢度！有一間健康院㗎，佢仲好記得添，嗰陣呢度冇咁多商場，食肆都無咁多。講到食，聽說大壹燒鵝燒味就流曬口水喇， 梗係去試下啦，佢嘅餐廳招牌菜秘製燒味 都好出名㗎。😁😁燒味三拼(例牌)$168改轉燒鵝加$30 有燒腩仔和叉燒好大碟啊！燒鵝髀大大隻，首選梗係食鵝先啦，入口啖啖肉又嫩滑肥美，鵝油超香，鵝肉結實，重好大塊鵝皮啊！😋燒腩仔細細粒細細舊，方便一口進食，入口皮卜卜脆，肉脂肪適中唔嚡，加埋芥末醬一同進食好正呀，最後食叉燒，嘩，好淋又香口 叉燒好高水準呀，滿滿肉汁半肥瘦係我最鍾意食，好香蜜味真係送飯一流呀。大壹炒飯~$60好大碟啊！炒得好乾身油香味，餸菜餡料 有九層塔，菜頭粒，肉粒大大粒，入口滿滿九層塔味，好香呀！ 又唔肥膩。(推介)飲品~凍紅豆奶茶和鮮果益力多冰紅豆好多呀，再配埋奶茶，我嘅至愛。鮮果益力多冰都好多鮮果，唔太甜，靚仔話 酸尾尾好爽下喎。😁

今天女朋友不用上班，二人一同外出吃晚餐。餐廳位於藍田站附近，交通方便。餐廳裝修光鮮，環境清潔，冷氣強勁，座位寬敞。店員有笑容，服務殷勤。青紅蘿蔔煲瘦肉湯，足料，湯味清甜，很適宜夏天飲用。豉油雞色澤均勻，雞肉嫩，雞味濃。叉燒是採用五花腩，脂肪部位甘香，瘦肉部份肉嫩多汁，帶甜味。蝦仁炒滑蛋，蝦肉彈牙，炒蛋剛剛熟，口感滑，帶少少咸味。芥末牛柳粒，賣相美觀，牛柳粒香口惹味，口感不柴，芥末醬汁美味。總結：食物美味

叫左一個义燒米粉，凍檸茶米粉類似新竹米粉，ok嘅。之前都有叫過懶粉，都ok口感適中，爽而不硬有伴炸菜幾好。湯係有少少胡椒味不錯，可能係魚湯，略嫌少鹹到主菜义燒，應該都算係五花腩黎，食左3舊正常之後，點知其餘個5舊，口感異常奇怪，睇落似瘦肉，食落去有肥膏同霉爛肉嘅口感，完全食唔到。 一直都冇食堂食，都係正正常常，最多係肥膏多都算，豈碼可以揀啲大瘦肉食。 但今次竟然係食到霉肉口咁。 真係餐廳外賣10間9間都中伏，唔係俾錯左就係俾啲下欄料你。 認真係無話好說

朋友啱啱搬咗去藍田，去完新居探訪之後，佢提議到附近食燒味。原來嗰間係大壹燒鵝，之前食過銅鑼灣店。但藍田店原來有埋小炒小菜。而我哋兩個人就叫咗個$288套餐，好多嘢食好抵。套餐包括白飯及例湯，燒味雙拼，跟住再可以揀兩個小菜。我哋揀咗半肥瘦叉燒拼油雞，小菜就揀咗紅酒會牛尾同埋瑤柱海味雜菜煲。今日個例湯係老黃瓜，正常嘅餐廳水平。最快上枱嘅當然係燒味雙拼，油雞俾咗雞髀我哋，唔錯。半肥瘦叉燒果然做到半肥瘦，仲有少少燶邊，鹹甜味適中，而且又捻，肥膏都有少少爽口，好好食。紅酒會牛尾嘅份量大到你唔信，酸酸甜甜幾開胃，而且牛尾炆得好入味，配菜例如蕃茄西芹洋蔥都好味，送飯一流。最後嘅瑤柱海味雜菜煲又係份量超大，瑤柱絲份量都唔少，雜菜就每樣都有啲，而且個湯底又唔太鹹，咁樣清清地平衡返其他餸嘅油膩，食多啲菜都有益。最後每人加$7仲有杯凍飲真係抵到無話可說。