金城餐廳 (已搬遷) 新店位置

星期四我4時左右先搵食同友人各叫一個午餐同茶餐我食左野就只係叫左個茶餐奶醬多+檸茶, 友人叫左摩囉雞扒飯...我份茶餐就唔多特別亦唔需介紹, 但見到友人個飯就已經忍不住要試果碟頭飯一來就已經好吸引我啦...有一隻荷包蛋係面加上少少咖哩汁..最正係d炒飯有d似印尼炒飯又有d葡萄乾係入面.至於個炒飯炒得好好, 飯粒粒分明亦唔算太油, 至於個雞扒都做得唔錯起碼煎到個皮微脆又有肉汁.

我地食咗幾款食物但最愛都是這款嚤囉雞扒飯咖喱加提子乾炒嘅飯底, 粒粒分明兼香噴噴的味道；兩大塊煎雞扒, 煎得剛剛好, 肉質滑溜；還有一條煎得不乾且带油的厚煙肉及形態引人的太陽蛋；所有東西,蛋汁連燒汁撈來吃, mmm...mm...那種美味是非筆墨所形容. $46還要送咖啡或茶 (凍飲加$2)

經常出沒東大街的我，竟然無幫襯過此店，主因是未裝修前地方殘舊，感覺如麻甩佬飯堂... 裝修後今晚才終於首次惠顧。朋友點了招牌的焗豬扒飯，原來阿蘇都介紹過 (雖然我唔覺得佢好可信)。淺嚐，發覺名不虛傳，豬扒屬厚切，肥瘦適中，仍有肉汁，炒飯底，正﹗我點了干炒豬扒意粉，豬扒較薄，意粉也稍油，但口感仍佳，不會過焾，整體不俗。連凍飲，埋單近$100，比快餐店貴，但也比快餐店好吃，而且份量甚多，可繼續支持。

之前亞蘇都有介紹過招牌焗豬扒飯,今日可以試到好滿意羅宋湯-很正宗,足料,味道酸甜度適中招牌焗豬扒飯-相比大快活真的不錯,焗出來香香少少濃面,少少芝士,豬扒厚身juice啖啖肉,我見大多數枱枱都點招牌焗豬扒飯,有鮮茄,如果多一點更好薑蔥爆豬肚雞- 比較多油,味可以重一點,當然,雞不太有雞味,薑蔥很多

Yummy!Yummy!舊年睇過蘇Good介紹呢間餐廳，只覺得係呀蘇自己覺得好食啫，唔係太相信會有咁大o既驚喜。就係呢一日，心情有啲悶，兩公婆喳架車去咗筲箕灣東大街嗰頭行吓，散吓悶囉！到達時已經12點有多，經過呢間舖，嘩！人山人海呀！見又未食嘢，咪一心要去試吓個龍躉炒河係咪咁得先囉！雖則佢哋係有「人滿之患」，但啲侍應真係好招待，一見有人行入間舖就會即刻招呼問幾多位，儘量安排，唔會待慢你o架。唔駛等就比我哋見到門口有兩個位，緊係嗱嗱聲埋位啦！第一時間問老闆娘有冇龍躉片，有就要炒河，真好彩，不過想試吓個炒菜就冇嘞！因為午市可能做唔切o既關係，冇得落單囉！最終兩公婆叫咗個龍躉片炒河，兩杯凍飲，個炒河食唔到佢有味精，龍躉片好新鮮、好鮮甜、唔會一夾就散，肉質好爽脆，又好滑，食完後再飲埋杯凍檸茶，個口都仲有啲龍躉片o既味道，你話正唔正啦？埋單都唔駛$100，去邊度食到咁平o既、又咁新鮮o既海魚呢？我就話只此一家嘞！讚讚讚！

有晚同男朋友拍拖拍到去筲箕灣,諗緊食咩飯, 男朋友話金城出名食焗豬扒飯,於是就試左.我個人認為個焗豬扒飯都算唔錯,但係都係偏貴,諗下人地大咩樂都係3X一客包野飲,金城要成41蚊(都包野飲),但又咁, 佢件豬扒都真係好大件, 里個係事實.我地仲叫左梅菜蒸鯇魚,條魚蒸得老左少少,但都OK.值得一提既係,里兩樣野都無乜味精,所以絕對係可以再試!

新正頭，不斷努力清掉囤積的蘿蔔糕和年糕，實在熬不住了，想食番餐飯。跑到筲箕灣東大街，開的舖頭不多，太爺雞連雞都賣晒，惟有到處找找看。經過金城，吸引我倆目光的不是大大張的推介照片，而是「季節限定」的海膽炒飯（$70，連餐飲）。坐下一問，賣完了；同伴說，既然一場造訪，便試試她的台柱吧！於是，點了焗豬扒飯（$41，連餐飲）和嚤囉雞扒飯（$42，連餐飲）。雞扒飯先上。炒飯色澤和配料（不少葡萄乾）都可以，雞扒煎得剛好（上碟時皮向下，所以煎的效果看得清楚），還有一塊不肥的煙肉和一隻半生熟蛋。汁很多，幸好是淋在雞扒上而不是飯面，才不至令不嗜有汁飯的同伴皺眉。吃起來，味道中規中矩，奇怪的是雞扒有陣膻味 …焗豬扒飯也到了，一看，皺眉頭的是我。看上去，這碟飯跟坊間吃到的沒有分別：一丁點的焦、幾粒蘿蔔、兩塊洋葱，還有那色澤假得可以的汁。蕃茄呢？欠奉。難怪色假。吃一口，普通過普通，豬扒裡面完全無味兼帶乾，一看橫切面，慘白一片，明顯沒醃過！汁，沒蕃茄味是預期之中，surprise的是過甜。同伴說，以前住處附近的高士打餐廳，主打的也是焗豬扒飯和嚤囉雞扒飯，當然比這好吃得多了。高士打不見了、華人也不見了，那一輩的餐

東大街的第二站，來到了蘇絲黃介紹的金城餐廳，目標是「至叻焗豬扒飯」。據說金城店主跟阿蘇份屬雀友，阿蘇評語當然一致讚好，但亦曾有食友表示，這裡的焗豬扒飯水準不太穩定，番茄汁醬時多時少，究竟吃到的是吉是凶，就要睇幫襯當日的運氣了。味道方面，番茄汁看起來比較簡單，內裡沒放鮮茄粒，只得三粒普通 size 的紅蘿蔔，幸也十分醒胃，撈飯吃不易起飽滯之感。招牌的豬扒則醃得相當入味，邊位入口帶脆，水準確實不錯。焗飯跟熱飲 $41，轉凍飲加兩蚊，是標準的茶記價錢，如果住在附近的話，去金城，的確好過去大家樂！

龍躉炒河 - 龍躉肉唔係好多, 不過魚肉新鮮&幾彈牙. 冇雪過, 河粉兜亂過, 好幼. 碟邊圍左幾條菜心!焗豬扒飯 - 豬扒幾腍, 唔乾. 個汁有D舊茶餐廳Feel .. Like !!值得一試.

我媽長年住在外國不靠近海的地方，因此每次回港都希望吃新鮮的魚，也特別喜歡吃粥，在過去兩個月裡，我和她吃粥的次數接近我過去兩年吃粥的總和。而事實上我並不太愛吃粥，為取箇中平衡因此我們今天去了阿蘇在節目中曾經推介過的這家茶餐廳。在門口的報評看到，這裡的老闆以前從事漁業，所以能取得比較好的魚來賣，所以我們點了(1) 班腩炒河餐：$53，(2) 麼囉雞扒飯餐：$42 和好像也有推薦過的餐：$41。(1) 班腩炒河中的班腩由於已走過油，獻汁也重，所以很難去分別究竟是新鮮魚還是雪魚；又或者如果真的是用新鮮魚去做的話，這個魚的魚味已蕩然無存。(2) 麼囉雞扒飯是比較令人驚喜的，不在於它的雞扒夠大塊，而是汁料很揶味，炒過的飯粒不致於太乾身之餘，加入的提子乾和荷包蛋更有畫龍點睛之效。(3) 焗豬扒飯是比較過譽的，飯和豬扒兩方面都頗乾身，但總括每個餐份量都很大，算幾抵食。

係同區的茶餐廳來說係不過不失的一餐茶餐廳,而且價格都比其他便宜少許~以煲仔菜來說.......我食左焗豬扒飯,真係好好食,好食過大家樂ge一哥焗豬扒飯,塊豬扒半煎半炸剛剛好,至於汁方面,亦調得不錯!!!有次成班朋友去d間食晚飯,叫左推介ge招牌班片炒河同大家姐龍躉炒河,兩碟野都係一食再食ge菜色,不過貴就真係貴左d,分別是58同72蚊,d方面要注意了~

經同事介紹，今日去咗東大街的金城食 Lunch，而想試的，就是阿蘇推介的龍躉炒河。茶餐廳，兩個人搭枱好快有位，見到一般午餐約$40蚊有找，見碟頭算大而且有湯，都好似OK。睇下推介，發現龍躉炒河 $72、斑片炒河 $58、斑塊炒河$48。心想，龍躉應該同斑片差唔多，今次食斑片炒河先，平十幾蚊好過，遲d先試龍躉炒河。 斑片炒河 ： 炒河有打獻，是比較濕的。我覺得ok，講唔出係咪真係特別好。好少食這些較新鮮的斑片，連埋側面彈牙的魚皮，都幾有口感。間唔中食下都幾好。不過呢，龍躉炒河要再貴多十幾蚊我就未必會試，尤其我覺得炒河無必要食咁貴。連凍飲，是日消費$60。

在大浪灣游完水之後隨大隊搭巴士出到筲箕灣東大街一帶, 肚餓到極, 七點幾鐘, 大伙兒入佐去金城餐廳食野, 因為門口有蘇絲黃的報導介紹呢間餐廳, 所以諗都唔諗就入去根據蘇絲黃的推介, 我叫佐一碟焗豬扒飯食, 茄汁好多, 味道唔係差ge, 但豬扒比較多肥油, 好在因為塊塊豬扒都大大舊, 都幾多肉食, 不至於無肉食, 而我都幾欣賞個茄汁入面的紅蘿蔔, 煮得好食侍應的服務一般, 不過覺得餐廳比較舊同唔夠清潔, 係間餐廳比較差的一環 係唔係可以上電視俾人介紹, 單憑個茄豬飯又不見得有過人之處

十幾年前就住東大街, 無印象有野特別好食, 而家變左食街, 行左一圈, 決定試一下呢個.餐牌好多野, 不過諗黎諗去, 最後要左個班片炒河, 阿SO 推介WOR, 其實都幾貴, 另外叫左一個晚餐晚餐係牛仔骨+雞扒, 再配薯條, 牛仔骨得一小舊, 雞扒就一塊上, 又唔脆, 一般般, 最差仲係D著條, 又唔脆又唔多熱, 真係一般無乜位坐既蚊型快餐店既雞肶薯條應該好食過佢多多聲輪到個好貴既炒河, 河粉好幼, 都有D味, 班片都不過不失, 碟邊圍左幾條菜心, 無乜油水仲有D葉黃左, 58蚊一碟真係........... 貴!果晚係星期五晚, 我地2人入到去大概7點, 勁多人囉, 有D2公婆, 亦有1家4, 5口, 仲有單拖西裝友......... 不到7點半就坐到滿晒人, 仲要不停叫D單頭搬黎搬去讓張小圓枱或4人枱出黎, 只係星期5晚都甘樣, 簡直就唔憂做, 質素都唔荒會有提升, 都係食一次算了是日晚餐食左104蚊! 呢個價去一般茶餐廳都可以叫2個一般水準既扒餐, 唔一定要黎呢度

呢間餐廳因為有阿蘇撐，所以未入去醫下個肚。點知第一次幫趁就帶來有驚無喜。我叫了一個常餐加杯凍飲，要$24，心諗應該會食得飽，但個餐原來得２隻超細的煎蛋，再加個小型餐包，另外再一碗迷你得誇張既火腿絲通粉，嘩！咁既份量收我廿幾蚊認真好賺，快餐店都好過佢。唉！都算喇！點知我一開餐就即刻嚇個半死，我竟然見到隻蛋裡面有一絲金屬物體，驟眼似釘書釘，咁搞法我緊係即刻同個侍應阿叔反映，我叫個阿叔睇下條金屬物體，佢仲問番我轉頭係咩黎？我話蛋裡面有釘書釘，佢再睇清楚再捽兩捽，然後話唔係釘，而係鋼絲擦的鋼絲，佢仲覺得好似若無其事，我即刻反駁佢話鋼絲線咪即係金屬囉！用來擦鑊，污漬無哂！如果我唔小心食咗咪要入醫院。我叫佢換過碟俾我。其實我都算好人，而且個阿叔D態度都算OK，所以無call 999同食環署，否則肯定見報兼臭名遠播，阿蘇話好食都冇用。呢次係第一次亦係最後一次幫趁，絕對冇下次。