影片
港鐵尖沙咀/尖東站 E/ L3/ L4 出口
繼續閱讀
電話號碼
27343803
開飯介紹
倚窗閣提供各種來自世界各地的國際美食，並提供早餐、午餐、下午茶、晚餐以至自助晚餐，而且餐廳內可盡覽彌敦道繁華熱鬧的景緻。
繼續閱讀
營業時間
今日營業
07:30 - 21:30
星期一至日
07:30 - 21:30
以上資料只供參考, 請與餐廳確認詳情
相關文章
雖然今年大閘蟹來得較遲，但總算遲到好過無到，對嗎？其實想食大閘蟹，除了可以在酒家或家中享用外，自助餐都係一個不錯的選擇。早前就同朋友去了尖沙咀九龍酒店倚窗閣，一試其‘’蟹之饗宴‘’Buffet。尤其是家陣係eshop訂位，4人同行有高達6折，計落最平可以去到$300左右。大家都講生意差，相信係一個不爭事實，但係市道越低迷下就越要加把勁，近日好多酒店都回歸自助餐市場，買一送一有，eshop早鳥又有，但回到初心，仍是以食物作出發點，就好似今次九龍酒店倚窗閣為例，個人覺得好多菜色都好啱自己。生蠔有帶海水味的法國 Fine De Claire 生蠔以及蠔味有改進的美國太平洋生蠔。海鮮有生蠔就多數無龍蝦，畢竟是成本問題，這是常識吧！海鮮類有主題之一的北海道栗蟹，如果沒有栗蟹就會換上英國蟹包蟹。小龍蝦仔、紐西蘭青口、智利藍青口、加拿大雪花蟹腳、凍海蝦及翡翠螺，好多都大大隻，肉質飽滿，個人就收貨。刺身倚窗閣的刺身，一向是我喜歡的，因為有少見的阿根廷紅蝦及帶子，肉質嫩滑又大隻。赤貝爽口彈牙，劍魚腩肉味濃。仲有常見的八爪魚、油甘魚及三文魚，單係食刺身已經幾成飽。什錦壽司種類不算多，但蟹籽及魚籽一整兜任食又好少見。野菜和牛配昆布茶湯即灼即食，沒有不好吃的道理，清清地，吃出牛肉的味道，不錯。蟹粉花膠撈麵將麵條沾上了豐腴口感的蟹粉，是何等美妙的事？更何況加上了花膠，就更加可口。湯品燉湯大家一定要飲，因為係海底椰花膠燉竹絲雞，湯清味醇，又夠滋潤，必飲。就算並非燉湯，西湯是意大利雜菜湯，而中湯是冬瓜清補涼煲雞，兩者都煲得好有家庭湯水feel。熱葷新加坡咖哩麵包蟹配炸饅頭對不起，用咖哩汁蘸點炸饅頭實在比食蟹更吸引。蟹粉酸辣素翅羹，又有蟹粉又有素翅，即係矜貴版酸辣羮。而汁燒煮和牛面頰，好軟稔入味，蘿蔔尤其是鮮甜。輕盈一點，來個日式蟹肉茶碗蒸蛋。蟹粉類仲有蟹肉扒時蔬以及蟹蠔花膠絲雞煲，都各有風味，尤其是蟹蠔花膠雞煲，完全揉合了不同元素，很有趣。海膽蟹肉帶子意大利麵好有驚喜，有嚼口之餘材料豐富。海鮮中，蔥油頭抽蒸比目魚可以啖啖肉不怕碎骨一流。港式小食有咖哩三寶，蘿蔔、魚蛋及豬皮是常識吧！其他熱葷有香草海鹽慢烤有骨肉眼扒、燒烤醬豬串骨及海鮮炒飯。喜歡的，可以來一件北京片皮鴨。而大堂一角，有自家出品的豬肉燒賣及潮州粉果。Carving Station雖然好邪惡，但都要來一件香煎鴨肝。日式照燒蒜香和牛粒即炒即食。亦有香煎露絲瑪利羊扒、香辣鐵板牛舌、免治雞肉棒串、辣肉腸薄餅、鹽酥軟殼蟹及日式天婦羅。燒味同行朋友大讚自家出品的玫瑰豉油雞，當然蜜汁黑毛豬叉燒亦是店方名物。涼菜、沙律及Cold Cut加埋足足有十幾款，由辣風的川式涼拌菜，到清新的吞拿魚沙律，口味眾多。喜歡的，大可試試木瓜芒果蝦沙律或日式炙烤牛肉沙律。仲有紅椒凍肉腸 、新鮮煙三文魚配水瓜柳及刁草、精選意大利凍肉雜錦、蘑菇肉腸、燒和牛片伴日式漬物沙律、蟹肉蕃茄凍湯和芒果蟹肉煙三文魚卷。甜品整個甜品區可說是倚窗閣的強項。先係每晚的不同時段，都會有火焰雪山及梳乎里推出，充滿了同同太太拍拖時的回憶。Movenpick雪糕總共有瑞士朱古力、士多啤梨、椰子、特濃咖啡、檸檬青檸、法式焦糖燉蛋及意大利芝士蛋糕等口味，既可以配甜筒，又可以加topping，食幾多都得。雖然榴槤種類不多，但D24榴槤忌廉泡芙及榴槤布甸，同樣有水準，榴槤味好突出，不錯。至於甜品有芒果特飲、紅桑子特飲、藍莓芝士蛋糕、杞子桂花糕、椰汁西米糕、芒果拿破崙、香芒布甸、72%朱古力慕絲蛋糕、 panna cotta 、tiramisu、迷你冬甩、 原味鬆餅及朱古同埋cupcake，當中好多都係迷你版，食多幾款都無問題。另一邊甜品區有朱古力噴泉。食了即制熱香餅，熱辣辣散發蛋香，味道果然不同。其他還有葡撻、豆腐花、芝麻糊、台式三色芋圓及涼粉。
繼續閱讀
友人生日，大家相約星期日一起慶祝，見到kkday有優惠推廣，長者每人$310，預繳式消費就係着數，咁當然有一定的冒險精神！九龍酒店地點方便，倚窗閣環境坐得舒適，空間感亦很好，星期日係全院滿坐，非常熱鬧。食物種類性價比高👍有生豪、長腳蟹、青口、海蝦、鮮切日式魚生等。雖然人多要排長龍，但都好快取到食物。沙律、冷盤、熱食、咖喱、生滾粥、自選食材港式粉麵、林林總總的甜品、多款美味Movenpick雪糕，任飲咖啡奶茶果汁。大家都食得非常滿足😁
繼續閱讀
疫情前黎食過好多次，lunch dinner都食過，覺得佢好多選擇，值番個價，又好味。諗起好耐冇去食就琴日去食佢個lunch buffet啦，大佬呀你話哂都海逸旗下，係咪要做到咁cheap呀？比較值錢既已經係生蠔同蟹腳，同埋movenpick 囉，冇架喇。好彩我早鳥優惠買咋，唔係仲倒蝕得西利呀！以前有既時日糖水，好靚既燒鵝燒鴨，花膠，燉湯，鮑魚，牛仔骨，全。部。都。冇！生蠔中低等美國貨色，一d蠔味都冇！燒味得叉燒同雞！我不嬲食buffet唔會食呢d燒味，咁係選擇多既大前提下囉，琴日冇野食度我只能係咁食叉燒咋！以前仲有成個counter既印度咖哩同鮮烤薄餅，而家變左做四川麻辣野！咩水煮肥牛呀回鍋肉，係要奶到咁盡咩？唔做埋小龍蝦？佢地最中意喎！最眼突係我竟然係酒店buffet見到一個飯煲興住煲咖哩豬皮魚蛋！仲有周街都有既章魚燒，同埋街市凍肉鋪同超市廿幾30令蚊一大袋既急凍日式雞串！你以為佢起碼整個汁丫，有，冇味既汁，d雞串唔知雪左幾耐，冇味架！茶包得兩款twinnings 茶包，奇怪既薄荷葉味同最雞果隻english breakfast，中式茶包係勁平既陸羽香片！超市十令蚊盒廿幾個果d！唔係咁侮辱人嘛？個熟青口係麻辣架！個pizza 都係辣架！其實係咪寫漏左個自助餐係四川主題呀？個美國骨係冇肉食架！唐揚炸雞都係急凍料咋！生蠔冇蠔味又細又瘦！凍海鮮得蟹腳，凍蝦同兩款唔同大細既青口！螺都冇隻！細青口仲勁多海草垃圾！西冷勁咸！仲要有cheap cheap章魚燒！以前movenpick係雪櫃一杯杯自己攞，而家玩配給不比你！甜品叫做搭救番啦，個限量梳乎厘幾好食，好香蛋味，蛋糕都幾好，有自助涼粉食，都多配料，不過木桶豆花係冰凍既。而佢係唔會有標示架。有即煎pancake同好細既葡撻仔食添，不過pancake唔係煎完即刻擺落隻碟度比你食，係煎完放入擺葡撻仔個櫃度，有人要就攞比佢，所以係唔熱架！不過全部都唔係咩值得番票價既野！同場加映有個大喊唔停兩粒鐘既細路女，同埋兩個因為唔見單而邊行邊鬧交既職員！而且佢人手好唔夠，切西冷果個阿姐要同時過隔離檔度煮粉麵比人食！我都反省自己，唔通我比好平既價錢所以得到咁既野咩？我食放題平佢百令蚊都有羊架牛舌海蝦海膽鮑魚花膠龍蝦呢d食丫！都係任食！係呀，而家羊架都冇得食架酒店自助餐！疫情對佢打擊真係大到咁咩？咁咪唔好做自助餐囉！差過以前不得只，根本係cheap！唔係泰式辣就川辣，咁你一係就話明係麻辣主題啦！
繼續閱讀
[ 倚窗閣 ]尖沙咀九龍酒店由即日起至2024年8月31日推出「海味之珍，果香之尊」主題自助晚餐，任飲任食3.5小時有一系列以「蠔🦪」入饌嘅菜餚，以及多款D24榴槤特色甜品😋！✿ 海味之珍，果香之尊自助晚餐時段：6:00pm-9:30pm (3.5小時😍!!) 成人 $566.4/位、小童 $406.4/位 (網上商店7折優惠後價格)前菜、沙律🥗自助餐由沙律、凍海鮮到熟食都有「蠔」食😋！沙律有泰式青木瓜鮮蠔沙律、波士頓龍蝦沙律等，另外有意大利凍肉冷盤選擇。時令冰鎮海鮮🦪🦀🐚🦐任食現場即開美國生蠔🇺🇸🦪！！肉質肥美，海水味較淡，味道清甜。此外有加拿大/俄羅斯蟹腳、紐西蘭青口、智利藍青口、海蝦、翡翠螺等。蟹腳夠鮮唔會太鹹，其他海鮮肉質爽彈😋。刺身、壽司🍣刺身有三文魚、油甘魚、北海道帶子、阿根廷紅蝦等，全部即點即切🔪夠厚身👍。另外有數款雜錦壽司。烤肉區🍖必食嘅有即點即片「北京片皮鴨」，烤鴨外皮超香脆，肉質軟腍，仲可以按自己口味混醬👍。另外有即點即切嘅 烤加拿大帶骨肉眼扒，現場即煎有法式鵝肝、羊扒、鹽燒牛舌等，熱辣辣好多肉汁🤤。熟食/熱葷🍲中意食蠔🦪嘅朋友不能錯過 蒜香燒廣島蠔、日式吉列炸蠔配海膽蛋黃汁、鮮蠔蟹肉味噌飯、韓式粉絲泡菜蠔鍋等。其他熱葷有慢煮和牛臉頰、美式燒排骨、港式燒味等。蜜汁叉燒更用咗西班牙黑毛豬製作，夠哂誠意。海鮮熱葷有蔥油頭抽蒸比目魚、豉油王虎蝦等，想食澱粉質有即點即煮車仔麵🍜。飲品🍹有果汁、紅茶、汽水等，全部係自助區任攞任飲。甜品🍰🍨榴槤愛好者記得留肚食甜品🤭！榴槤特色甜品有D24榴槤芝士蛋糕、D24榴槤朱古力蛋糕、D24榴槤忌廉泡芙、榴槤布丁、榴槤芝士撻、現場即製咸蛋黃榴槤窩夫等。唔食榴槤嘅可以選擇芒果椰汁糯米飯、芒果拿破崙、日本十勝紅豆綠茶蛋糕、台式刨冰伴寒天及鮮果，再有9款Mövenpick口味雪糕，同埋現場即焗「法式梳乎厘」，每晚8時正更有「火焰雪山」表演！總結🫦 提早係 九龍酒店網上商店 預訂有高達7折優惠😍！除咗自助午餐/晚餐，九龍酒店今期下午茶都有榴槤、芒果甜品🤤。✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿倚窗閣地址：尖沙咀彌敦道19-21號九龍酒店2樓電話：2734 3803✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿✿
繼續閱讀
上月假日嚟食過自助午餐，覺得食物選擇幾多，仲有Movenpick雪糕，所以今次要同朋友慶祝，就book番呢度。唯一唔同係今次平日（星期五）嚟。自助午餐由1200供應到1430，食客可坐到1445/1500（侍應話下午茶自助餐1500入座）。平日嚟，食客較少（假日滿座），食物選擇亦少啲，不過亦有佢的特色食品。飲品：任飲；有果汁、咖啡、茶、無糖罐裝飲料（2款）湯：朋友有飲中、西湯，應該各1款，睇落冇乜特別沙律：自製沙律的食材係例牌果啲，但竟然冇豆類（如紅腰豆、鷹咀豆）；我選擇落油醋汁，但調味料係原枝倒，一倒出嚟份量就過多；雖然餐廳有巨型木沙律碗俾食客撈沙律，但全程冇人使用；另外亦有2-3款預製沙律涼拌：3-4款，包括涼拌青瓜木耳同麻辣雲耳，幾惹味，凍食亦適合而家的天氣芝士：有3款芝士，幾好食，尤其garlic cheese，帶鹹香，雖然唔係昂貴食材，但都令人滿足；可惜係當朋友出去攞芝士時，見到有2隻小昆蟲（唔講係乜），佢細細聲話俾職員知，職員馬上拎入廚房换，但咁樣只係眼不見為淨，心靈冇被安撫到Cold cut：有隻脾掛咗出嚟展示，冇專人切肉，但睇落有啲架勢；附近擺咗幾碟cold cut熱盤：選擇可以，唔係多，但乜都有少少，包括即煮粉麵、炒菜、炒粉麵飯、2款點心、少量燒烤蔬菜等；上次嚟食有印度咖哩，今次就冇，但有一塊細size薄餅，而薄餅就較少人問津甜品：選擇唔少；上次食完呢度的自助午餐，最令我念念不忘就係甜品，因為有黑朱古力粒、黑朱古力杏仁、朱古力慕絲蛋糕等；今次除朱古力慕絲cup cake外，其餘都見唔到；不過，餐廳有幾款唔同口味的cup cake，另外有奶凍之類，最特別係今次有3款限定榴槤甜品：榴槤芝士蛋糕、72%黑朱古力榴槤蛋糕同榴槤蛋撻。蛋糕係原件，要自己切，多少隨意。喺呢3款特式甜品中，榴槤芝士蛋糕同榴槤蛋撻最有榴槤味。除此之外，上次食唔到的梳乎厘今次亦有供應，每次出爐會敲鐘，全程敲咗2-3次。見坊間食評話梳乎厘係必食，我覺得可以，但未至於必食，可能物以罕為費；另外，甜品仲有豆腐花同Movenpick雪糕，雪糕我最鐘食espresso croquant，勁重咖啡味，今次試埋楓糖合桃雪糕，唔好食，楓糖味有少少假，最敗筆係合桃係「淋」既，記得唔好浪費quota生果：3款，蜜瓜唔甜整體嚟講，呢度的自助午餐都可以。酒店地理位置佳，喺餐廳坐近窗可以睇下外面（雖然觀景只係對住半𡷊的後門/側門）；座椅舒適度一般，我哋張檯唔穩，全程食嘢要就住；侍應有禮，收碟速度幾快；自助餐的食物選擇可以接受，但食品衛生要多留意。經klook訂座$331/位。
繼續閱讀