新新酒樓

營業中

休息中

在新樂酒店裏面的新樂酒樓, 如可以酒店的中菜來說它應該是最便宜的, 就如一般屋村酒樓的裝橫與格局, 再加上位置上的方便, 吸引不少街內街外客, 感覺草根而實在. 新樂酒店結業後, 大部分原班人馬在隔離的莊士倫敦廣場開了新新酒樓, 這幢是佐敦最多食肆的商廈, 同一幢有金山, 定位與你其相當類似. 點心均價二十多元, 例牌叉燒五十多元, 要不是為了在龍堡免費泊車, 要消費$300以上, 每人$100也不用, 當然要求的也是功能性為主, 吃得飽入得口就已經合格. 叉燒的香脆和腍, 以及燒賣的蟹籽及蝦肉的鮮也是在功能性以外多出的元素, 當然要改善的也有, 例如蘿蔔的蘿蔔出水出得過份, 南瓜餅煎得太油, 但和之前新樂酒樓在水準和功能性來比較, 沒有差別下值得合格.

佐敦，新新酒樓。我估，這裡會成爲我的早餐固定飯堂。點心可以，不算特别出色。但地方好，不太吵鬧，有大窗，自然光讓人心情愉快。早茶很便宜！因为有孖寶點心。吃三個點心，埋單$53 。早就知道，大酒樓都是以本傷人，價錢浮動，不同時段不同收費。點心專門店都很窄很逼，那及得上他們座位舒服？因爲我是下午班的，得以享受這些早茶優惠。這裡的特點是有很多懷舊食物。我老豆最愛吃的蒸鱼腸都有。金錢雞，很久没見了！雖然我不喜歡它太肥，有機會我也想重温。

今晚外父生日，一家同佢去咗新新酒樓食生日飯，分別叫咗懷舊金錢雞、金銀蛋莧菜、片皮鴨、清蒸鮑魚、蝦多士、砵仔焗魚腸、杏汁豬肺湯、蘢仔荷香薑米蟹蒸飯。先講懷舊金錢雞，第一次食呢味餸，面層係蜜汁叉燒、中間好似係豬油、然後再夾住塊豬膶。食落去幾香口，同埋咁樣食豬膶，個味同平時唔同，感覺變得有啲似鵝肝。金銀蛋莧菜就無咩特別，正常。片皮鴨亦都唔算太突出，同埋啲鴨肉有啲韌，不過就幾多鴨同薄餅。清蒸鮑魚亦都普通，同埋覺得蒸得耐咗啲，鮑魚亦都係有啲韌，同埋無咩味。到碟蝦多士，上碟時都仲熱辣辣，同埋隻蝦好香，件多士亦好鬆脆，唔會太油，乾乾地身，幾好食。砵仔焗魚腸亦唔腥，同埋幾多魚腸喺入面，入面啲油炸鬼亦都唔淋，同一般出面食到嗰啲都幾唔同。杏汁豬肺湯亦幾香，飲落去幾清甜。最正係蘢仔荷香薑米蟹蒸飯，本身一望落去啲飯白雪雪，以為會無咩味，點知食落去啲飯吸咗啲蟹味，同埋有啲蟹黃，而且個飯有啲懷疑係豬油，食落去好香，好正，正到一之次連食三碗。雖然啲餸菜整體唔錯，但有一樣嘢覺得間酒樓需要改善，就係冷氣，成間酒樓熱到好似無冷氣咁，成餐飯都要開住把手提風扇，如果唔係實出晒汗。同埋臨走前去洗手間，發現洗手間入面啲冷氣係超凍

我預約左5月1去太子區打疫苗 ,  然後約屋企人去佐敦飲茶 , 之前好幾次都係去恒豐酒店樓上酒樓飲茶 , 今次終於去到呢間 , 睇點心纸竟然有我既飛佛蒸魚雲 , 二話不說就點左......好正  ,  食食下又再加下點心 ,  叫埋燒鵝瀨 ,  點知斬隻鵝脾  ,  屋企人話抵到爛啦 😋!!

今晚一行16人book了一間細房，四人一枱，各適其適自行叫餸食，我們兩枱合點了粟米斑塊、酥炸生蠔、蝦多士、咕嚕肉、义燒、蒸大連鮑魚和籠仔蟹蒸飯等，蝦多士炸得十分鬆脆，咕嚕肉恰到好處，粟米斑塊也很好味，是用斑塊，不是用稔魚柳，酥炸生蠔就不過不失，义燒就較瘦，有點柴皮，不推薦！大連鮑魚就一般般， 十分細小亦無特色，龍仔蒸飯很入味，值得推薦！整體也算不錯，可以再幫襯！房間環境亦不錯，有維港景！招呼也可以，但點菜時有點亂！

位於彌敦道佐敦的新樂酒店於1950年代開業 為本港老牌酒店之一 酒店內的新樂酒家曾經是武打巨星李小龍、演員李香琴和譚炳文等的「明星飯堂」因疫情於2020年6月14日結業 原有的班底在旁的莊士敦廣場開了新新酒樓 今日我慕名去一試 可能是強調懷舊氣息 所以無論裝修和燈光都充滿老氣 十分嘈吵 我們坐的位置近升降機旁 有服務員在執已清洗的碗碟 叮叮噹噹 更加難受 細心一看 這服務員期間又去處理剛走客人的食具 在這敏感時期 真令人有點擔心至於食物 不覺得有任何突出之處 祇有叉燒 蟹子燒賣及燒乳鴿頗佳 其他如燒腩仔皮脆但肥肉多 豆苗餃味道很淡 金沙蒸魚肚只有少許鹹蛋黃 沒有驚喜之作很普通的一間店 耳朶很難受 聊天很辛苦

未試過去一間出名既酒樓，衛生係咁差，第一，一埋到位，張椅勁多面包碎，多到佢唔講，我以為仲有人係度食緊野，依樣我都算，到洗杯碗個陣時，3套杯碗就有一套係唔乾淨，我都算，叫呀姐換過套，點知呀姐換套仲差，有飯粒係隻碗度，我就話，呀姐，有啲過份喎，呀姐答我話我唔知廚房洗碗既野，結果我自己嬲嬲地出去換，點知出邊10隻碗，7至8隻係油既，結果，全程我都無食過任何野，依間我永久黑名單

Easter有五日紅日，搵左日同屋企人拜完山一齊食晚飯，老人家特別鍾意食懷舊菜，知道新新酒樓有個套餐有懷舊菜之餘份量又足又抵食，就同屋企人黎食。新新酒樓係一間幾十年老字號酒家，以前喺對面新樂酒店入面，後來新樂酒店執左，先喺而家哩度改名重開。因為回憶，亦因為香港人悶喺屋企太耐，所以當晚酒樓座無虛席，仲要有人等枱，咁嘅場面喺香港真係唔知幾耐冇見過，好彩我地一早book左枱。哩度嘅價錢同一般茶樓差唔多，唔係特別貴，不過套餐比散叫更抵食，我地叫左個四人套餐，包左五餸一湯一飯，仲有壽包同糖水，包埋茶芥酸菜先$988，加埋一都係每人二百幾蚊。花生四個人有一碟，冇受潮正正常常。上湯焗加拿大龍蝦  -  龍蝦啖啖肉，肉質結實彈牙，每人都分倒兩三件，下面仲有伊麵底，每人大約分倒一碗，伊麵吸晒龍蝦同上湯嘅味道，話咁快就俾我地清晒。懷舊金錢雞 - 金錢雞雖然唔係咩名貴菜式，但由於功序多，所以而家唔係好多地方有得食。佢係用叉燒、雞膶同肥豬肉串起黎燒，叉燒鬆軟，雞膶膶味突出但唔會太粉，下面嘅肥豬肉就用左玫瑰露黎醃製，食落好爽口。海皇燴燕液 - 湯羹杰度啱啱好，非常大窩，每人大約分倒兩碗，入面除左燕窩，仲有好多蝦

因為疫情，減少了和家人或是朋友多人飯聚，但發現新新酒樓，還提供了些4人套餐，一個價錢共有6餸1湯1飯，還有壽包，套餐價錢還包了茶介和餐前小食，食物份量一點都不少，只需額多付上加上費用，確實經濟，難得有朋友生日，當然前來一起慶祝一下。新新酒樓已有60年老誌號易名重生，所以保留不少懷舊菜式供應給食客，現位於佐敦莊士倫敦廣場，從地鐵站前來也很方便。來到廣場，還有電梯直達高層，所以很快便可以進入酒樓之內。****************************這個４人套餐 HKD988，一個價錢共有6餸1湯1飯，還有壽包，套餐價錢還包了茶介和餐前小食。當中包括了一魚二食，還有龍蝦和雞，懷舊菜金錢雞都包括在餐單之內，已經難得。最後還有一個燕窩湯、炒飯，壽包，還有酒樓免費送上的是日晩飯糖水 ，確實有其吸引力。上湯焗加拿大龍蝦，還包了伊麵底，伊麵可以分為每人一碗，龍蝦都幾大隻，每人都可以吃上3件，啖啖龍蝦肉，肉質又彈牙，雖然用上上湯而不是芝士，一樣煮得很美味，單是這道菜式已經吃得滿足。懷舊金錢雞，在酒樓發現，懷舊菜式是每件收費，金錢雞單件是HKD38，最少2件起。金錢雞共分為3層，第層是义燒、中間是

從舊店已開始幫襯，到後來更上十一層樓繼續幫襯，但剛搬店後因質素大不如前，人流極少，所以先行暫且放下；直至多年後嘅今日，兩老話想再嚟幫襯，而且見食評也不錯，於是見今日星期日假期，都膽粗粗嚟試下。到達後，果然不出所料多人在等位，但最後也不消半句鐘便可以安坐；點心雖然唔係太多選擇（可能貴精不貴多），但每樣都係想試嘅點心，加上套餐都不錯，不過我們仨叫點心都夠食。我哋點咗五樣點心加隻乳鴿，後來仲加咗人手推銷兼新鮮熱辣嘅焗餐飽；乳鴿肉汁鮮嫩好味，每樣點心都足料兼新鮮出爐，而且樓面人手充足，招呼不錯！總結⋯價錢公道、食物質素中上、雖然環境有少許狹窄但尚算乾淨（起碼洗手間企理）、招呼不俗！基於以上原因⋯一定有下次！

為妹姝慶祝生日，訂3張枱12位。龍蝦伊麵$198鮑魚蝦多士 (每位計)汁燒蝦(每位計)金錢雞(每位計)蒜香一口骨滷水掌翼杯酒美國生$188豆腐煲竹笙籮漢齋冇侍應落單，跟單，自己去加熱水，自己去追單，要長期叫侍應才可落單10日前已訂位2/4/202I，6:30pm,很多餸菜已冇，訂位時問極都冇餐牌。如非熟客，冇糖水。我信 openrice負評了，食物味道一般。太子女黑面，伙記少，冇服務可言，仲叫我地將就。sell香港懷舊菜，尖沙咀頂好，佐敦金山比佢好，價位差不多。唔使受氣先。食餐晚飯幾4蚊落樓，條氣好難順。

舊同學相约我到佐敦新新酒樓,食晚飯聚舊。餐廳內有大魚缸,暫養活新鮮海鮮。*餐廳店有傳統的中式裝潢,光猛舒服。**【潮式什拼】(特價) $68這潮式什拼,有鵝翼、豬蹄、紅腸。鵝翼及豬蹄嫩滑有彈性,略為不夠入味,鹵水汁偏淡,有點失色。**【紅燒脆皮乳鴿】 $52是即叫即燒,熱騰騰的乳鴿,肉香鎖住,外脆香口肉嫩,肉質嫩細滑不會乾淨淨,佐酒不錯小食。**【果皮蒸大連飽魚】  $138這蒸飽魚,有原汁原味效果,帶出飽魚的鮮味,同時蒸得剛剛好,不會令肉質會變老,口感爽脆又鮮味,還有淡淡果皮香。**【芝士焗美國龍蝦】 伊麵底  $198大隻龍蝦啖啖肉,肥美肉厚,鮮味肉質爽甜可口兼彈牙,配上濃郁的芝士,與龍蝦很絕配,而伊麵裡掛滿芝士,非常芝味。*最後免費送上陳皮綠豆沙,為晚餐上圓滿的句號。

呢間有幾十年歷史嘅酒家，由原本地舖搬左上呢個廣場嘅十一樓，升降機門口貼上各演藝明星黎食飯嘅相片，有佢地嘅"加持"，水準靠得住傳統酒家裝修格局，大魚缸/電視/燒味部/枱上有辣椒醬及花生，有點兒返去細個跟父母去飲茶感覺肚餓指數高，叫住個小食食住先，呢客沙薑鷄腳 ($48)又點睇呢?!鷄腳本身唔算太有沙薑味，好在另有碟沙薑加味，想濃想淡味自己話事太耐無食過紅燒乳鴿啦，呢度有得食仲唔叫返隻($52)咩?!  價錢反映大小，唔算太大隻，隻鴿滷得相當入味，趁熱食點喼汁就係我最愛食法見到隔離枱實物相當吸引，自己忍唔住都叫脆皮燒鷄 ($118/半隻)皮薄無咩脂肪，燒得夠香脆，鷄肉唔乾身，點配燒鷄汁仲好味道呢個薑蔥粉絲魚雲煲 ($108)，價錢相當超值，街市買個魚頭都唔平，呢度仲加埋粉絲同薑蔥煮成一個煲，超級推薦!魚頭經過油泡處理，變得香脆，一D魚腥味都無，魚雲滑溜，加埋香甜蔥度，千萬唔好留咗佢; 粉絲可以當主食，正!粉絲食到尾都仲保持熱度健康有營之選 - 杞子雲耳浸菜苗 ($88)，少鹽少油，除了雲耳及白菜仔，仲加入芹菜條，偶然食到香甜杞子，黑綠中一點紅!承傳傳統酒家"美德"，晚飯後會送糖水，呢碗臭草

屋企人想去試下所以就去咗食， 服務非常之好只招呼熟客， 見唔到有夥記做到嘢，叫人落單過到嚟招呼咗隔離枱熟客先，但係明明係我哋嗌落單先另外，上菜速度超慢， 要三催四請嗌咗四個飯嚟得一個飯， 叫咗兩三個人去追啲飯先到齊四個， 仲要話係員工聽錯到埋單， 個侍應埋嚟掉低張單， 一句多謝曬都冇不如索性做私房菜，唔好買廣告食物質素唔差嘅， 但係服務態度非常惡劣啲嘢食幾好食都食唔落都係奉勸佢哋唔好買廣告啦一間酒樓連門面都唔得， 仲要員工全程黑面， 根本就係狗眼看人低

呢間酒樓已經有56年歷史，超過半世紀嘅老字號必定要過嚟試吓！近期維持四人限聚令堂食至晚上10點，佢哋推出了兩款四人套裝，分別係美國龍蝦餐$838和鹽擦鮑魚餐$738(星期六日或假期加$50)，今次選了個鮑魚餐試吓！早了幾天預先訂座，準時七點到達，酒樓已經八成以上滿座，好彩之前預早安排，否則一定冇位！點餐後大約10分鐘已經來第一份「招牌燒鵝拼叉燒皇」最驚喜嘅係呢碟雙併嘅燒鵝，皮脆肉嫩，外皮薄溥的而不太肥膩，一啖咬開肉汁仲會流出黎，質素同某大燒鵝店有得揮喎！叉燒半肥瘦，面頭蓋了蜜糖，肉質鬆軟，雖然欠缺一點燶邊焦香，但味道不錯！4件鹽擦6頭南非鮑魚：口感彈牙鮮味，配以秘制椒鹽調味，用刀叉薄切嚟食一流濃湯雞煲翅：原隻鮮雞加上份量十足嘅魚翅燉湯非常鮮甜，呢個套餐價錢有埋雞燉翅真係超值！蘆筍炒花枝蝦球：夠鑊氣！露筍鮮嫩清新，花枝片、鮮蝦炒得好彈牙。咕嚕黑豚肉：濃濃嘅酸甜汁包住皮脆肉嫩嘅咕嚕黑豚肉肉，加埋鮮菠蘿一啲都唔覺得漏濃湯灼生菜膽：湯鮮不油，生菜同菇亦灼得啱啱好，仲可以中和番其他菜式嘅油膩感。讚！總結：4人埋單連茶介加一$860左右，真材實料，物超所值！服務員反應快態度有善和健談！目測這店很多