毓民私房牛肉麵 (已結業)

前幾日終於有機會試過啦。因為感冒肚子有點不舒服，在旺角又想不到吃什麼好，見呢間舖好似幾企理，麵食應該不會太油膩，便與友人一起入內，但可能係黃生高朋滿座吧，很不容易在收銀處附近有位置便坐下了。但..........卻被惡型惡相的事頭婆怒啤了幾下，我只好圓說是伙計要我們坐於此（這是事實）。後一直只聽到事頭婆不停的喝罵員工，應該這應該那，坐於附近的我也似被罵得煩厭，很是不安。不是應該於開市前briefing 嗎？？至於食物方面，只點了菜肉雲吞麵，魯肉飯，黑油雞翼。麵質不錯，很彈牙，有趙頭，但湯既味精太太太重了。食畢舌頭【也母】住了。真的太味精了。魯肉飯做得頗有台灣風味，而黑油雞翼則無什麼特別，只是一般豉油雞翼吧。唯一可讚的是-------店內不準吸煙。黃生不停跟他的好友打招呼，甚至乎隔著我們，不懂福建話的我們，只好快快食畢便離開，頓感身心舒泰。也許黃生近年因宗教原因，人變得和善了。反觀太太則......有待修為。

牛肉麵好食..d麵夠彈牙..肉夠林,入味..湯底係紅蘿蔔濃湯底..好味..值得一讚~~但排骨麵(即豬扒麵)本人覺得豬扒就唔好食...一心諗住係炸豬扒..但係出來極係煎豬扒,肉質都頗"un"..麵都重係好食...湯底好清~~至於小食..本人試過豬心連及生腸~生膠味道一般..口感麻麻...而豬心連就好食,口感,味道不錯~(但兩者應該都只係"烚"...配上醬酒加蒜泥) 可以一讚係豆漿好味....但係坐位好逼.....坐得唔舒服...而且伙計唔識自己加茶...

正當頭痕唔知邊度食宵夜，行過見到呢處，好喇，橫掂未試過。全店得幾客，叫左招牌牛肉麵。牛肉好淋，不過肉味稍遜，始終煲左好耐。試啖湯，好濃好甜，牛肉麵的湯一定要夠濃，呢個合格有餘。的羅白亦都煲得好淋，甜就梗的。麵就真是普通左的，用的是上海麵，我記得在台灣食過的牛肉麵，用的是粗身的奶油麵。根本上整體的味道可以，我都成碗食晒。不過我覺得的湯先是成碗麵的精華所在，著麵反而只是陪襯。同埋完全估唔到食完會咁飽，但廿八蚊碗就覺得有的貴。

o係旺角就腳, 所以第一次食31/12, 滿座, 不過人流轉得快, 唔使等位牛肉麵+酥排骨湯牛肉麵- 湯濃, 麵彈牙, 牛夠腍, 蘿蔔甜. 我一個女仔食, 夠晒飽...$28接受到, 但不會食過番尋味. 只是行過附近都食得過o既.酥排骨湯- 好唔掂, 俾張相呃左. 味精湯+好難食o既排骨.可能老闆黃生o係度好落力咁招呼人客, 伙記都好勤力. 我落單時唔記得叫走青, 後補都無俾面色.

自知道佢O係九龍城開業後，一直都好想搵機會一試，因為男友極喜愛吃牛肉麵，可惜地點真係太遠。不過，得悉佢O地係旺角分店，第一時間幫襯。是次要了一客香煎豬肝，一碗牛肉麵同一碗水餃麵。麵條好有咬口，男友說牛肉好入味、好腍，但我食O既水餃就唔係咁好，可能皮太薄，穿晒，但喜歡佢菜多肉少，吃多幾隻都唔覺漏，最正好碟豬肝，好香，雖然油較多，但豬肝幾爽，不過要趁熱吃，不然會有失口感。

lunch 黎講我覺得貴左少少....$28 蚊食碗麵o係旺角黎講我覺得都算係貴喇味道嘛...普通啦。d 紅蘿蔔/ 白蘿蔔都係好入味好甜既~不過d 主角牛肉呢...就好似冇乜味咁麵亦都唔算多...d 湯我唔知係佢濃味定係真係有少少味精..食完我飲左幾杯水咁..同行既同學食個黑油雞翼麵..個comment 話都係普通啦不過感覺上佢得四隻雞翼+ 一碗麵我就有牛展+ 蘿蔔+ 麵...好似抵食少少咁XDD落單o個位哥哥唔多得，同佢講要牛肉麵佢反問左我兩次先聽到我要咩=.="d 態度仲要唔多好...好似好趕住走咁=__="係忙je...但係都唔使咁誇張掛

　　原本同男友行街之後想吃咖哩，但又找不到一間合適的店，男友才建議帶我去試試這間店。　　在門口已看到毓民在打點，都算誠懇待客，夠主動，我鐘意。侍應反應似乎較慢，踢一步郁一郁！我們兩個都點了招牌牛肉麵，湯底似乎鹹了點，蘿蔔夠林，味道不錯，牛肉有四片真的不夠，幸好我不是大胃王，所以都算夠的。建議味道方面不宜太鹹，不是每個人都能受到的，吃畢會勁口渴。豆漿ＯＫ啦

毓民牛肉麵從我工作地點尖沙咀搬去旺角後﹐因地點問題我已無幫趁過﹐眼見最近有不少劣評﹐是否真的一落千丈﹖故今早經過旺角﹐決意一試以尋求真正答案。十一時半﹐是開店後的第一檯客。環境當然比中港碼頭時要好﹐始終是自己的店舖。要知道水準是否保持﹐當然要吃牛肉麵﹐還例牌地要了個鹽酥雞。說實在的﹐整體上水準並無下跌。湯﹐還是濃香的﹔麵﹐跟以前一樣是不過不失﹔蘿蔔還是一樣的甜﹐牛肉味道亦跟以前沒有大分別。不過﹐同意牛肉的份量是少了。要注意我說的只是牛肉﹐整碗麵還算是大碗的﹐只要你不是大胃王﹐跟以前一樣是$28吃得飽的。鹽酥雞水準亦跟以往差不多﹐雖則不是甚麼絕佳風味﹐但熱辣脆口總算合格。客觀地說一句﹐從上樓的美食廣場搬至旺區地鋪﹐成本上昇是難免﹐但食物並沒有加價﹐我覺得單是這一點﹐還是值得支持的。服務則的確明顯不及以往﹐店員殷勤但不夠醒目﹐很多時要開聲提點﹔而負責收銀處的女店員(相信是店長吧?)態度則非常一般﹐就算對其它店員也不很禮貌﹐起碼在店員之間﹐我看不到和諧親切的感覺。夏天還好﹐冬天還遇上這種冷冷的氣氛﹐不太好受。贈毓民一句﹕對你的食物是有信心的。但生意成功與否﹐“人”往往是最決定性的因素。有時間

個名就聽得多…食就第一次…但失望而回…我同女友行旺角…發現無喇喇多咗間麵店…入去試吓…叫咗招牌牛肉麵和魯肉飯…湯底濃而有味…牛肉少得可憐…得三塊又要無味道…麵就不過不失…飯多過餸…魯肉有D味但好少…茶每次飲完叫樓面添茶…都要等很久很久…各位記得自備帶水先好去尼間…

　第一次吃毓民的牛肉麵是在九龍城的舊舖，只不過兩年的光景，已經兩次轉移陣地，由中港城搬到旺角。　要知道煲出一鍋好的湯不易，君不見日本正宗的拉麵店，都只有一至兩種湯頭，就是取其精，毓民的湯頭不多，記憶中就只有牛肉及清湯，濃郁的牛肉湯，及清甜的清湯，喝畢，沒有化學反應，應該是沒有落「師傅」，簡單但美味的兩款湯，叫人留下深刻的回憶。　相對於湯，毓民的麵則略為瞬息，麵質本身偏淋，可幸麵味不俗，或許台灣麵是比較偏淋，偶見識有限，這點就不得而知。　首次幫襯新店，太子爺招呼甚為親切，見偶喜歡吃蘿蔔，亦私人送了一碗煮得非常入味的蘿蔔給偶；第二次是收夜，心思思想試排骨麵，見到毓民同客人講波，偶不以為然，自顧自吃，清湯底夠清甜，炸排骨卻欠了點鑊氣，是翻炸之故？　旺角區要找一間像樣的麵店，五隻手指數得出，毓民是其一，雖然一碗麵要$28，但單是喝一碗的靚湯頭，也值這個價，何況這裡的舖租要成16萬呢！

一路都知道毓民開左一間私房牛肉麵但一直都未試過，尋日同男友tea time經過旺角竟然見到，餓餓o地咪入去試o下羅，點知真係好揼心丫！！我o地叫左個招牌牛肉麵和排骨酥湯兩份食，響落排骨酥湯o既order時，個男仔侍應反應頗為奇怪，係咁同我地講話排骨酥湯出黎個樣係唔同menu和牆上面o既poster個樣d排骨將會不同顏色，其實我唔係好明佢講咩野，但我o地早排去過台灣饒河夜市食過一樣叫"排骨酥湯"的實在回味無窮，就憑著那份難忘的回憶情不自禁地order了，就此抱憾了一整天。如果佢個名唔係叫"排骨酥湯"，我真係聯想唔到佢係台灣大名o既排骨酥湯！！先講牛肉麵，除左佢d牛肉俾得勁孤寒之外，其實都幾有牛肉味，我o地比起其他食家好彩少少，我o地o個碗師傅唔小心"重手"左，俾左4片半仔我o地，多大家半片仔，不過同大婆牛肉麵無得比，雖然大婆35蚊毓民28蚊，但不論牛肉和麵都好，我保守估計大婆一碗可以做佢兩碗，如果只係計牛肉，我諗起碼4碗，公道d講，毓民o既牛肉麵d湯做得好過大婆，夠清夠甜，不過我諗大家唔係叫牛肉湯，希望毓民唔好人地俾左錢食o野好似唔想俾o野人食咁啦，好寒酸丫喂...之於響寒流襲港都食到我

同bf去試左呢間牛肉麵....想試好耐架啦...以前淨得尖咀有... 而且唔地點係咁方便,而家好d啦~去到有下午茶,好似好抵食咁,不過想試大家推介果d先,所以冇叫~叫左牛肉麵同排骨麵...好好味!湯夠清肉夠林麵又彈牙~!!! 而且份量好足好大碗!不過食完後同bf不約而同地肚痛,唔知關唔關事~!照計環境都幾乾淨...又新開冇耐...俾多次機會下次再試~

星期六兩個人，大約２：００特登去試。唔知係咪期望太高，食完之後覺得普普通通，可以去普通舖頭食倒。兩個人，一坐落，侍應都算快嘅手腳，但係有一樣通病囉，個個放嘢響枱度都好似好趕咁，未放到落枱就放手，好似派啤牌咁，連嘢食都大大力咁放低，情況就十足十去咗茶餐廳咁。坐位方面都好迫下，分分鐘撞倒後面個背脊。叫了招牌牛肉麵、香酥排骨麵同黑油雞翼。牛肉麵之前都有人評過，湯算甜，蘿蔔味重，不過牛肉得４片仔，我食果時係唔夠腍的。排骨麵，除咗個湯之外，其他唔係好得，個湯係清雞湯，好香雞味，配幾條白菜，排骨（即豬扒）另上，件豬扒一上，個樣好嚇人，一啲都唔香口，仲要佈滿油，睇個樣好似返熱咁（啲肉呢好似擺耐咗縮細咗咁款），味道極普通，我哋食完一舊都唔想再夾，但係又唔想嘥，所以最後都夾硬食。黑油雞翼，可能浸耐咗，有少少少少鞋，不過就好入味，入味到越食越咸，食完要飲返杯茶，＄２２／４隻，唔係好抵喎，我去燒臘舖＄１０買幾隻都仲食得下。埋單果時，雖然我幫襯唔多，＄７８，咁我真係冇散紙嘛，＄５００，又唔係＄１０００，俾完佢又唔係咁好聲氣問我有冇散紙，梗係冇先俾係找架啦！同佢講冇又黑面我睇‧‧‧講得好似好差咁，其實都叫ｏｋ嘅

試了魯肉麵及lunch set (菜脯炒蛋及時菜)，時菜係必跟（當一個餸），不過有ｄ誤導，因為門口張傳單寫２餸１飯收$28蚊。個魯肉麵係乾撈，上面鋪左炆得好味既超肥腩肉幾件加鹵水豆腐幾件，腩肉真係超肥，不喜肥者叫回牛肉麵會好ｄ，lunch set 菜脯炒蛋portion 略細，味道都可以，如果以brand name黎計，都食得過。

牛肉麵湯底清甜，清到唔覺有油！牛肉是牛展肉，好正，不過得4舊仔…但有超正的紅蘿蔔和白蘿蔔，夠淋又入味~麵則馬馬虎虎過得去…午市有兩餸飯供應，看鄰桌好像不錯~不過建議各位不要叫餐牌上的魯肉飯之類的飯類，因為飯面得好少餸，根本不夠配飯的…鹽酥雞算不錯，不過始終是台灣街邊的舖頭仔較好吃啦~哈哈~冇加一~