| 餐廳: | 紫玉蘭 |
|---|---|
| 資訊: |
為鼓勵食肆透過提供食物份量選擇和採取減少廚餘措施，與顧客共同從源頭減少廚餘，環境保護署推出了「咪嘥嘢食店」計劃，參與食肆如符合評核準則將獲「咪嘥嘢食店」認可資格和獲發「咪嘥嘢食店」的標誌及標貼，以供張貼於店舖內和宣傳，供顧客識別。此計劃全年均接受申請，申請費用全免。
詳情可瀏覽：https://www.wastereduction.gov.hk/zh-hk/waste-reduction-programme/food-wise-hong-kong-campaign
老婆大人話同我去中環交易廣場食呢餐飯，我心諗乜呢度有餐廳嘅咩！估唔到就喺廣場嘅一樓有間叫做紫玉蘭嘅上海菜餐廳。
我哋平日去食呢餐飯見到都有好多客人生意都幾唔錯喎。
坐底嚟兩個前菜嘆吓先！老婆大人最鍾意食皮蛋，呢個秋香皮蛋肉鬆拌豆腐食落去好香口啱晒佢口味啦。
我就鍾意呢個樣靚仔到不得了嘅馬蘭頭石榴果，百頁皮入面有啲馬蘭頭然後包到成個石榴果咁樣鬼咁精緻。
百頁皮咬落去口感煙煙韌韌咁，加埋入面好清香嘅馬蘭頭係好食嘅。
跟住嚟碗熱辣辣嘅家鄉米莧鮮魚羹，清鮮嘅湯羹入面有啲菜蓉同埋魚肉，個羹一啲都唔腥仲越飲越香甜添。
我哋仲嗌咗一份紫玉蘭烤鴨！連埋一齊上枱嘅有嬤嬤皮、紫蘇葉、牛油果、哈密瓜、京蔥同埋青瓜，呢個組合真係好鬼特別喎。
烤鴨已經分開晒鴨皮、鴨肉同埋髀、翼位先至上枱，仲好細心將髀同翼包晒錫紙等食嘅時候唔會整污糟手指。
個嬤嬤皮做得幾煙靭凍咗都唔會硬口，我就鍾意包哈密瓜嚟食感覺好清新，至於髀同埋翼梗係用手攞住嘆先過癮啦。
繼續叫一啲上海嘅小菜嚟嘆吓，呢一個係邪惡嘅土匪豬肝，嗰啲辣椒好辣夠刺激啱晒老婆大人嘆，我就鍾意食煮得好脆口嘅豬潤勁惹味好正斗。
邪惡完之後食返個家燒冬瓜清空下個口，炆得口感啱啱好嘅冬瓜配咗濃郁嘅芡汁，清甜瓜香之中又有濃郁嘅香味，睇落好簡單嘅菜其實要花好多功夫先做到呢個味道。
鍾意食魚嘅我哋仲叫咗一條老干媽肉碎蒸黃花魚，新鮮嫩滑嘅黃花魚配咗香口嘅老乾媽肉碎一齊嚟蒸，出嚟嘅味道梗係俾清蒸惹味得多啦。
最後仲有呢一個醬油蟹毛豆年糕，用咗啖啖肉嘅青蟹嚟煮呢味餸啱晒我呀。
濃郁嘅醬油配襯鮮味嘅蟹肉好食到要啜手指！年糕平時我唔係好鍾意食不過呢個真係要讚一讚，食落去口感好煙韌最緊要係凍咗都唔會硬。
甜品揀咗老婆大人鍾意食嘅高力豆沙，呢個仲係升級版嘅高力蛋白豆沙香蕉，加咗香蕉之後食落仲更加香甜佢食到咪晒眼鬼咁享受。
影片
