麗島小廚 (已結業)

是日晚餐，簡簡單單，來個雞煲一樂也。今晚揀咗花膠濃湯雞煲，要咗一隻雞，隻雞真係好靚好新鮮，而且份量好足，佢啲雞都真係幾大隻。湯底滾起嘅時候，侍應主動埋嚟幫我哋將隻雞放入個湯度，仲問我哋落晒成隻雞定係先落半隻雞，我哋一次過落晒成隻雞，呢度嘅服務很好我我很滿意。再滾多5、6分鐘之後就可以開始食，侍應建議我哋先飲雞湯，佢話頭啖湯係特別滋味。飲舊雞湯食舊雞肉之後就可以叫侍應加湯，然後開始打邊爐。打邊爐又點少得牛肉呢，我哋嗌咗一份細嘅安格斯牛肉，都幾新鮮，脂肪分布都均勻，淥熟咗之後唔會話好韌。另外我哋仲嗌咗芋頭件同埋淮山片，兩樣都味道唔錯。

喺出面好多地方食雞煲，用嘅雞都唔需要好靚，因為個湯底嘅味道好濃，可以蓋過唔靚唔新鮮嗰啲肉嘅味道，所以真係冇諗過呢度用嘅雞會咁靚。今晚食椰子雞煲，雞肉同湯底分開上，另外仲有個椰青畀你倒落個湯底度，睇到都已經覺得好滋潤。滾起先飲頭啖湯，佢啲雞真係唔錯，肉質嫩滑有彈性。飲完雞湯食完一輪雞之後就打邊爐，我哋之後叫咗四樣嘢食，分別有蓮藕片、豬潤、竹笙同埋油麥菜，呢度嘅竹笙好靚，食落去好爽口同埋最重要係冇一陣噏味。

三日連續假期long weekend的第一天，晚上七時於石門這個地方竟然可以full House，就是因為這裏的雞煲質素高價錢亦合理。這是半隻雞的份量，比想像之中來得大碟，而且雞肉的色澤亦非常靚，質素很高。雞肉和湯底分開上，湯底滾起才將雞件倒入湯底內，頭啖雞湯味道香濃，雞肉亦鮮嫩。韭菜餃新鮮好味，是店員推介，果然冇介紹錯。這裏的炸魚皮很有趣，因為很大塊很長，當然亦很脆。另外還點了豬潤，很新鮮，冇瘀血色水。

誰說雞煲一定要麻辣菜好吃？這家店的椰子雞煲清新滋潤好味道。湯仔本身已經非常足料，紅棗竹笙杞子椰子肉等。雞件和湯底分開上，讓你清楚看見他們的雞顏值高，而且新鮮。湯底放入雞件後還會在你面前倒入一整個椰青，你可以刮椰青肉進湯底又或者直接吃，難怪如此清潤滋味。如麻辣雞煲一樣，當湯底滾起先吃雞及喝雞湯，之後才打邊爐。其實吃了半隻雞已經很飽，所以點不了很多火鍋配料，我們只點了兩款，這個是炸魚皮，這裏的炸魚皮很大塊很長。這個是蝦滑，一份有兩條，真抵食。

上網見好多人推介呢間雞煲的椰子雞煲，所以決定試吓。湯底都幾多材料，有紅棗杞子椰子肉等，侍應會喺你面前車個椰青落埋個湯底度，多一從功夫可能都係想話比你知佢哋係真材實料卦。雞係另上嘅，個湯底滾起先落，d雞都幾靚幾新鮮咁樣，再等個湯底滾5分鐘左右就食得，味道唔錯，雞味夠香濃夠新鮮，個雞湯都好正。食完雞就開始打邊爐，叫咗蜂巢豆腐同鮮蝦雲吞兩款配料，蜂巢豆腐吸晒啲雞湯嘅精華實在太正，佢嘅鮮蝦雲吞都好食，啲餡都幾新鮮。佢嘅杯檸茶好大杯好正，真係雞煲必備。

個個都話返大陸食椰子雞煲，試過之後我都係覺得呢一間石門嘅雞煲店好啲，呢度啲雞係嫩滑啲，國內啲雞係韌啲同鞋啲。今晚要咗半隻雞嘅椰子雞煲，雞件非常新鮮有冇瘀血而且份量非常足。佢個湯底都有幾多材料，當然最重要就係喺你面前倒落去嗰個椰青水啦，另外湯底入面都有一啲椰子肉喺度，難怪食落去會有一種清潤嘅感覺。侍應叫我哋湯滾咗先至放雞落去然後滾5分鐘就可以開蓋，先飲雞湯同埋食雞，食到7788兼飲夠雞湯之後就可以開始落其他配料打邊爐。因為呢度嘅份量都多，所以只係叫咗冬瓜件同埋黑毛豬豬頸肉片，兩樣都好新鮮。

Set Lunch款式多，我哋三個人一人揀一款然後share食，我哋揀咗魚香茄子、豉汁蒸䱽魚同埋剁椒肉鬆蒸豆腐，呢度嘅份量都幾多，我覺得四個人食都絕對足夠有餘。 lunch time時間一坐低侍應就送上每人一碗例湯，今日係紅蘿蔔合掌瓜粟米煲豬骨，呢碗例湯冇味精，真係好正。佢嘅set lunch除咗你揀嘅送之外仲會跟一碟菜，魚香茄子用小砂鍋上，食嘅時候仲熱辣辣，冇乜油果下好。豉汁蒸倉魚嘅豆豉好香，條魚又大條又新鮮。剁椒肉鬆蒸豆腐嘅肉鬆其實即係肉碎，啲豆腐好滑，又唔會好辣喎。個餐仲跟埋嘢飲，都幾抵食。

今晚兩個人食雞煲，揀咗椰子雞煲，半隻雞份量，再加少少火鍋配料，飽到冇朋友。佢呢度湯底、雞同埋椰青係分開上嘅，半隻雞都幾大隻，而且都幾新鮮。將雞同埋椰青到晒落個湯底度等佢滾起，唔使咁快打邊爐住，食吓雞飲下雞湯都不知幾滋味。啲雞真係好新鮮好嫩滑，而且啲雞都唔係好肥，唔會搞到成個湯底油淋淋，個椰子雞湯真係好飲，好香椰子味。火鍋配料我哋只係嗌咗韭菜餃，呢度嘅韭菜餃幾好食，入面啲韭菜好新鮮。呢度嘅大檸茶幾抵飲，大大杯，啱晒食雞煲。

今晚試了一間以雞煲做主打的餐廳，見佢個椰子雞煲好似幾吸引，加上其中一個朋友唔係好食得辣，與其叫BB辣的雞煲咁無癮，不如試吓叫椰子雞煲啦。呢度嘅雞煲嘅雞同個湯係分開黎嘅，個伙記會等個湯滾起咗嘅時候幫你倒D雞落個湯底度，因為係椰子雞煲，所以會有一個椰青，會喺落雞嘅時候落埋落個湯度，個椰青仲有D椰子肉可以刮出黎食。除咗半隻雞之外我地仲叫咗一份雲吞、一份炸魚皮同埋一份墨魚滑，雲吞新鮮好食，炸魚皮超級巨型，其他地方好似都無食過咁大塊嘅炸魚皮，而個墨魚滑亦都新鮮好食，仲有兩條咁多，值得encore

一向中規中矩，跟區內另一間叫豐鍋嘅食肆叮噹馬頭。已兩三個沒有去過，今日中午不但竟然毋須等位，更可即時直入，而且亦有數張吉檯。原來食物已大不如前，難怪都不用等位！1）餐湯「西洋菜湯」：雖然都有西洋菜味，但是味道「好薄」、味道淡，好像被嚴重地溝淡咗2）蟲草花蒸雞飯：味道尚可，但每舊雞都係雞骨或皮 (雞肉可能去曬雞煲客人度)3）蒸肉餅飯：材料欠佳，肉餅本身唔靚，係梅嘅，再加用大量豆粉去醃，肉餅梅到又似老者嘅軟餐

估唔到個胡椒豬肚雞煲整得咁好食，最重要係入面啲豬肚好多，而且啲豬肚都洗得好乾淨，有驚喜。啲雞肉好新鮮，侍應姐姐叫我哋個湯滾起先至放雞落去。放咗雞落去之後冚返蓋，等到個湯再滾起之後大概滾住咁多5至6分鐘就食得。本身雞湯就已經好鮮甜，加埋胡椒，就有一種驅寒嘅感覺。食夠雞飲夠湯之後就可以開始打邊爐，我哋叫咗炸魚皮、萵筍、雲吞拼韭菜餃同埋蝦滑。啲炸魚皮超級大塊，睇幅相feel唔到有幾大，不過真係好大。雲吞同埋韭菜餃都好新鮮，早知分別叫一份。一向都覺得萵筍打邊爐好正。蝦滑好新鮮，一份有兩條好抵食。

雞煲唔一定要食麻辣嘅，今日試咗藥膳醉雞煲，味道都唔錯，最主要係啲雞嘅質素真係高。半隻雞兩個人食fit晒，因為個雞肉同埋個湯底係分開上，所以好清楚可以睇到啲雞肉都幾白淨唔會有瘀色，佢啲肉嘅顏色都幾新鮮。個藥膳雞湯真係好清潤，而且比想像之中少油，所以喺打邊爐之前趁佢未被污染嗱嗱臨整返兩三碗先，佢啲藥材未又唔會好濃，都幾OK。原來半隻雞都唔少嘢，所以火鍋配料我哋只係叫咗韭菜餃，因為侍應話佢哋呢度嘅韭菜餃係自家製，所以就試吓啦，都真係幾好食，我估唔會係即叫職包，但係連啲韭菜都好新鮮嗰吓勁。見隔籬枱有杯巨型檸茶於是我又叫咗一杯，真係幾大杯飲咗好耐。

鍾意幫襯呢間雞煲店嘅原因就係佢除咗麻辣雞煲之外仲有其他口味嘅雞煲，包括呢一個清潤滋味嘅椰子雞煲。佢個湯底本身已經有紅棗椰子肉杞子竹笙等等嘅材料，然後再將一個椰青水倒落個湯底度，之後再落買隻雞，滋補清潤，原汁原味。個湯滾起咗就當然先飲過椰子雞頭啖湯，好鮮味好好飲，之後就開始食雞。呢間雞煲店用嘅雞嘅質素同份量都唔錯。湯底入面嘅竹笙質素亦都OK，幾好食。我哋另外仲叫咗一份韭菜餃，搞入面爆韭菜，真係好香好新鮮。

氣溫再次急降令下午5時下班的我不知所措，因為天氣太冷回家太早還是吃點暖身食物然後回家方為上上策，結果坐屯馬線由啟德直入石門，皆因心中已覺得天寒地凍還曷吃椰子雞煲最好。很久沒幫襯此石門雞煲店，今次再來，水準仍然保持，侍應的服務也很恩勤。我們兩個人二話不說點了椰子雞煲，半隻雞兩個人吃到飽，因為此店的份量很是驚人，相片中就是半隻雞。雞和湯底分開上，然後侍應會取一個椰青直接倒進湯鍋內，待湯滾起，再幫我們將碟雞放進湯鍋內，等湯底再次滾起，我們便開動了。先喝雞湯，香濃的雞味加上清新的椰青水，再加上湯底內的杞子、竹笙、紅棗及椰子肉等，喝湯時感覺清潤無比。喝過湯後開始吃雞，這店選用的雞肉質嫩滑且有彈性，就是有很新鮮的感覺。其實吃過半隻雞後已經很飽，不過還是心思思點了雲吞拼韭菜餃，兩款都新鮮好味道，我特別喜歡韭菜餃，真的很好吃。

兩個人走去食椰子雞煲，估唔到要半隻雞竟然係咁大兜，好彩唔係叫咗好多其他野，如果唔係實食唔晒，呢間雞煲又好食又抵食。佢嘅椰子雞煲先上湯底，然後成碟雞拎過黎，仲有一個椰青，伙記喺你面前落D雞落個湯底度，然後再倒個椰青水落去，之後就蓋鍋等佢滾。滾起等大約5分鐘左右就食得，伙計建議我地先飲個頭啖湯，再食雞，之後先至開始打邊爐。頭啖湯好清甜好正，椰子水的香味同雞肉味混為一體都米話唔和味。佢D雞除咗大隻之外，都幾新鮮，D雞味好出，雞肉好有彈性幾好食，隻雞唔係好肥，唔洗係咁咬走D脂肪。飲夠湯食夠雞之後就打邊爐，其實已經差唔多飽，不過都叫咗碟安格斯同一份墨魚滑，墨魚滑竟然係墨汁墨魚滑真係令人開心，碟安格斯都好靚，入口軟熟，質素真係唔錯。